<!--

فى مكان ما حيث تجمع النحالين .. هناك حيث شمس الشتاء الدافئه وسطوعها خلال غالبية اليوم..

 يوجدأماكن لتجمع خلايا النحل بالمزارع والحقول حيث يتجمع المزارعين فى حقولهم

هكذا... هنا فى تلك المنطقه .. حيث يجتمعون النحالين لبحث ما يحدث والتشاور بينهم فى أمور تخصهم عن النحل وتناقل أفكار كل منهم للفائدة حيث شمس الشتاء والجو الدافىء..

وصلت لأماكن تجمعهم الأن فى حدود العاشرة صباحا والجو مشمس وصحو هناك...

السلام عليكم ورحمة الله وبركاته ..

وعليكم السلام باشمهندس.. أتفضل أجلس أشرب الشاى أمامك والله

صب ياواد الشاى للباشمهندس..

وحشانا حكاويك يا باشمهندس عن النحل والله... حكاويك زينه وكلها فايده وأتعلمنا منها كتير والمخ صار منور وفاهم من حكاويك.. ولما عملنا بكلامك ربنا كرمنا أخر كرم الموسم ده والله وربنا أعطانا من وسع من عنده وفيضه كتير علينا وكل ده بفضل توجيهاتك ونصايحك لينا..

أخوانى الفضل يرجع لله وحده ومجهوداتكم أنتم وتعلمكم للمهارات النحليه.... صح والله زين..

أخوانى أنا اليوم راح أسمع منكم أنتم ... كل واحد راح يحكى حكايته عن النحل وأيه أللى قابله وهو شغال خلال الموسم من مهارات قد تكون صعبة عليه قوى..

مين فيكم راح يحكى لينا حكايته فى هذه الأيام وخاصه واحنا فى الشتا بالفعل... أنا يا باشمهندس.. مين محمد أبو خليفه .. أيوا والله.. موافقين يا رجاله على كلامه .. أيوا موافقين.. قول يا واد أبوى يا متفلسف بالقوى.. أبدا معكم من وين حكايتى .. يا خوى قول وبس وخلص فى الحديت بتاعك ده..

طبعا كلنا عاريفين زى زمان حواديت النت الرغاى قوى واللى الحواديت الفارغه فيه أكتر من المليانه وزى ما أنتم عارفين .. وخلو شبابنا ليل نهار قاعدين كدامه .. مهى حرب زى ما بيقولوا عليها .. مش عارف أسميها أيه.. صح يا أبو أبراهيم ولا ... لا

مالشباب غصب عنه فاضى ولا شغله ولا مشغله عيروح فين .. كيف يا بوى الدنيا بخير والله هما أللى طموحهم كبيره ونفسهم يوصلوا لفوق مرة واحده.... رجل أول السلم ورجل أخر السلم من فوق .. يفتكروا نفسهم زى مصاصين الدم البشريه أللى ما نعرف كيف مره واحده وصلو حته واحده..

لكن القعده على النت ده أيه راح يعملهم .. راح يحل مشاكلهم أياك

ده راح يخرب عقولهم بالحرب أللى جايه من الغرب حتى يفسدو عقول شبابنا أللى هم مستقبل بلدنا بالمواقع أللى عيسموها مدرى أيه عليها....؟؟؟ نفسى ييجوا يشوفوا حواديت النحل ويتشجعوا ويعملو مشاريع نحل صغيره وبالصبر راح يكبرو شويه شويه زينا بالضبط.. ولا يعملو ا أى مشاريع بسيطه وتكبر معاهم ويكبروا هم كمان معاها.. وبلاش القعده الكتير كدام النت ده أللى بيخرب عقولهم وخاصه المواقع أللى أنتم عارفينها.... الله يهديهم... بكفيانا قعاد ده عيقولو الرزق شباب يا بوى والله.. البلد راح تعمل أيه ولا أيه.. ما الحكايه كلها عارفينها وعارفين أللى فيها.. هم أصحابنا خلو حاجه واصل... خلصو على كل شىء وخلو الناس كلها عندها فقر دم حقيقى ألعن من الفاروا للنحل....؟؟

يا واد بوى سيبنا من الحواديت دى وخلينا فى حواديت النحل .. يا بوى أنا جاى لك فى الكلام أهه...

كلكم شربتم الشاى ولا لسه.. مالك ومال الشاى .. أنا أصله لسه ما شربت الشاى بتاعى.. صب الشاى يا حسين لأبن ال....؟؟

طبعنا كلنا قاعدين كل واحد فينا أمام منحله فى الشتا ليه.. يا بوى كلنا عارفين ليه .. له أعرف خلى غيرك يعرف يا واد أبوى..

