مجلة عشاق الشعر الإلكترونية .. ممدوح حنفي
واحد بيقول لى
كفاية شعر وطنى
عايز شعر عاطفى
أجيب منين ومصر بتصرخ
من سنين
أجيب منين والقلب حزين
وعيون البشر بالسواد
متلونين
تقدر تقول لى احساسنا
ومشاعرنا راحت فين؟
راحت فين ضحكة أطفالنا؟
راحت فين كل آمالنا؟
وراح فين مستقبل أجيالنا؟
الطريق عتمه ومالوش معالم
لا تعليم نافع ولا
مدارس بتخطط لعالم
والأرض مخاصمه الفلاح
وهوه كمان لدينه مخاصم
وبتسألنى فين الحق
وأقول لك مين هيرد المظالم؟
مين هيجيب حق الشهيد
من كل قاتل وظالم؟
وبتقول شعر عاطفى
وعامل نفسك موش
عايش وموش فاهم
لما تلاقى الأمان
واللقمة الحلوة
وشوية ايمان
ينطق الحجر
ويلاغى القمر
ويضحك والضحكة
تكون حنان
تكون أشعار
باحساس
فنان
الشاعر/عبدالجوادخاطر
ساحة النقاش