أنا وانتى كنا 
صح جدا واتقابلنا 
من زمان 
بس الزمان كان للأسف 
أكبر غلط 
وللا احنا ماشيين فى الغلط
والدنيا والزمن العنيد 
كان صح واحنا 
من بداية القصة 
كنّــا احنا الغلط ؟؟
مابقتش عارف 
احنا مين ؟؟
العقل رافض كل شىء
والقلب بيدوب فى الهوى
من أى شىء
الأمر أصبح مختلط
كل اللى شايفه 
ف لحظة الوله المؤكد 
قلبك البللورى 
والروح الألق
وانا محض صورة 
لانعكاس الشمس 
فى بداية الغرق
تايه مابين نزف القلم
وسذاجة السطر المسافر
فى الورق
حتى اما كانت تطلع 
الشمس العفية وتنتشر
فوق فى السما
أفرح قوى
واستنى تثبيت الرتوش
وتفوت ثوانى 
كأنها - من حزنى  
ميت مليون سنه
وف لحظه يخطفها الضلام
فيضيع بهاء الوجه 
والنور يتسرق
أنا وانتى خطين 
من خطوط العمر 
فوق كف القمر
لكهانة العراف هاتقدر تقرا شىء
من سر أسرار القدر
ولا حتى زرقاء اليمامه هاتفتكر
ان المثلث مش هايكمل 
الا بوجود الوتر

سكة سفر
انا وانتى ماشيين فى الطريق
يمكن تبوح 
روحك لروحى بالكلام
يمكن يعيش
قلبى ف هواكى المستحيل
أجمل غرام
لكن لا يمكن للأسف
ايدى هاتلمس /
أى شعره من الجدايل ع الكتاف
ولا حتى هاتفكر تداعب /
زهرة الرمان بصدرك /
فى المنام
يازهرة النار 
( قدر )
واللى انكتب له شىء يكون
نورك ونارك معطيات /
جدلية الموت والجنون
وانا قلبى لو فكّــر يرفرف لحظة /
الكسر المؤكد للظنون 
ويكون فراشة صغيرة
تقدر تطير
وتحوم وتعلى /
فى دايرة النار والحريق
وبكل أبعاد السذاجة والبلاهة تخترق
كف اللهب
لازم تموت
وتخش دقات الفؤاد
فلك السكون
يازهرة النار والجروح
انتى وانا
جسدين فى روح
أو روح كبيرة اتقسّــمت
روحك أنا
وانا روحى فيكى اتفككت
من غير جروح
يمكن نبوح
يمكن ننوح
لكن لا يمكن - للأسف –
مهما استطالت رحلتى
تجمعنا روح
------------------------
من ديوان ( زهرة النار )
للشاعر ناجى عبد المنعم
-----------------------