مجلة عشاق الشعر الإلكترونية. .ممدوح حنفي
الفراق مش بعد اتنين عن بعض
كل واحد يعيش ف ارض
الفراق موت موت
انك تموت كدا وانت عايش
تفارق الحياة
عادى
وانت واقف عادى
وانت بتتمشى
وانت بتتعشى
وانت مفتح عنيك
ومش حاسس اللى حواليك
ومش شايف ولا عارف
فين راسك ولا فين رجليك
وحد ينده عليك
وانت مش سامع وبتسمع
ويعدى صوته جنبك ويرجع
تلتفت ناحيته وتساله
هو انت بتنده؟؟؟
يقولك اه...ِ!!
تقوله باحسب...
يسيبك و يهرب
و يبص وراه
و يفضل يستغرب
بيسال نفسه
هو ايه اللى حصل معاه؟؟؟؟؟؟؟
ولونك عادى مش داكن
بيتحرك براك وجواك ساكن
والحزن فيك ساكن
ومش عارف اخره فين
ان الكلام عندك زى السكات
مش فارقة
الفراق موت يبقى..
لما متفارقش ناس اموات
وتفارق ناس عايشين
ساحة النقاش