الترنج الأبيض
شعر:
ماهرمهران
ياحزن
جاى منين يا شعر؟
جاى من الأحزان
جاى منين يا حزن؟
من ميلة الزمان
جاى منين يا ظلم ؟
جاى من فوق
جاى منين يافوق ؟
من ركنة الهوا فى الطوق
جاى منين ياطوق؟
من زفارة الدم
اللى سايل م المناورة
طب ألف شكر يافوق
ياللى فضلت
تعصر فى قلبى
لحد
ماعملت
من غضبى
ث
و
ر
ة !!
تمرد
أنا هاقطع الطريق
وهابلطج
والسّلام ..
وهافصل الضغط العالى
وهاعيّشكوا ف ضلام ..
وهافتح صوتى
وهاصرخ
لحد ما ودن الحكومة
تترعش
وتتشرخ
ويهجّ
من بيتها الحمام
بس ياريت
ما تقوليش ساعتها :
خاف ع البلد
وياريت ماتقوليش :
حافظ ع النظام ..
ما أنا طول عمرى يا باشا
بجد بخاف عليها
وما باخدشى فى النهاية
غير حبة كلام !!!!
الجماعة
الجماعة
اللى نافقوا
وارتشوا
واللى نهبوا
وكرّشوا
واللى لا خافوا
ولا حتى اختشوا
اللى كانوا بوق للفساد
اللى خانوا الشعب
والضمير
والبلاد
اللى اعتبروا
النومة تحت جزمة السلطان
نوع م الكياسة
اللى بدّلوا الكعبة
بمكاتب الوزراء
وبقصر الرئاسة
الجماعة دول
حالفين يخلّوا
توب الثورة الابيض
مليان بالنجاسة!!!
ميدان
أنا شبر
بس مليان بالحياة
ساعات
تبقا الدنيا كلها ف قلبى
، وساعات
أعيش أبقا نبى
عايش فى الكون لوحدى
، وساعات
تكسى الوش بهجة الضحكة
، وساعات
ينام اليأس على خدى
أنا شبر
بأغرق فى شبرمية
لو بعّدت خطوتك عنّى
أمّا لوقرّبت منّى
(ف) طبعا
هاكون طوق نجاة
مش أنا شبر
بس
بس
بس
شبرمليان بالحياة
الخوف
لمّا لًَمَحت
سالى رايحة على القناصة..
لمّا شفت
بسمة ميدو
، وهوّبينزف
، وف قلبه رصاصة..
لمّالقيت
حبيبتى مريم
فاتحة الصدر
للمولوتوف..
لمّا شفت
خيال بسيونى
وسط الغاز
، ووسط جمال
، ووسط بغال
، ووسط حمير
، ووسط الموت
عمّال بيطوف..
لمّا شفت بجد دا كله
إتاكدت إن إحنا خلاص
إتخلّصنا
كلنا (م) الخوف ..
فدان الجولف
فدان الجولف
اللى ما بيفتحشى حضنه
غير لواحد
أو اتنين..
فدان الجولف
اللى بيشرب ميه
أكتر من عشر فدادين..
فدان الجولف
اللى لا بيدّينا قمحاية
ولا منجاية
ولا ونس
ولا ضحكاية
ولا تسمع فيه صوت الّديك
لا فى مسا
ولا حتى بكور
فدان الجولف
اللى ما بينا وبينه
كلاب سعرانة
ونقط تفتيش
وحراس
وسور
فدان الجولف
لحد امته
هايفضل
يشفط مننا الميه؟!
ولحد امته
هايفضل
يقطع علينا الهوا
والنور؟!
مسكنات
الشجرة
المليانة شوك
اللى مفيهاش ورقة
ولا ثمرة
ولا ضلة ترحم نار قايدة فى ضهرالأولاد ..
الشجرة
اللى مصّت دمنا
وإتفرّعت جذورها
وخنقت رقاب البلاد ..
الشجرة
اللى كلبشت قوى فى الأرض
وفتنت ا وفتنت الأنبياء على بعض
الشجرة
المليانة عفن
وذل
ورعب
وفساد ..
بدال ما تقلموها
الأحسن تقلعوها
وتريّحوا منها العباد!!
الأروبة
الأروبة
اللى إتربعت دهر
فوق العواصف والرماد!!
ولا هّمها
إن بلدنا حالها مقلوبة
وأن الخيمة
ع تشحت الأوتاد!!
اللى سرقت الرضا
من وشوش الأمل
ونحتت الحزن
جوة ملامح العباد!!
اللى خلت وردة الدنيا
بصلة معفنة
ومعطوبة !!
الأروبة
اللى ملت بنوك الكون
وسابت لمصر الخساير
اللى كشفت الوش
وفكت الضفاير
قال إيه:
بدال ماتروح
على السجن
هاتشتر هاتتعطّف
وتتكرّم
وتتنازل
عن قصرالعروبة!!
هأأو
سامع بدل النسيم العليل
شايف غبار فى الجو
وبدل زئير الأسود
سامع خوار البو
سامع فيران بتزوم
وكلاب بتقولى : هوهو
وعلى دم الشهيد
فيه قطة رافعة الديل
بتبرّق لى
وبتقول لى : نونو
ف أوعا تقولى إتطمن
واوعا تقولى :
إذا
ولعل
ولو
عشان بصراحة هاقولك:
عجبى
وهأقول كمان :
هأأو!!
