<!--
<!--<!--<!--
بسم الله الرحمن الرحيم
رسالة بلديه لشباب الجموعية
عليكم الله ممكن تقروا الورقات ديل بس عشان مصلحتنا
أخواتي الأفاضل
دعوني أبدأ رسالتي بحمده الذي خلق آدم من تراب وجعل الحكمة في تداول بين الأهل والأتراب وقيل في السلف إن الحكمة ضالة المؤمن أينما وجدها اغتنمها المهم والسؤال الهم
من نحن كجموعيه وأين نحن من بقية القبائل وما هو وضعنا في المجتمع ,وكيف حالنا الأن وماذا نعمل ولماذا. انا أكره جدا الحديث عن العنصرية والقبلية واعتز جدا بقول ود الرضي لمن قال:
(شايقي و جعلي ودنقلاوي اه فايداني *** غير خلقت خلاف خلت اخوي عاداني
خلو نبأنا يسري للبعيد والداني *** يكفي النيل ابونا و الجنس سوداني)
و اعتز جدا بفارس القبيلة محمد سعيد العباسي حين قال:
لو دراء القوم بالسودان أين هم من الشعوب لقضو حزنا و افاقه
لكن صدقوني برغم كل ذلك خليت الفكرة والدفاع عنها يعني شنو؟ يعني قدمت الأولوية وشايفه أن أدعو لتوحيد القبيلة وتعاضد أفرادها مع بعضهم البعض قبل دعوتي لتعاضد المجتمع. يعني ببساطه لأنو الزود عن حياة القبيلة في السودان أصبح اعلى من الزود عن حياة الوطن والدفاع عنه. وانا أقسم بالله ان السودان به 450 قبيلة 449 قبيلة منها تقاتل من أجل حقها وتتكالب على مصالحها وتقوية زاتها بالشد على عضد بعضهم البعض حتى يكونون قوة ضد من يرد الإفتاك بهم والنيل منهم الا قبيىة واحدة سوى كان على الصعيد الاجتماعي او الفكري، الكثير من افرادها لا مبالا لهم في الحياة ولا يحسبون أي حساب لاهم الا شياء من المفترض ان يحسب لها حساب وتوضع موضع التنفيذ, يعني الناس البتلقاهو عندو الف متر وعندو 7 اولاد _هواجه_ ساهي وعدم تفكير بكره يقوم إبيعا ويخلي مستقبل اولادو على الحديدة . لذلك أدعوكم لمساعدتي بنشر هذه الاوراق للمحافظة على كيان هذه القبيلة وقوتها وسط القبائل وأهم الأشاء توعية افرادها بمختلف قضاياهم _خاصة الأراضي_ (الباع ارضو باع عَرضُو) يعني اول القضايا قضية الارض . أيوه الارض . والله العظيم يا أخوانا سألني واحد قال لي: (إنتي من ياتو قبيلة في السودان قلت ليهو : انا بنت الاصيلة عزاز والقبيلة هويه بت الكرم والجود والجنس جموعية....) انا عاوزا اشوف رد فعلو .عارفين قال لي شنو قال لي: ها ديل حرامية سكر وعرب ساهي كل ما الحضارة والمدنية جاتم زحو منها ليغادي والكلمة الأخيرة دي مربط الفرس والموضوع الأصلا عاوزه اتكلم فيهو هل فعلا نحن ذي ما وصفنا . مع العلم بأنه يقصد بذلك القول إننا متخلفين ولا نحسب حساب ليوم باكر_اي المستقبل_ كل همنا أكلة وشربه من غير تفكير في المستقبل _رددت عليه بقول الشاعر : يخاطبني السفيه بكل قبح فأكره أن أكون له مجيبا_ واحد تاني ردا ليهو قال ليهو قطعت جهيزة قول كل خطيب فعلا دي بت ناس البلد دي . المهم في معلومة غائبة لدى كثير من الناس خاصة أبناء الجيل الحالي (وهي انو نحنا أهل البلد دي الخرطوم يعني من غير عنصرية الخرطوم حقت الجموعية )حتى قيل في ذلك الزمان أن العرضة الحالية كان أفراد القبيلة يقيمون فيها حفلات الدلوكة وعرضة الرجال فيها حينما يقمن بضربها الفتيات فكانت آنذاك الأغنية المشهورة(الجنى الولد وسلة السيف عرض إبكر بالولد) فمنذ تلك الفترة سميت بالعرضة. فقال لهم الإمام محمد أحمد المهدي دعونا نسميها بعرضة الجيوش ومعرفة عتاده وعدته ,فبما انو كان الرئيس آنذاك وافقوا على ذلك ,وقيل إن المسافة في الاتجاه الشمالي على حدود الجيلي يسمونها حدود الجموعية شمال , والحدود التي تفصل بين الخرطوم والجزيرة يسمونها حدود الجموعية شرق و على الاتجاه الغربي تكتب على الحجارة حدود منطقة الجموعية في الاتجاه الغربي وهكذا .لكن بما انو هم آل تصوف واصحااب وازع ديني واسع قلًب’ مصلحة الجماعة على مصلحة الافراد كرما منهم فطلبت منهم الحكومات السابقة أيضا رقعة من المساحات لبناء قصر الشباب و الأطفال الحالي ثم مستشفى السلاح الطبي . حتى قيل ان في ذلك الزمان منطقة الملازمين حي الإذاعة الحالي يقال له الساقية الأولى.
