وحدانى
هوصفلك فين مكانى 
على شمال الزمن عنوانى
إسأل عنى تلاقينى هناك 
متغبش عليا .. هستناك
هاتلى معاك قرطاس أمل 
وهات كمان حبة إحساس
متقلش جايز ولا محتمل 
نسيت خلاص كلام الناس
وحود على بتاع السعاده 
هاتلى جرام وللا اتنين
لو لقيتو قافل كالعاده
إسأل عنو شوفو فين 
عالم بيدور حواليه 
داير بيلف ليل ونهار
لو عندك نصيحه بقى ليه 
عقلى من النصايح طار
هات كمان حبة نكت 
وكلام يضحك وحكايات 
ودانى من الصمت اشتكت 
والإحساس جوايا مات
خبط متسألش الجيران 
هيقولولك منعرفوش 
إحنا ساكنين من زمان
وبصراحه مشوفناهوش
إوصفلهم شكلى وملامحى
يمكن وجايز يعرفونى
قولهم أنا لونى قمحى 
يحتمل فى يوم شافونى 
قول ياهادى وللا نادى
يمكن اسمع وللا اجمع
لو مردتش السنادى 
السنه اللى جايه إرجع