تلف تدور عليك الدور
يابو قلب ابيض كما البنور
تعدى بحور وتبنى جسور
خلاص انتا عليك الدور
عليك الدور ياواد ياسمر 
تقف ع الأرض متسمر
ومتشمر .. وبتعمر
دراعك للعدو يدمر
ولا يحوشك جبل أو سور
عليك الدور
عليك الدور فى الجهاديه 
فدائى متربى على إديه
وطنى ومخلص النيه
جندى مصرى أسد وجسور
عليك الدور 
عليك الدور متستنى
حقق لها ما تتمنى
حول لها الصحارى جنه
خلى الحياه هنا وسرور
عليك الدور
عليك الدور ومتخافشى
متقولشى فيوم مبعرفشى
دى زقه واحده راح تمشى
حبة وتلقاها تجرى تدور
عليك الدور
عليك الدور تكون سوبر
وتكرر نصر أكتوبر
وتقول لو حد بيهوبر
أنا المصرى أنا المنصور
عليك الدور
عليك الدور تكملها
على اكتافك وتحملها 
ولا ييجى يوم وتهملها
ضميرك يخنقك م الزور
عليك الدور