<!--<!--
تسلموا يا شباب ا(لفيس بوك)
مبقاش حد خلاص بيشك
إن خلاص مصر على إيديكم
وبقالها معاكم (نيو لوك) !
****
تسلموا وتعيشوا يا حبايبنا
مبقاش حاجة خلاص ترعبنا
ولا تتعبنا عشان كان عيبنا
إننا بنفضفض ونلك!
****
كنا بنتهان وماثرناشى
وكأننا - لا مؤاخذة - مواشى
ولا أغوات الحكم الفاشى
مننا سمعوا كلمة ( يوك ) !
****
احنا اللى طاطينا فركبونا
بعد ما بجزهم ضربونا
وقالولنا عيب إن ابونا
مهما غلط فى نزاهته نشك!
****
استسلمنا لفكر لصوصى
قال لها توهى يا مصر ولوصى
البلطجى طيارته خصوصى
واحنا بنحلم بالتوك توك !
****
هُنّا عليهم بعد ما هُنّا
على نفسنا ونفد مخزونّا !
اتجرعنا المُرّ ، وكُنّا
دايما ع المطلوب بنسُك !
****
والمطلوب كان هو الثورة
وتحدّينا لأى مناورة
علشان نكشف مليون عورة
لنظام عمال فينا يدُك !
****
لنظام خلانا نعيش حالة
وكأننا محناش رجالة
اوعوا اللى مأكلنا زبالة
تستنوا عليه لما يفك !
****
نومكم ع الأسفلت فى طوبة
عَدَل الأوضاع المقلوبة
أحرار العالم من كوبا
بيحيوا الثورة لبانكوك!
****
فيس بوككم اتحدى جِمالهم
وفتح كشف حساب أموالهم
بس المدّعى بعد سؤالهم
هايدين فيهم حد ؟ اشك !
****
اوعوا تسيبوا ميدان تحريرنا
لو خدعوكم مين هايجيرنا
حافظوا على مصيركم ومصيرنا
غير ضُفرنا جلدنا ما يحُكّ !
****
حتى لو العروسين اياهم
هانشوفهم والبيبىمعاهم
ياللى هاتتفاوض وياهم
ركز ، دقق ، اصحى وشُكّ !
****
خلوا دموع مذيعينهم سايلة
وماتبقوش الحيطة المايلة
واثبتوا ، طول ما طاقتكم هايلة
سيبوا بقى اللى يعُك يعُك !
****
(عفريت العلبة) وأتباعه
ولّى زمانه بقطع دراعه
والدور جاى ع ( البُص ) بتاعه
اللى على العكاز بيزُك !
****
جيل الفاشلين من أمثالنا
هو اللى خذلنا ووصّلنا
للحال المؤسف ، وأملنا
فيكم يا شباب الفيس بوك !
يناير 2011 م
