هى دى الديمقراطية الأمريكانى
اللى كتبولها وغنولها الأغانى
هى دى الحرية والعيشة الهنية
اللى وعدوكم بها أول وتانى ؟1
****
هى دى ديمقراطية بوش صديقكم
اللى بيهندس لكم خارطة طريقكم
ياما نفسى أقولها لكن هتضايقكم
جملة مكسوف إنى أنطقها بلسانى !
****
اللى عملوه ويا أسراكم عاجبكم ؟
سجن ابو غريب لو سألتوه هيجاوبكم
والحقايق واضحة خالص بس عيبكم
إنكم بتألهوا فلان الفلانى !
****
اغتصاب الماجدات ، قهر النشامى
جيل بحاله جىّ كله من اليتامى
فوقوا وما تبقوش فى حاناتهم ندامى
يحكى عنكم لو يعود الأصفهانى !
****
المساجد والمزارات دنسوها
والطبيعة نهبوا خيرها ولوثوها
والحضارة العبقرية دمروها
وانتو نازلين قزقزة لب وسودانى !
****
العراق عمره ما كان أبدا تكية
أو وسية للعصابة الأمريكية
ازحفوا لو كان لكم فعلا قضية
واطردوا كلاب المارينز بلا توانى !
****
الوطن بينادى لبوا نداه جماعة
مش ناقصكم غير يا دوب حبة شجاعة
احفضوها ورددوها عن قناعة
الوطن هو اللى باقى وكله فانى !
مايو 2006 م
