ياه ع الوجع
إخص عليك
يادى الجدع
فعلا خلاص
إحنا بقينا
فى زمن البدع
والله عليكى ياخالة
حالك ولا أجدع رجالة
ياسلام على وشك الصامد
وقلبك الجامد
ونظرك البعيد
وجه جاى
من قلب الصعيد
صلب..زى الحديد
بيتحدى الزمن
شايل على كتفه عمره
والسنين
علشان كده شايفه
دايما حزين
خلى ياخالة
فى ودنك الحلق
و..وحياة اللى خلق
إوعى تنحنى للزمن
خليكى كده
زى ما انتى
لابسة توب العفاف
ولقمتك..
شعرة ملح
ورغيف حاف
وغطاكى بطانية قديمة
وحتة لحاف
إوعى ياخالة تبيعى الحلق
ومهما جار الزمن
ﻷن الحلق آخرته
إنه..تمن الكفن
***************
هذه القصيدة تعليقا على قصيدة الأستاذة الشاعرة زينات القليوبى"البيت الجديد..دار المسنين"وقد كتبتها فى 2/12/2015