غلطـــــة

ياما ديابة في الضلمة بتعوي

                                 لما نجومنا تبطل تضوي

ياما نباح بيزيد وبيدوي

                             خلي جراح في القلب بتشوي

ياما رضينا نعيش مجاريح

                                لما بقينا في قلب الريح

ليه دلوقتي ياصاحبي تصيح؟!

                                    ماهي دنيتنا بفت بتاريخ

وانا من صغري دايما دغري

                                 مهما الدنيا في ثانية بتغري

مهما الشوق جواية بيسري

                                   بس مسيرها هترجع تهدي

تصحن قلبي في قلب الهون

                                    تجرح فيه وانا المطحون

وارجع اتوه في بلاد الكون

                                     وابقي العقل وانا المجنون

نفسي اقول الكلمه بجد

                                      قبل ما اواجه تاني المد

قبل ما روحي معاك تنشد

                                       وألقي جدار الدار ينهد

خلي غراب البين يتكلم

                                مانا مضطر يا صاحبي اسلم

وارخي ستار القول وابلم

                           واهي غلطه ويمكن ....اتعلم!!