لو كنت ناوي ع البعاد 
ابعد خلاص انا قلبي مل 
واوعا تفكر ان اللي فات 
هيخلي فيا نار وذل 
افهم وفوق
انا مش هضيع
انا جوه مني الف حل 
وان كان علي الحب اللي كان
والعشق اللي عشقته زمان 
ضيعته انت بقسوتك 
نسيتني ايه طعم الامان
كنت بقول 
ان انت كل الدنيا ديا
كنت ام اخاف 
بجري استخبي بين ايديك
كنت بقول 
ان انت عندي نور عنيا
كنت بابيع الدنيا كلها واشتريك
كان عندي احلام وانتهت
كان لونها وردي واللون بهت
كنت بطير فوق برج عالي
واتهد فجأة وما ثبت 
واتضحلي انه مفيش
في حبك انت غير كلام
ما الحب اصله لا بالفلوس 
ولا بالقصور
ولا حتي نظرة وابتسام 
اتضحلي انك كابوس 
جالي كام مره في منام
وان حبك كله كله 
كله أوهام بالتمام
بس نفسي اعرف حاجات
نفسي اعرف ليه كدا 
وليه مهمكش اللي مات
جوه قلبي م الحب دا
طب كنت قولي عاوز ايه
وايه اللي بدور عليه 
ولا انت غاوي تجرح في فلبي
وتسيبه ينزف م اللي فيه 
وانا من زمان 
وانا عندي احساس
ان انت متغير معايا
وكنت بقول شوية ظروف
وترجع ما بينا الحكاية
بس عرفت انه خلاص
هي دي بداية النهاية
ولعلمك انت خسرتني 
لا تفكر انك بعتني 
وهيجي يوم وتشوفني فيه
وهتندم انك سيبتني
وانا مش هانوح 
ولا هقعد ابكي ع اللي راح 
واوعا تفكر تيجي يوم 
وتقول سماح 
وكفاية اني خلاص لقيت 
في البعد عنك الكون براح
ما القلب مل من الوجع
ومن الخداع ومن السماح 
وانا هنسا وابدأ من جديد
انا قلبي اقوي م الحديد
وان جه في يوم انا وافتكرت
عيشتي معاك 
هدعي لربي واحمده انك بعيد
وعادي يعني ما الحياة 
ضحكة ودمعة 
دا حتي في الافراح 
بتبقي عيونا لامعة 
بنقيد شموع ونطفي شموع 
ولازم هتمشي الدنيا بينا
لو حتي لو مفضلش لينا
غير بس شمعة
ومهما هسمع م الكلام 
او م الملام 
هعمل انا مش من هنا 
لو حتي كل الدنيا سامعه
لو حتي كل الدنيا سامعة