مجلة سهر الليالي ** كلام الناس** بقلم الشاعر / رضا أبو الغيط** اسرة التحرير / علي جلال

** كلام الناس **
*******************
عمر كلام الناس ما يفرق
بين قلبين دايبين ف الحب
عمر النار يا حبيبتى ما تحرق
عاشق ساكن قلبه الحب

لا ف يوم هنتى كده على قلبى
ولا هيموت من بينا غرام
لو زعلانه ليه بتخبى
خلى م بينا يا روحى كلام

عاتبى القلب العاشق عاتبى
خلى عيون القلب تنام
لو زعلانه قولى لقلبى
وبلاش يبقى ما بينا خصام

لا انا ها استحمل بُعدك عنى
ولا ها استحمل نار الشوق
حاسبى الغيره تخدك منى
وارمى كلام الناس من فوق

امسحى دمع عيونك واوعى
خدك يلمح دمعة عين
حاسبى تطفى بدمعك شمعى
واوعى تطوعى اى أنين

عمر كلام الناس ما ها يسرق
فرحه وساكنه ما بين قلبين
عمر يا روحى ما بينا هاتفرق
كلمه اتقالت ولا اتنين

مهما يقولوا ولا يعيدوا
خلى ما بينا وبينهم سد
خلى شموع الفرح يقيدوا
طول ما ف قلبك حُب بجد

*******************

بقلم الشاعر / رضا أبو الغيط