انا التايه بلف ودور في مكاني
انا العايش ومتخبي في اكفاني
انا النوراللي ف عينيك ووضاني
بماء طهري وماء ذنبي واحساني
********
انا المذنب وانا التايب وانا الجاني
انا الشمس وتشحت نور لزماني
وانا الميت وانتي لِسَّه عايشاني
انا التايه بلف ودور في مكاني
********
انا التايه وتوهتي مني واخداني
وعايش في نعيم نارك وكاوياني
وانا الحزن اللي ماليني ف أركاني
انا انت ولحظه بين ظني وإيماني
********
انا ابكم وأصم وانت لِسَّه سمعاني
انا اخرس في دنيا كلام علي لساني
وانا يوسف وانا المسجون وسجاني
وانا التايه بلف ودور في مكاني
********
وانا الشعر اللي خلدني وافناني
وانا الغرقان في بحورك وشداني
وانا الطايش انا الايد اللي مانعاني
وانا اللي بسافر ف عينيك واعود تاني
********
انا الفكر اللي ما نسيته و ينساني
وانا الجرح اللي داويته وادماني
يا ليل ونهار وجنه عمري ونيراني
انا الماضي ولو ننساه يعود تاني