صاحبك بالفايدة:

1-- صاحبك  بالفايدة
ولا رفاگتو زايدة
الصحاب فيهم وفيهم
فيهم اللي يبغي ليك الخير
وفيهم اللي سمو خطير.
كن لنفسك صاحب
تنجا من مصايب.
إلى خواو الركابي
 وماقدرت على عگابي
قول هادو اللي ف جيابي
هما صحابي 
هما يخففو ما بي.
إييه ! صاحبك !
صاحبك بالفايدة
ولا رفاگتو زايدة
صاحبك...
سلفو..
إلى بغيت تعرفو
 
 ورزقك تلفو(١)
سباب باش تناتفو(٢)
إگنفك أو تگنفو(٣).
تعطيه  الدراهم بيديك
وتبعوهم برجليك
عليه تجري
تظل تبري.(٤)
كنتي معاه راجل
ولي معاك  دري.(٥)
تعاملت معاه ولد الناس
حفر ليك الساس.
2--مول الحصان ينعس
ومول الحمار يعس(٦) 
خدم يا التاعس
من سعد الناعس
التاعس مايغش
ما يهش ما ينش(٧)
مغلوب على أمرو
يهبش طول عمرو
و  ديما مهمش
ف الطرف مكمش(٨)
والفاسد يكمش(٩)
ويعمرجيابو
  
بلاما يحشم مايرمش
ويوزع على حبابو
ف القبة يضرب الرش(١٠)
وف السلعة يغش
حتى صبح الغش
حق مشروع
وكل نزيه مضبوع
عليه ربينا جيل حاقد
يكره يفيق ف السرويا(١١)
يفضل البارد(١٢)
والرگاد من الصباح للعشية.
.
مقابل بعض الكلمات المحلية؛ ١=تلفو: تضيعه. ٢= تناتفو: تتخاصم معه.٣= تگنفو: تضربه او يضربك .٤= تبري: تبحث عنه. ٥= دري: طفل .
٦= يعس: يحرس.٧= مايهش ما ينش: لايحرك ساكنا. ٨= مكمش: بضم الميم الاولى وتضعيف الثانية: منزو في زاوية. ٩= يكمش: بفتح الحرفين الاولين وتضعيف الميم:  ملء كفه أي يأخذ ملء يديه.٠١= الرش: التصفيق. ١١= السرويا،: وقت مابين الفجر و الشروق .١٢= البارد: القرش السهل بدون تعب.
عمر بنحيدي.                                                                             10/7/2018