عيون بورسعيد || حادث ‫#‏سطو‬ مسلح ‫#‏لمحطة‬ غاز يتسبب في تشريد ‫#‏اكثر‬ من اسرة ‫#‏بورسعيدية‬ ‫#‏ومواطن‬ الي كل من ‫#‏يهمه‬ الامر او ‫#‏مسئول‬ " انا لما ‫#‏اتظلم‬ في بلدي مين ‫#‏يحميني‬ ويجيبلي ‫#‏حقي‬ "

رانيا السادات
رابطة صفحات ومواقع بورسعيد"عيون بورسعيد"

" هل احنا نستحق كل البهدلة دي فصل واهانة وسب طيب احنا لم يثبت علينا اي ادانة لاننا اصلا مسرقناش وكان فيه فيديو وقت السطو المشلح بيثبت كل اللي بنقوله , انا الوقت انسان مظلوم من يحمي حقي ومن يحمي بيتي اللي اتخرب وولادي اللي مش عارف اكلهم ولا اعلمهم مين هيقبلنا نشتغل تاني عندهم حتي باليومية واحنا خارجين من شغلنا مفصولين بتهمة سرقة رغم ان مفيش اي شئ علينا يديننا مين هيرضي يشغلنا مين هيدفعلنا اقساطنا وايجار شققنا لما المصيبة وقعت علي دماغنا انا مين المسئول عني وعن ظلمي في دولتي لما يقع عليا ظلم "

بتلك الكلمات التي انهي بها المواطن البورسعيدي عزام سعيد شكوته الذي ارسلها لنا لننشرها ربما يصل صوته الي اي مسئول يهمه الامر يساعده علي ايجاد حل لمشكلته , ومن نهاية تلك الكلمات بدانا بها في نشر شكواه المصحوبة بصور ضوئية تفيد فصله هو وعدد من العاملين في محطة غاز تابعة لاحد شركات البترول مما تسبب الامر في تشريد اكثر من اسرة بورسعيدية ذهب عائدهم المادي اللذين يعيشون عليه بين ليلة وضحاها ودون سابق انذار

من جانبه بدأ المواطن شكواه " انا اسمى عزام سعيد فى يوم1/10/2014 بعمل في الوردية الليلية لمحكة غازتك ببورسعيد واللي بتكون من الساعة 12الى8, ومعايا زملائى محمد ممدوح رئيس وردية واحمد جابر وسعيد محسن مشغلين اجهزة في "

واوضح عزام " فى اليوم ده كان برد جامد جدا استلمنا الشغل من12الى4 لحد مابدء الشغل يهدا خالص وانتهي شغل شحن السيارات "

واضاف " انا زى اى وردية ما بتعمل بروح اجيب العشاء والكلام دا على مدار ال4سنوات اللى انا اشتغلت فيهم وكل ورديه بتعمل كده ولكن ببلغ رئيس الورديه ومشرف المحطه وكذلك مدير المحطه ومشرف المحطه بيبقوا عارفين ان احنا بنطبع زي كل يوم بنجيب عشا , وبعد ما جبت العشاء والجو طبعا برد جدا دخلنا نتعشا سوا وكل الورادى الليليه بتعمل كده من يوم ما دخلت الشركه "

وواصل عزام " بعد ما اتعشينا سوا انا قمت بالتنظيف انا وسعيد بعد العشاء واخذنا الحاجه فى الحمام وغسلنا الحاجه ورجعنا المكتب تانى ومحمد ممدوح كان بيعمل حاجة سخنه نشربها واول مااعدنا نشرب سوا مافيش دقيقتين ومافيش حد بره من بشر خالص من البرد دخلوا علينا 2ملسحين فجأة واحد معاه فرد خرطوش والتانى مطواه غزال مليانه صداء وطلبوا مننا الفلوس تحت التهديد ولما رفضنا كانوا هايضربونا بالنار وفضلنا نعطلوا شويه هددنا تانى وكان هيضرب تانى ادنالو الفلوس اللى معانا طلب تانى نفتح الخزنه عملنا احنا بندور عليه علي ما عربيه تدخل ويجروا مافيش طبعا عربية دخلت فهددنا مره تانيه وكان احمد جابر قريب من فرد الخرطوش في دماغه قولنا له مافيهاش الا فلوس فضه فقط ,

فقالنا افتحوها فخلصت مننا كل الحيل واضطرينا نفتحها علشان محدش يموت فينا اللى معاه مطواه دخل علينا والتاني واقف بالسلاح متابعنا علشان مانهجمش عليهم رغم اننا عندنا تعليمات اننا منقاومش اى سطو مهما كان حفاظا علي ارواحنا ,الشخص اللي كان ماسك مطواه دخل شاف الفضه فعلا وقال لزميله مافيش الا فضه قاله هاتها وهو بياخدها لمح الفلوس الورق وخدها وبعدها جروا في ثوانى "

