بجد عاش
للشاعر مدحت عطية ( ديوان الصدى )

إلـ وقع وقام
بجد .. عاش
إلـ جرى ورا
حلمه
إلـ طلب ملاقاش

إلـ بإيده الشمس
حاش
إلـ لعب
بعروسة .. قماش

طَيَر
طيارة .. ورق
إلـ راح
مدرسته بشنطه
خرق

إلـ نام فى السقعه
وليله .. بَرَق
إلـ عمره فى يوم
ماحلمه .. إتسرق

إلـ قال
إن الحق .. مش هبه
إلـ كان كبير
وقت .. الصبا

عاش إلـ دموعه
قريبه
إلـ الشمس نامت
فى سريره
إلـ أمه كانت
طيبة

إلـ حس
بحد .. غيره
إلـ دَوَق
غيره .. خيره

إلـ فى ودنه
سَبح .. طيره
إلـ صلى
فى جامعه .. وديره

إلـ إستنى
قدوم .. وليده
إلـ جده
كان هو .. سيده

إلـ نام
وفى حضنه .. عيده
إلـ مد
لصاحبه .. إيده

بجد عاش
إلـ ضحك من جوه
فى غلبه
إلـ بكى ودموعه
باتت .. جنبه
إلـ جاب
مؤمن .. من صلبه
إلـ قال
الله .. من قلبه