قُصر الكلام (كفاية ضاعت مننا الخرطوم وأم درمان كمان)
المهم في الأمر وقصرا للكلام. أعوز بالله من القيل والقال والحديث في المال و اعني بالمال هنا.. الأراضي لأنو ببيعوها وبجيب القروش لكن...لكن قالو الباع ارضو باع عِرضو –سؤال للكبار والصغار– إنتو مسؤولين من الخير كدي كم واحد دقس وباع ارضو يا اخوانا عليكم الله اي واحد باع ارضو إحاول إرجع الباعو انا عارفة دي صعبة لكن حاول رجعا وأبنيها و اجره احسن ليك من تفقده خالص . مايشيلة منك واحد شًفت ويعمرها بتندم عليها والله العظيم. دي حاجة أولى.
الحاجة التانية مافي زول مات من الجوع يعني مهما كانت الاسباب ماتبيعو عرضكم . في مثل صيني بقول ليكم ..لو عايز تشتري سمكة أحسن تشتري سنارة لأنو السنارة راس مال يعني كل يوم ممكن تجيب سمك لكن مامكن تقدر كل يوم تشتري سمك لإنو يمكن يوم مايكون عندك قروش . يعني شنو يعني ما إجي زول سمسار إقولك .... أ زول ..ها .. والله دي بتجيب ليك 15 مليون .. لكن انا بقولك لا... اوع تدقس.... لو بعتها بتكون حسره وما بتنفعك بشي ال15 مليون بتروح شمار في مرقة. صدقني
لكن لو فكرتا بصوت عالي ممكن تحوشا وتزرعا بكل أنواع الخضروات_إن شاء الله برسيم_ او تخليها لأولادك والمستقبل ما معروف عشان ما يضيعو وإقولو ضيعنا أبونا وباع وطاطنا _بالبلدي كدي_ أوع تقول عرس البت قرب وما عندي حاجة أكفي العرض، كلَمتك. دي أغلى نصيحة أوع تبيع مهما كانت الأسباب , استحلفكم بالله ياآبائي وأخواني . لا لسفر. لا لعرس . لا لأي شي لأن الله قال " وفي السماء رزقكم وما توعدون" .
ياآخوانا عشان ما إنطبق علينا كلام الراجل السألني قبيل أبقو عشرة على وصتي دي لأنو بلدنا مستقبلاً حلوة ودخلو علينا كتير من الأغراب طمعا فيها لأنو إنتو مساكين والله انا بكيت بللت الورق بدموعي حزناً على الغفلة الي إحنا فيها.
كلامي هذا لكل اخوتي وآبائي من الصالجة لحدي حدود الجموعية جنوب في أبوحليفي والمنتزه وغيرها من المناطق. هذا بالنسبة للأراضي داخل الأحياء وخارج الأحياء كمان.
اما الموضوع الثاني في نفس الموضوع ! أراضي المطار . أستنهض ُهمتكم يارجال خاصة إنتو أفراد الأمن والمخابرات لأنكم الاغلبية الغالبه بالتعاون مع طبقة المستنيرين والمثقفين من الجامعات والمعاهد وربات البيوت . لأي فرد لازم تُسلم الأراضي قبل الانتخابات رجاءً. رجاءً كونوا يدً واحدة حتى لا تفشلو وتذهب ريحكم الستم خير من ركب المطايا واندى العالمين بطون راحي؟
ما عايزين ينطبق علينا المثل البقول سيدو البدوهو في ايدو....قبييل بعدنا عن العاصمة ،لو ما حافظنا علي ارضنا حنطلع من الريف ونمشي شمال كردفان بفعل فاعل ..لذلك احذروا واجتهدوا للمحافظة عليها......ودمتم
بقلم: بنت الجموعية (محاسن الزين)
ت/0992024717