واستمر عزام يروي ما حدث في تلك الليلة فقال " لما طلعوا بره طلعنا وراهم شوفناهم وهما بيركبوا فسبا حمرا من غير نمره رجعنا جري المكتب تانى علشان اجيب مفتاح العربيه وجريت وراهم انا واحمد جابر وسعيد محسن وقاعدنا نلف وراهم فص ملح وداب محمد ممدوح فضل فى المحطه واتصل بينا عملتوا ايه ايه قولناله بندور قلنا ارجعوا ورجعنا وقالى روح هات مشرف المحطه من على الشارع ماكنش في موصلات ابدا رحت جبته وحاكتله الموقف ورحنا المحطه وبلغنا مدير المنطقه وقسم المناخ وحضروا ال2شافوا المنظر اللى احنا فيه وطلبوا مننا نذهب الى القسم لعمل محضر ورجعنا تانى المحطه وبعد

الساعه8روحنا القسم تانى وفضلنا قاعدين وكل شويه واحد يدخل للظابط وفضلنا على كده لغايه الساعه 1 صباحا وكان المدير بيجى يقول لنا كل شويه هاتروحوا "

واضاف " لحد لما اجت الساعه1 وقلنا معلش هاتباتوا لبكرة وهاتمشوا من النيابه اتصلنا باخواتنا علشان ما نبتش فى الحجز وروحنا تانى يوم بعتولنا فى القسم علشان يحققوا معانا تانى وفضلنا على كده 15يوم نروح القسم الساعه9 ونمشى الساعه 12و1 بليل وتهزيق وقله ادب كل يوم بالام والاب ومش عايز افصر اكتر من كده اسوء معاملة اتعاملناها " علي حد قوله

وواصل , " بعد الايام دى ودونا النيابه واتحقق معنا وروحنا بعدها القسم تاني علشان نعمل فيش وروحنا وبعدها بيومين روحنا الشغل تانى واشتغلنا والشركه رجعت تحقق معانا تانى فى المحطه وفي يوم 14 /5/2015جالى تليفون الساعه 8صباحا من زملائى اننا اتفصلنا اتفزعت ورحت جرى على المحطه وفعلا طلع الخبر صحيح واتجمعنا فى المحطه احنا ال4 وبعدها روحنا القاهره علشان نقدم الالتماس فى مقر الشركه وماكانوش عايزينا يدخلونا بس دخلنا وكتبناه وقالوا لنا هانرد عليكم لغايه دلوقتى لسه ماردوش "
واكمل " روحنا الشركه القابضه والقوى العامله والنيابه الاداريه والرقابه الإدارية ومافيش رد والشركه دى اتسرقت قبل كدة 4مرات وماعملوش مع اللى اتسرقوا حاجه خالص وقبل الحادثه دى بأيام مدير المحطه بلغ مشرف المحطه انه ماينزلش ياخد الفلوس زى كل يوم وهو ده الموضوع "

وانهي عزام " هل احنا نستحق كل البهدلة دي فصل واهانة وسب طيب احنا لم يثبت علينا ادانة لاننا اصلا مسرقناش وكان فيه فيديو وقت السطو المشلح بيثبت كل اللي بقوله , انا الوقت انسان مظلوم من يحمي حقي ومن يحمي بيتي اللي اتخرب وولادي اللي مش عارف اكلهم ولا اعلمهم مين هيقبلنا نشتغل تاني عندهم حتي باليومية واحنا خارجين من شغلنا مفصولين بتهمة سرقة رغم ان مفيش اي شئ علينا يديننا مين هيرضي يشغلنا مين هيدفعلنا اقساطنا وايجار شققنا لما المصيبة وقعت علي دماغنا انا مين المسئول عني وعن ظلمي في دولتي لما يقع عليا ظلم "

تنويه هام : مايتم نشره من شكاوي ومشكلات او حالات انسانية ترسل لنا عبر الموقع او الايميلات الخاصة بنا بيتم التاكد من المستندات الخاصة بها قبل نشرها , وانهم من ابناء محافظة بورسعيد وليس من خارجها حيث اننا لا نهتم كجهة نشرالا بمايخص الشأن المحلي والاقليمي للمحافظة وابنائها, فضلا انه يتم النشر بناء علي موافقة مسبقة من المواطن ورغبته الكامله في النشردون اي تدخل منا او سابق معرفة .

الصورة الخاصة بالبنزينة ‫#‏ارشيفية‬

التغطية لعيون بورسعيد بالتعاون مع الشبكة الاعلامية رابطة عيون بورسعيد " صفحات ومواقع وجروبات " ومواقع جريدة عيون بورسعيد جريدة جيل الثوره بورسعيد ارض الفداء بورسعيد الباسلة