عندى فضول اسأل واقول
ليه فينا ناس نسيوا الأصول
وليه عماد يظلم سعاد
فى الخطبه فيه حب ووداد
بعد الجواز ليه يصبح غول
للمفترى آسفين سرى
لو نلقى الطيب نفترى
بقى دا كلام يدخل عقول
فوسط الزحمه معادش رحمه
ليل ونهار بناكل لحمه
وجارنا نفسو فحبة فول
وبالأماره ليه سماره
يشرب ف اليوم ميت سيجاره
والبيت مفهش رغيف مبلول
بكام يدوب يتعاطى حبوب
يصبح على أمرو مغلوب 
يرقد ونقول محتاج محلول
ويا أهل الدين ليه نستدين
وفى السداد محناش جادين
ييجى المعاد نهرب على طول
متجوز عالمه وملهوش كلمه
تشخط فيه ينهى المكالمه
يصبح قدام الناس دلدول
إيه كدرك .. إيه غيرك
فيه إيه كمان ومحيرك 
إتفضل اسأل كدا على طول
عندى فضول اسأل واقول 
ليه فينا ناس نسيوا الأصول