<!--<!--<!--<!--<!--<!--<!--

يارئيس البرلمان سيدي النائب اسامة
آني شاعر راح اكتبلك مشاعر..
شعب عايش بالندامة
وراح أوجهلك رسالة معنونة..
بس للنشامة
شلع لأصحاب الفخامة..
من الرئيس لأقربائه لكل عمامه
لكل شخص عاش وترفّه وعينه ماشافت شمس
لكل شخص نام وتدثر عاش بأحلام الأمس
لكل شخص زايد غروره وسمى كركوك القدس
لكل شخص بطران گاضيهه بمصيف
إلما يحس بصيف عايش.. لو خريف
لكل كتلنا.. من المعارض للحليف
والرسالة من مواطن صار كل همه الرغيف..
وصارت العيشة اهتمامه
ومن كثر ماهو نحيف.. بينت حتى عظامه
يخجل يطب المضيف لن ماعنده قميص ولا بجامه
اتوازه يوم وباع بنطالة وحزامه
سيدي النائب اسامة..!
آني شاعر يعرف يوجه كلامه
مو مثل غيري أوجه كل خطابي لـ(هيلاري)
زوجة (كلينتون) وسيدها أوبامه
صح فقير وحالي حال الضيم حالي..
وصح ضعيف
بس قلم عندي شريف مايخاف ومايجامل
أبد ماعلمته يحجي بيوم باطل..
أخذ طبعه من المضيف..
أبيض ودومه نظيف
وصح وكح حرفي وصليف، لكن أكبر من اوبامه
أمي اكبر من اوبامه، وآني أكبر من اوبامه
بلادي أكبر من اوبامه، أكبر وأعلى مقامه
آني ابن أهله وعمامه
إل ماينزل راسه يوم ولايذل فد يوم هامه
سيدي النائب اسامة..!
گلي مجلسنه الموقر يمته يگعد من منامه ؟
يمته يفطر ؟ مو خلص رمضان وصيامه
وستة من شوال خلصن..
عمي مغفورة الذنوب، بگصته مية علامة
من الصلاة ومن التهجد والقياما
سيدي النائب اسامة..!
يمته شعب الرافدين يعيش مرتاح بسلامة؟
وشنهو ذنبه واتهامه؟
يمته نخلص من سجون تعيش ذلة بلا كرامة
الله واكبر هالشعب صاح بندامة
الله واكبر يمته تعبر هالغمامة؟
نبقى مطلوبين احنا.. وعالجلد ندفع غرامة؟
الله اكبر عون ردناكم يسامة..!
غلطة صار الانتخاب وبعد متفيد الملامة
وصَدّگْ السبابة عندي تعيش ليهسه بندامة
سيدي النائب اسامة..!
الشعب دايخ في طعامه..
وبگعدته ومشيه ومنامه
أطفال مثل الوردة عدنه
العوز وازهم يوسفه وصفت عيشتها القمامة
واحنه مجلسنا الموقر ينتفض لأجل المنامة..!
احنه أولى من المنامة..
وخمسة مليون التبرع بيها (حاتم)
حطهه بحلوگ التقاعد واليتامى
ابني بيهه ولو دامه
تستر اجساد الارامل العاشت اليوم بندامة
ابلا معيل ولا كرامة
اكتل الجوع التفرعن بيهم واگصر لجامه
ونائب إلهزه ضميره هيچي فجأة..
واتفجرت بيه الشهامة
وفزع للبحرين يشجب..
وناسي إخوانه وعمامه
حلل الهم بالتظاهر وعدنه شو احنه حرامه ؟!
سيدي النائب اسامة.. ايها الاخ الحنون
شفت عالتلفاز اخبار السجون ؟
واعتقالات اتنفذ في جنون..
وامتهان لكل كرامة ؟
قتل في اتفه شوارع شاب وردة وطول فارع
وآني مااعرف تهمته يجوز جوعان..
وتجرأ گال جايع ؟
أو كفر سب المراجع ؟

والله ياسيد أسامة آني ما أقصد أحرجك
وآني كل خوش واحد فقط تنقصني العمامة..
وافتقد اني الوسامة
يعني أرهم أحلى نائب ؟
وهيه مو صعبه النيابة تريد قاط وكم رباط..
واكشخ بأحلى ابتسامة..
ولو ماأعرف أچذب..
ترهم وأشتغل نائب ؟