صباحنا قشطه وجبنه قريش 
وفول بالشطه وشقة عيش
وعصير لمونه ويا طحينه
ع الصبح صحصح صحينا 
حط كمان حبة زيت حار
ودش بصله تشعلل نار
قرصين طعميه بالسمسم 
شمر ياعم بقى وقسم
وطبق مخلل وعودين خس
نفطر بقى وعمرنا منخس
قومى ياحنين واقلى بيضتين
خلى الفطار دا يبقى متين
ننزل لجوده واد عم بشاى
نشرب معاه كباية شاى
شد الكراسى نقعد ف الشمس
مقعدناهاش من أول أمس
ونادى ياواد عمك صالح
طول عمرو بيقضى مصالح
عاوز آخد رأيك يابو سالم 
بصفتك فينا راجل عالم
ليه بنحس بألم الضهر
لما نقوم م النوم ع الضهر