جارى التحميل
استخدم زر ESC أو رجوع للعودة
<!--<!--
![]()
يا عم بيرم يا شاعر والجميع شاعر
إن البلد دى بتولد كل يوم شاعر
لكن رخيص الكلام
قدّف مع الموج وعام
وتاه فى وسط الزحام
الشاعر الشاعر !
****
يا عم بيرم يا إيد مصرية حاضنة القلم
بتحكى مصر التاريخ وبتبكى مصر الألم
غنيتها صحرا وعمار
غنيتها بندر وريف
صورتها للصغار
نسمة وهدمة ورغيف !
****
يا عم بيرم يا تونسى يا مصرى يا إنسان
ولا يجرح الخاطر الا الغربة فى الأوطان
ومهما بعّدنا
أشواقنا بتلمنا
غربتنا ف بلادنا
هىاللى بتهدّنا !
****
يا عم بيرم يا نيلى اللى ارتويت منه
يا معهدى اللى نسج أحاسيسى من فنه
بيقول يا عايز تقول
درب الكلام واعر
للكلمة حكمة وأصول
ما يصونها غير شاعر !
****
وكنت يا عم بيرم للأصول صاين
لا كنت صاحب قلم مهزوز ولا خاين
لا القصر أثر عليك
ولا أثر النفى فيك
ولا كل كل الكنوز
قدرت فى يوم تشتريك !
****
يا عم بيرم يا زهرة حب ريّانة
بعيد بجسمك وروحك عايشة ويّانا
فى شدو ست الطرب
فى لحن زكريا
عايشين فى أرض العرب
أسطورة أبدية !
****
يا عم بيرم وغيرك مين يكون عمى
واحكى لمين ما بى والا اشكى لمين همى
محتاجة مصر لكلام
ميت ألف بيرم أصيل
لكن خلاصة الكلام
الحلم دا مستحيل !
يا عم بيرم
يناير 1978 م