حتى نشمس النحل وهو أنه نرفع غطا الخلايا ونعرض الطوايف للشمس حتى نتخلص من الرطوبه لو هناك رطوبه وبكده نتخلص من الكثير من الأمراض زى الأكارين وتحجر الحضنه وغيرها.. والله زين أخوى كلامك.. وغير كده وضعين صرر من القماش بيها ملح خشن حتى يمتص الملح الرطوبه فى الأيام اللى ما فيها شمس وأحطياطى لتتسرب الرطوبه داخل الخلايا.. وكمان واضعين صرر من القماش بيها شيح بلدى حتى تطرد الفاروا وتقلل منها لو فيه منها.. صح يا بوى ولا أيه.. كلام زين والله

وكمان بنغذى النحل بالكميات أللى قال عليها الباشمهندس لينا وهى

2 سكر : 1 ماء والحمد لله النحل مازال بخير معنا من بعد ما قمنا بضم الطوايف الضعيفه والتعبانه واللى فقدت ملكاتها..

وبنغذى القويه قبل الضعيفه حتى ما يسرق النحل القوى من الضعيفه وتقوم معركه ويموت فيها نحل كتير زى عركة ولاد أبو...؟؟

وكمية السكر للطايفه فى الأسبوع حوالى نصف كيلو سكر يمكن نغذيها دفعه واحده ويمكن نقسمها على مرتين فى الأسبوع حسب حالة الطوايف وظروفها.. ونضع على التغذيه منقوع الشيح البلدى أو مغلى الأيسون أو الكراويه أو الكمون وبعض عصير الليون الحامض حتى يقبل النحل على التغذيه...

أيوه صح .. نسيت أقول لكم عن التغذيه البروتينيه أللى عيقولو عليها بدائل حبوب اللقاح أصل ليها فايده قوى للنحل...

وأحنا بنعملها زى ما قال الباشمهندس من عجينه مكونه من دقيق فول الصويا المنزوع الدهن وكمان اللبن الجاف البودر المنزوع الدهن هو الأخر.. علاوة على خميرة البيره الطبيه الجافه..مع السكر وبنعجن الحكايه دى كلها بمغلى الأيسون أو الكراويه مع عصير الليمون وكمان بنضيف السلفا كينوأكسالين معاها حتى نقاوم النحل الزاحف.... وكما عرفنا لو ما فيه دقيق فول الصويا يمكن أضافة دقيق الحمص المنخول ومعاه دقيق الذره ووممكن نضيف الثلاثه مع بعض بالنسبه للدقيق ( فول صويا – دقيق الحمص – دقيق الذره بالتساوى فى المقادير )... وكمان عرفنا لو ما فيه اللبن الجاف المنزوع الدسم يمكن نستخدم اللبن الحليب المنزوع الدهن أللى بيسموه ( اللبن الفرز أو منزوع الدسم أو الدهن ).. ونسيت أقول لكم عن الناس اللى ما هى عارفه تفرق بين الخميره الطبيه الجافه ( وهى خميره غير نشطه يعنى مقتوله وميته ) وخميره البيره الحيه اللى بيضعوها لتخمير الخبز.. يا أخوى يا واد أبوى يمكن لك أستخدام خميرة البيره النشطه بعد قتلها ووقف نشاطها.. بوضعها فى فرن متوسط الحراره لمدة 5 دقائق حتى تموت وتصبح غير نشيطه يعنى ميته.. عرفتوا كيف كلامى...

وبنضع من العجينه دى للطوايف بالأول قطع صغيره حتى يتعود النحل عليها وبعدين ندى كل طايفه حسب حاجتها وقوتها من العجينه... صح ولا أيه .. والله يا واد أبوى كنك أمزاكر من ورانا وحافظ الكلام زين..

أيه يا رجاله كنه الجو راح يتغير وراح تبرد كنها.. يلا نلحق نغطى الخلايا بسرعه وبعدين نكمل الحكاوى...

كلنا عارفين أللى راح تقوله والله  قوى... واضعين الخيش فوق الأقراص ومش تاركينها مدليه من بره حتى لا تمتص الرطوبه من الخارج للداخل من غير ما نحس بيها وكمان واضعين ورق الجرايد ( الصحف ) فوق الخيشه وكل ده تحت الغطاء وورق الجرايد يعمل كيف النشاف يمص الرطوبه وبكده نضمن مفيش رطوبه بالخليه فى الأيام أللى ما فيها شمس واصل وغير صرر الملح الخشن على طبلية الخليه هى كمان تمتص الرطوبه يعنى كل الأحطياطات عاملينها.. طيب يلا بينا همو كلكم كل واحد يغطى بسرعه... صح يا باشمهندس... والله أتعلمنا منك زين وكتير قوى وصرنا نفهم كويس...

