ضَرْبِة السيسى لداعِش .. بقلم // عبدالله الغلبان

مجلة عشـاق الشعـر الإلكترونية .. ممـدوح حـنفي

ضَرْبِة السيسى لداعِش
رَغْم كلّ الاخْتِلاف
والخِلاف اللى مابيننا
بتِرْضِىِ نفسى كتير علِيِه
والوَطَن وَقْت الشَدايد
مُش ف حاجَه للخِلاف
أو شَماتِة حَدّ حاقِد
دَه وَطَن والكُلّ فِيِه
وَقْت ما تغَيِّم هاتِشْتِىِ
وغيمها هايصِيب الجَميع
كانوا راضيين عن رَئيسهُم
وللا مُش راضيين علِيِه
نِفْسِىِ بَسّ ف حَدّ يسْمَع
شُورتِىِ وَقْت ما اشُوُر عليِه
ذَبْح مصرى ف ليبيا فُرْصَه
انّ الوَطَن يجْمَع إيدِيِه
واللى قال المُرسِىِ رَيِّس
واللى قال السيسى رَيِّس
واللى حتَّى ما لوُهْشِ رَيِّس
ينْتِبِه بانّ الجَميع
يوم مَ داعِش سيفها يعْلا
الكُلّ لازِم لُه يطِيِع
واللى هايعارِض قَرارهُم
فَ العِقاب منْهُم فَظِيع
وانتوا شايفين اللى حاصِل
عَ الشاشات (فِعْلاً مُرِيِع)
حَرْق حَىّ ... وذَبْح حَىّ ... 
و دَمّ بيلاطِم ف مُوُج
فَكَّرونِىِ بالتَتار ... 
يبْقا لازِماً من خُرُوج
من دَواير لاخْتِلاف
يا وَطَن مِلْك الجَميع
دِيِب غَنَمْنا مابياكُلْشِ
الا المِفارِق للقَطِيِع
واحْنا فى مصر النِهاردَه
الكُلّ فارِق للقَطِيع
وانْ ما وَحِّدْناش إيدينا
ف وِشّ داعِش راح نِضِيِع