مجلة عشـــاق الشعـــر الإلكترونية (ممدوح حنفي)
كلمتين
هما اللى فرقوا بينا
النصيب والقسمة
رغم ان روحى امنت
بالاتنين
راحت على روحها منقسمة
وكان ناتج روحين
روح بتدى جسمى الروح
وروح بتروح
تدى روحك البسمة
بمجموع روح مجروح
جايز يكون الغلط عندى
لما حلمت ان القمر
ممكن ينزل الارض
وكانت حسبتى مش ولابد
كان ولا بد انى احسب صح
لو كان القمر ينزل
و يسيب مطرحه فوق
ما كانش شوق
ما كانش جرح
ولا كان عشاق
ف يوم يتفرقوا عن بعض
وتبقى جروح
وتتقسم الروح ارواح
روح تفضل وروح تغيب
وترجع وتقول
كل نصيب وله قسمة
كل قسمة وليها نصيب
وتتملى العيون دمع
بروحين
روح تبكى ع القسمة
وروح تبكى ع النصيب
الشاعر عبد الله الهوارى قنا قوص جرا جوس
ساحة النقاش