طيب أخوانى اقول السلام عليكم وأستأذنكم ولى قعده تانى نكمل كلامنا سوا وأترككم لتغطية النحل قبل الجو ما يبرد على النحل...

ونشوف باقى حكاوى أخوان النحالين الباقين وهم وشطارتهم...

إلى باقى السهرايه منتظركم أخوانى النحالين فى حكايه جديده...

وفى نفس المكان ونفس الزمان كان لنا القاء الثانى مع أخوانا إياهم وهم قاعدين فى سهرايتهم يحكون ويتحاكون ما تعلموه من النحل والعمل فى النحل من مهارات اكتسبوها وخبرات من واقع العمل وكيف انهم عندما تقابلهم مشكلة ما يتصرف بحكمة وحنكه منه حتى يتخطى المشكلة ويتغلب ويقضى على تلك المشكلة التى صادفته أثناء قيامه ببعض العمليات النحليه....

السلام عليكم ورحمة الله وبركاته جميعا...

وعليكم السلام يا باشمهندس شرفتنا ونورت قعدتنا وياك..

الله يكرمكم جميعا .. وأحوالكم أيه...

نحمد الله كثيرا والفضل كله يرجع لله وتعليماتك لينا..

أه نكمل حواديتنا أللى فاتت اليوم الماضى...

الحكايه اليوم راح نسمعها من مين فيكم ..

أنا يا باشمهندس راح أتكلم .. أنت يا عليوه .. أى نعم.. خلاص يارجاله موافقين عليه فى الكلام... أتركه ياباشمهندس يقول أصله عامل فيها أنه فاهم قوى وعارف زين.. خلينا نشوف راح يقول أيه فى حكايته دى...

لحظه يا ولد أبوى كلكم أنا لسه ما خلصتش حكايتى أللى قلتها بالأمس لما قمنا نغطى الخلايا من البرد على النحل..

أنت تانى يا محمد أبو خليفه.. أيوه والله لأننى نسيت بعض الحواديت لما قمنا نغطى النحل...

أكمل كلامى وبعدين أترك عليوه يحكى حكايته معاكم..

نسيت أقول لكم عن كيف تحنكر الخلايا ( ضم النحل على الأقراص الفعليه داخل الخليه حتى لا يتفرق بين الأقراص وحتى يدفى بعضه زين ويدفى الحضنه والزياده من الأقراص نرفعها ونخزنها بالمبخرة ) يعنى يجب أن يكون النحل يغطى الأقراص الفعليه داخل الخليه...

وكمان بنضرب النحل تضريب زين ودى أللى بيقولوا عليها توازن الطوايف يعنى المساواة بين الطوائف .. صح يا بوى ولا أيه..

بناخد حضنه على وشك الفقس من الطوايف القويه ونعطيها للضعيفه.. ونسيت أقول لكم أننا بنربى ونغير الملكات مرتين فى السنه والملكه ما تقعد عندنا أكثر من سنتين أبدا واصل عشان نريد شبابها بس.. وأقول لكم كيف الكلام ده..

نربى ونغير الملكات مع بداية موسم النشاط فى الربيع وتكون حوالى 50 % من أجمالى الطوايف والباقى نغيره فى شهر أغسطس وأوائل سبتمبر بالكتير خالص وبكده يلف الدور على الملكه وتتغير بنفس الميعاد يعنى تكون قضت سنه كامله فى الخليه والملكات أللى بنربيها فى أغسطس يتنفع ليه يا بوى.. أقول لكم أهه

طبعا بعد الخروج من موسم الفيض بنجاح بعض الملكات تريح عن وضع البيض شويه يعنى تتوقف عن البيض.. وتكون الملكات الجديده دى نشيطه فى البيض نأخد منها الحضنه ونرضع بيها للطوايف أللى توقفت عن البيض حتى تستعيد نشاطها مرة تانى صح ولا أيه.. وهذه الملكات هى أللى بنقسم منها بدرى قوى يعنى تقسيم مبكرمنها.. وغير أكده بنحتفظ بنويات دايما صغيره داخل المنحل حتى تعوض معنا عمليات الضم للطوايف الضعيفه وكمان كل واحد فينا محتفظ ضمن طوايف بطوايف بيها ملكات نقيه للتربيه منها ولتغيير دم النحل حتى لا تتأخر السلاله عندنا أبدا ويكون دايما الهجين الأول موجود من السلاله النقيه دى أهم شىء تعرفوها قوى لازم ولابد من وجود أى منحل على الأقل 3 :5 طوايف بيها ملكات نقيه حتى تربى منها الملكات أللى أنت عايزها.. كل ده الكلام كنت ناسيه كيف وده المهم مش حكاية أللى قاعدين على النت يتفرجوا على المواقع اللى أنتم عارفينها..؟؟

