مجلة عشـاق الشعـر الإلكترونية .. ممـدوح حـنفي
ياللي بتعشق لون الدم
ياللي كلامك زي السم
نازل طالع سب وذم
عايز حرب و عايز غم
عايز تبقي الدنيا خراب
تمشي تفرق بين اصحاب
تفرح لو تلائينا ف هم
عايز تبقي حياتنا دمار
تحرق فينا ليل ونهار
ترقص فوق اجساد الموتي
تفرح ساعة صرخة أمّ
عايز كل شوية جنازة
تشبع فيها حزن ولطم
عايز تقتل كل الناس
تنهش لحم وتاكل عضم
انا مش عارف جنسك ايه
قلبك . أيه.. دينك أيه
فكر مره معالي البيه
نفسي ف يوم يا حزين تتلم
نفسي تبطل لغة الدم
نفسي في يوم الاقيك انسان
إيد بتساهم ف البنيان
تبني بإيدك أو تهتم
فين أيام العيش والملح
ليه بتزود حجم الجرح
تخطف منا طعم الفرح
فوء يا صديقي يا ابن العم
إعمل خاطر أب وأمّ
أحضن أخوك بالقوة وضم
وارفض أي صراع ع الدم
***
بقلم / طه ابراهيم
ساحة النقاش