قصة الحضارة و سر الحياة
.....................................
أول ما بدع الانسان الحضارة
بدعها بحجر.
و أول خصومة بين أخين
بيقولوا.
واحد منهم قتل التانى بحجر
و بكدة قلوا البشر واحد
 قال يعنى كانوا كتير أوى البشر.
و بعدين 
عرف الانسان الحديد
و يا ريته ما عرفه.
صحيح بعد ما عرف الحديد
الحديد نفعه.
لكن ابتدت حروب ياما
 أصل الحديد فرعنه و غشه.
لكن الحقيقة المشكلة
ما كانتش الحديد
كانت المشكلة الحسد
و الحسد لما يعشش جوا قلب.
يا ويل الروح منه
و كمان يا ويل الجسد.
ياما الحروب حصدت أعداد
و لسه فى كل جيل
بتاكل عدد ورا عدد.
لأ و دلوقت بقت اليكترونية
و قريب أوى هتبقا نانو.
مش عارف ليه البشر
كدة على البشر هانو...
......................
بيقولوا الحاجة أم الاختراع
سألتهم أنا 
طيب و يا ترى مين أبوه
 قالوا. .واحد كان نفسه يعيش.
رغم ان ربنا ادا البشر حاجات كتيرة
أوقات تسأل واحد
معاك ايه..يقولك مافيش.
مع ان ربنا اداله الحياة نفسها.
و شريكته حقيقى أصيلة.
و عيلين تلاتة
يفرحوا اد ايه ما تقوليش.
يعنى اداله حياة و حب
و فوق دا كله اداله عقل منور
نوع من البقشيش
و اداله قلب
بيبعمل بيه ايه مش عارف
تفتكر بأه انت ايه اللى ناقصه
يا ريت لو سمحت ما تسألنيش.
..........................
طب هتقوللى خلاص عرفنا
ان ربنا ادا الانسان كل حاجة.
حياة و حب و حكمة .
و الانسان عاش طول عمره
 و لسة عايش بيدور على الفكرة.
لكن الحسد اللى جواه
خلاه استعمل الحجر و الحديد للحرب.
عاش طول عمره بالعقل
نسى من زمان ان له قلب.
و ان ربنا اداله ارادة قوية
 تتحدى كل صعب.
لكن يا خسارة 
الانسان مع السنين سر الحياة نسيه.
عشان يرجع تانى الانسان انسان
 ربنا و البشر و الكون يفرحوا بيه.
الحنان سر الحياة.....
لازم ترجع تانى
تملا و تملى
روحك و عقلك و قلبك بيه.
الشاعر العجوز
مرقص اقلاديوس