وإشى يقولوا دردشه عليها وكل الناس بيكدبوا فيها وبيقولوا بنتجمل بالكدب وهم كدابين قوى وكل واحد وكل واحده ليها طلبات شكل تانى... كلام كتير عميحصل والله ما أقدر ألفظه ولا أقول عليه عيب خالص خالص.. والله كنها هى الحرب صح.. وأصحابها هم نفسهم رؤوس سهام مسممه وموجهة للشباب اللى ما يعرفوا حاجه واصل وتاركين نفسهم للهوى والشيطان بتاعهم... الله يهديهم ويصلح حالهم يارب ما هم يا خوى برضه أولادنا كلهم... والله زعلان عليهم وعلى القعده دى بتاعتهم اللى على الفاضى أمام النت ده... يا بوى قلت لك خلص كلامك ده وخلينا فى المفيد يا ولد أبوى.. قوم من اهنه خالص وسيب غيرك يتكلم .. يا جماعه أتركوه يقول..؟؟؟ له له له واصل... اتكلم أنت يا عليوه وقول وخلص فى الكلام خليه يسكت خالص ويحط لسانه جو خشمه..

أهه سكت خالص وقول أنت يا عليوه أيه حكايتك أنت مع النحل

يا بوى اليوم خلص وأحنا أحسن شىء لينا اليوم وأحنا قاعدين فاضيين نعمل فيها شىء يفيدنا نشوف أللى عنده خلايا محتاجه أصلاح ولا أطارات ولا أى شىء يعملها ولا يدهن الخلايا بعد أصلاحها ويبقى يوم تانى نكمل حواديتنا دى...

كلامك جميل يا عليوه وشد حيلك وقواك الله وربنا معاكم كلكم

والله متشكرين يا باشمهندس على وجودك دايما معانا تغنيننا بحكاويك عن النحل وتفيدنا خالص..

لكن صح يا باشمهندس سامعين أنه راح تعمل أختبار تانى للنحالين غير أللى عامله وقايل فيه أختبر معلوماتك..

نعم إن شاء الله تعالى وكلكم راح تعرفوه... أحنا كلنا حلينا الأختبارده بصح وعرفناه قوى وفادنا كمان قوى فى حواديت النحل خالص...

والله يا بوى الكلام كتير قوى عن النحل ومحتاج الكتير من القعدات نحكى فيها حكاوينا المفيده دى ونستفيد من بعضينا لما كل واحد فينا يحكى حكايه فيها فايده للكل... وكمان غيرنا يستفيد منها خالص... والأيام جايه والحكاوى ما راح تخلص أبدا عن النحل.. 

وفى نفس المكان حضرت للأخوة النحالين فى أماكن تجمعهم

السلام عليكم ورحمة الله وبركاته..

أهلين بالباشمهندس .. حمد لله على سلامتك وحضورك اليوم معنا

كيف حالكم يا رجاله... والله خير..عاملين ايه مع النحل.. نحمد الله

مين فيكم راح يكمل حكايتنا اليوم فى سهرايتنا دى.. أنا يا باشمهندس راح أقول معاكم.. حتى تشوف وتعرف كد أيه أتعلمنا من حكاويك دى وكد أيه أستفدنا منها والله.. أنت يا ابوحمدان ..نعم

أأأأأأأه يارجاله موافقين على كلامه ولا يكمل صاحبكم إياه... له ..له..له ..خليه يكمل هو ..خلينا نترك الرغاى والمتفلسف ده أبن الفر..؟؟..قول يا أخوى الحكايه بس تكون زينه مثلك ونستفيد كلنا منها.. أى أأأهه.. جايلك بالكلام..

