مجلة عشاق الشعر الالكترونيه .. ممدوح حنفي
(ليلة ميلاد الولد)
ليلة ميلاد الولد
الفرحه كانت ماليه البلد
دقت طبول الفرح
والجدة شايله الولد بقلب حنون
والام كاتمه جرحها وفرحتها
وضحكتها تهز الكون
وصوت الزغاريط مجلجل
ويا دق الهون
والكل فرحان بيغني سعيد
والرقص جنون بجنون
.....................وفجأه.......... ..
دق باب الدار ..اتخطف قلب الام
قالت استرها ياستار
زعق الغراب ع الشجر
فلحظه جالها الخبر
ان ابنها البطل خد لقب شهيد ومات
...........................صرخت الام......... ......
جوه الدار ...كان الخبر لحظه مرار
غيم علي المكان السكات
راحت الام تسأل هو صحيح ابني مات؟
اترسم علي الوشوش صدق الخبر
راحت الام في غيبوبه ساعات
وعشش الحزن ع الوجوه وكترت الاهات
..............................................
مسكت الام باديها طفلها ورجته ( وهزته )
اصرخ ياولدي ..أبوك البطل مات
صرخ الولد .هز البلد من صرخته
مات الاب .والولد ماتت ضحكته
فاقت الجدة من حزنها ..قامت
لملمت شملها ..مسحت دمعها
وباديها شالت الولد حضنته
وعلي صدرها ضمته
جات عنيها في عنيه ... حلفته
...............احلف ...... .
احلف برب الكون انك
في يوم هتكون ابن حلال
احلف براس ابوك ودمه البرئ الي سال
انك تكمل المشوار ..وتكون بطل من الابطال
وتحافظ علي ارضك وعرضك
من كل عدو غدار
واياك تقول ان ابوك مات
هو عايش في قلوبنا ياولدي
وعند الله في الجنه مع الابرار
ساحة النقاش