بصبح على أهلى وأهل بلدى 
وجيرانى حبايبى الحلوين 
واقعد وياهم آخد وادى 
عشرة عمر ياناس وسنين
قلوب بتحب وطيبه
كحك بسكر وغريبه
ناس كالناس عندها إحساس
وجمايل تنشال ع الراس
ونفوس صافيه وبريئه 
تلقاها وياك وقت الضيقه
فى الزنقه بيقفوا رجاله
ويمدوا إديهم فى عجاله 
فى الفرحه يجولك ويشاركوا 
يفرحوا على فرحك ويباركوا 
مهما تجيبهم وتوديهم 
بردو الجيران لبعضيهم
ييجوا يصالحوك لو زعلوك
لو شيئ يخصك مايسألوك
لو ساعه ببعد عنهم
أرجع وادفى فحضنهم
حلوين يا جيرانى وبحبكم 
ولا بقدر اعيش إلا بكم