طبعا اليوم 25 من يناير أللى بيقولو عليه كانون مدرى أيه الثانى وكنت أفتكره الكانون بتاعنا أللى بنسوى عليه الشاى ونضع فيه الحطب والخشب.. طلع أسم الجلع ليناير.. ما علينا منه.. اليوم أصبح متسع وكل يوم يزيد أتساع ويطول والشمس دافيه زين والنحل سارح غالبية اليوم وحوالينا الفول المزهر البدرى المزروع مبكر حتى أصبح فيه فول للأكل..صح قوم يا أبو عليوه أجمع شوية فول أخضر من جارك خلينا ناكلهم ولا أقول لكم أنا جايب عيش مخبوز طازه طالع من الفرن على طول ومعاى جبن قريش وكمان جبن حادق (قديم ) وكمان لفت مخلل من البيت.. ناكل كلنا مع بعض.. قوم بسرعة وهات كمان معاك بصل أخضرمع الفول وعندك والله حلبه خضره هات شويه كمان وخليها قعدة بالمرة خلى الحكايه تكون زينه... يا بوى أحكى على ما يجيب الفول وغيره..

نرجع لكلامنا الأولانى.. وصلنا لحد فين.. أى بس.. النحل سارح والجو زين والشمس طالعه والنهار وسع وكل يوم يزيد وسع.. عارفين يعنى أيه معناه.. قول.. طبعا النحل معروف أرقام زى ما قال الباشمهندس..

غالبيتنا جاب الأقراص ذات العيون السداسيه الواسعه (16 عين سداسيه فى البوصه ) الخاصه لتربية حضنة الذكور ووضعناها فى الطوايف حتى تبيض فيها الملكات ويخرج أول جيل من الذكوربعد 24 يوم يعنى على يوم 19 فبرايرتكون الذكور خرجت وساعتها نبدأء فى تربية الملكات.. قولو ليه.. ليه يا بوى.. أيوه كده..

راح أقولكم.. الذكور تبلغ يعنى تنضج جنسيا يعنى تقدر تلقح الملكات وتخصبها بعد عمر تقريبا 12 يوم قول يعنى بعد أسبوعين من خروجها حشرة كامله.. تكون فى نفس اللحظه الملكات خرجت من البيوت الملكيه وتكون الذكور مستنياها وجاهزة للتلقيح بصح..

يعنى نكون دخلنا وبقينا فى أوائل شهر مارس ..يعنى كل الطوايف سارت قويه ونقدر نقسم براحتنا ونغير الملكات المسنه والغير مرغوب فيها كمان.. أعرفتو كيف الحكايه أرقام وحساب.. مش وبس نخلبط خلبيط.. ونحمد الله يكون غالبية المحاصيل بقى فيها زهر والحقول مفتوحه للسروح وأتسع اليوم بزيادة.. والحمد لله حوالينا السنه دى الفول والكمون والأيسون والكراويه والبرسيم كتيرمزروع كمان.. شوف النحل محمل أيه وأنتم قاعدين بص وشوفو حبوب لقاح من الفول والحندقوق.. صح ولا له.. صدقت والله فى كلامك.. وكان غير كل ده ..ما زلنا نغذى النحل وما قصرنا فى حقه واصل وحاليا غالبية الطوايف.. النحل يغطى فيها لغاية تسعة أقراص ... أصل أحنا ع نسرق النحل سرقه.. له ما أقصد السرقه المعروفه.. أقصد نوضع الأقراص بالتدريج لحاجة الطوايف لتوسيع عش الحضنه.. شويه شوى حسب أحتياج الطايفه وقوتها.. صح يا بوى.. ولا تنسوا عمليات التغذيه وخاصه قبل التقسيم وبعد التقسيم وخاصه النويات الجديده.. وكمان الطوايف أللى راح نسخرها لأخذ الغذاء الملكى منها وأللى راح نجمعه منها

لابد من توالى التغذيه وتقوية الطوايف قوى يا بوى اما بوضع أقراص حضنه على وشك الفقس أو بهز أقراص عليها نحل صغير السن.. وده من الخلايا القويه.. حتى نضمن التربيه والتقسيم زين وده للخلايا المنتخبه أللى أحنا كل واحد عارفها ... الوكل جاهز يا بوى.. خلينا ناكل الأول جعنا يا بوى والوكله دى تفتح النفس.. فول وبصل أخضر وحلبه كمان خضرة وجبن قريش وجبن حادق ومعاه المش وكمان اللفت المخلل وعيش مخبوز طازه جاى من الفرن طوالى.. والحكاوى مش راح تخلص عن النحل واصل..

خلينا ليوم تانى... الأيام جايه كتير والحكاوى كتير عن النحل

والبركه فى الباشمهندس وقعدته معانا... أتفضلوا الأكل.

إلى باقى السهرايه منتظركم أخوانى النحالين فى حكايه جديده...