جارى التحميل
استخدم زر ESC أو رجوع للعودة
كثير بنزعل من ناس بعدت ليه بعدت او احنا كنا وحشين ؟
حتى الحيوانات عندها ثقافة الابتعاد زى الفيل لما بيروح المقبرة لو حس بقرب موته فيبعد عن القطيع و يموت فى هدؤ
اما البشر فالابتعاد له اوجه كثيرة .................
عمرك شفت مدمن و هو بيتعالج من الادمان ازاى لازم يبعد و ينعزل عن الحياة علشان يسحب المخدر من جسمه و هل يا ترى هنتحمل نوبات الانسحاب
اكيد لا ممكن ما يكونش عندنا قوة نتحمل المشهد ده
لكن المدمن ده ...........
" عنده ارادة عايز يخف "
عمرك شفت واحد كان ضيف عند انسان كريم جدا لدرجة ان الضيف من شدة كرمه قرر يمشى و يسيب لصاحب البيت رسالة شكر على شدة كرمه لانه مش قادر يتحمل جمايله اكثر من كده ................
" ده انسان بيحس " .
عمرك شفت انسان عنده هموم كثيرة و مش قادر يكلم لانه شايف ان كل انسان فيه اللى مكفيه و مش ناقصاه هو كمان ................
" ده عنده عزة نفس "
عمرك شفت انسان عنده مشكله متعلقه بحد قريب ليه و كل ما حد يساله عن حزنه يكذب لانه مش عايز يكلم و تعب من الكذب فقرر يبعد ..............
" ده انسان صادق وامين "
عمرك شفت مريض الكيماوى غير شكله فقرر يبعد علشان يحافظ على صورته الجميله القديمة فى عنين الناس .............
"ده انسان جميل فعلا "
عمرك شفت انسان حس انه اذنب كثير فقرر يبعد و يعاقب نفسه و يزلها و يجلدها علشان يعيد تربيتها و تهذيبها .............
" ده انسان جواه ايمان و توبة صادقه "
عمرك شفت انسان زى لوح الزجاج اقل حاجة بتشرخه و بعد كده تفاجئ انه وقع وانهار من كثرة الشروخ فيه ...............
" ده انسان رقيق "
المشكلة مش فى الابتعاد المشكلة فى تلقى الناس للفكره فهى ممكن تتفهم انها تعالى او جحود او فقدان للمحبة او نكران جميل لان الحقيقة كامنه داخلنا لا يعلمها الا الله و ربما يكون جلد المبتعد لنفسه اشد من جلد الناس له و جوهر الحقيقة دائما عند الله جل و علا فهو وحده المطلع على قلوب عباده .
بقلم نانى محسن أحمد عبد السلام
