البكى . .  مش دموع

         للشاعر مدحت عطية ( ديوان أنا كلمة )

 البكى .. مش دموع

ولا الغربة .. سفر

والنور .. مش شموع

ولا الجناين .. شجر

الونس .. مش رجوع

ولا الدفى غطا

والحب مش خضوع

ولا الجفى .. حجر

ساعات جوايا يبكى

وعينى ما تزورها الدموع

وساعات ألقى خدى

من غير دموع .. مندى

وقلبى دبلان

فى الضلوع

وكتير بحس إنى

فى أرضى

لكن غريب

وخيالى بعدعنى

زى بعاد القريب

وساعات فى حضن الليل

ألقى فى عينى .. النهار

وأحس إن العتمة

بتنور الدوار

ياما شفت جناين

من غير شجر

ياما حسيت البرد

ياما شتت

من غير .. مطر

أبداً ...

مش شرط البكى دموع

ولا الغربة .. سفر

مش لازم للنور شموع

ولا للجناين .. شجر