صار اسنين لعبتنه
نطش الحزن ونلمّه ،
ونباري الفرح يلعب غاد
يا جف التطول وتكدر اتلزمه ؟
صار اسنين ،
نزف اعيونه للنجم بلجي انام ،
ونحلم لنّه فرحانين
طفل يلعب بكومة طين
وجوكه اهناك تتمشّه
على راك النهر ترس اجيوبه
نومي ، وخلال ، وتين
صار أسنين ،
نحلم لن اكو بربوعنه شلال ،
وكبل كل عيد نتنه اهلال
نتمشة العصر نتشابج ايد ابأيد ،
طفل حاضن أهدومة وغفا ليلة عيد ،
صار اسنين نحلم بالمودة بكل درب نشتل ،
ونشوف الفرح يلعب على البيبان
وليل المستحة البعيون الحليوات حزنه ايفل ،
ولن زفة عرس
والوادم من كلوبه اتهلهل ،
وماكو صاحب اليجفيك لو زليت ،
ولا احد يلومك ،
ينعتك بطران لو حبيت ،
ولو لسه اني ما حبيت ،
ولا بسمار رزة ابابك اندكيت ،
ولا عمري جنح
رف على تيغتكم
وجن خصلة ضوه
وية الفجر حطيت ،
ولا فركت عمري اوراق ،
ورقة باثر ورقة
وما وصلت البيت ،
ما حبيت ، ما حبيت