الحرباية
ــ الحرباية
المتلونة
المتحولة
اللى بتتنطط
على كل الحبال!!
ــ الحرباية
اللى عشان رقم حسابها يزيد
فى بلاد الجليد
خدتها العنجهية
وخدها الجلال
وعملت شهيدنا جاسوس
عملت الحكما
شوية جاموس
عملت نفسها
رجلين دكك
حاولت تكون محطة فى السكك
وسندة للعروش!!
ــ الحرباية
اللى غمّضت عينيها
عن مصر الغزال
واللى هتفت لبلطجية الجمال
ماتسامحوهاش
عشان دى غمضة عين
، وهاتمسح تانى جوخ
، وهاتمسح نعال
، وهاترجع تانى تتنطط
، و ترقص
على
كل
الحبال ..
الثورة
يا شجرة مانجة
زرعها بذرة الناس الشقيانين
يا شجرة مانجة
رواها بالدم
الفلاسفة
والفنانين ..
ياشجرة مانجة
(ع) نحلم ترش سكر
وحبّ
(ع) الفصول
و(ع) السنين ..
يا شجرة مانجة
هل صحيح
أول ما هاتطرحى
هايبرك عليكى
المتشددين
والمتعصبين ؟!
ظرف
ياللى مسكتها
وهىّ خريف ..
ياللى مسكتها
وفسادها واصل واصل للطراطيف ..
لوتقلع
شجرة فسادها من الجدر
هانقول الله
لو بالبلطجة
والفوضى
تغلوش على الخداع
وعلى الزيف
لو تاخد من الشجرة فرع وتزرعه تانى
يبقا أسمح لى أقولك :
هأ أو
وأقولك :
والله ظريف !!
لو تقلع
العيد
لما أبتدينا
نشم ريحة الكعك
ونشوف ألوان فساتين الصبايا
ونفرح بولادة العيد..
لمّا على صراخ المخاض
وفضلت شعرة واحدة
بين الموت
والبعث السعيد..
لمّا ف عز دا كله
تيجى توّقّّف المركبة السايرة
وتكسّر
لمّا البلد
تبقا شمس
ومن العتمة بتتولد
والفجر بيهلّ من جديد
لما تبلطج
وتدمّر
وتخرّب
وتنشر الرعب
وتقطع السكة الحديد !!
يبقا أسمح لى أقولك :
هأ أو
وأقولك كمان :
كده هايتأخرعلينا العيد !!
افتراضى
ــ كل شىء فى البلد
افتراضى ؛
المدرسة
، والمستشفى
، والعمدة
، وحتى القاضى..
إفتراضى !!!
ــ مجلس الشعب
، والحرامية ولاد الكلب
، والاذاعة
، والتليفزيون
، والحزب الريادى ..
إفتراضى !!!
ــ الإنتصار
، والإنكسار
، والفرح
، والجرح اللى فى النادى ..
إفتراضى !!!
ــ الرئيس
، والمعارضة السيس
، والفرح
اللى الناس هاتموت عليه فى الوادى
إفتراضى
إفتراضى
إفتراضى
مفيش حقيقة واحدة
فى بلادى
غير صرخة شبابنا الحر
من عالمهم الافتراضى !!!
ثورة مضادة
الضاض
بقاله ضاضة
والثورة
بقت مضادة
وابن الثورة الحقيقى
ليه كل مايقول:ياماما ؟
يبعتوله دادة ؟!!
أنا
أنا
دخان بيطلع من الروح
وع تزيحه الأيادى بعيد ..
وأنا
رجلين بتلف (ع) الفاضى
بعد ما تسافر بعيد ..
وأنا
زرقة المزيكا
والرضا النايم
فى كل وش طيب سعيد ..
وأنا
اللى كفرت بكل شىء
وأمنت بالحرف
إلة
واحد
وحيد ..
(ف) أزاى يجى العيد
ومايسلمشى على قلبى ّ؟!
وإزاى
أروح له
وما يرضاشى يقابلنى العيد ؟!
الفريسة والصياد
الصياد
اللى إتطمن للفريسة
فى الشبكة ..
الصياد
اللى فرح قوى
بروعة الحبكة ..
الصياد
اللى شرب كاسات النصر
ورقص سامبا
ورقص دبكة ..
الصياد
اللى عمل ناسك
ومتماسك
وأخفى الخوف
والرعب
والربكة !!
الصياد
طلع له شوية عيال
علموه
إن القوة فى الشعب
مش فى شلة كروش
منفوخة
، وغبية
، وكمان رخوة !!
رد
فضلنا نقول :
اللى تجيبه السما
ترضى بيه الأرض
لحد ما الجوع أكل البطون
، والحكيم بقى مجنون
، والقيود حزّت
، والسجون نزّت
، وضاق الرّصيف ع الشعب
، وأكلنا لحم بعض !!
(ف) أصرخوا
، وثوروا
، وخّلوا لكل صرخة غراب
إعتراض
، و ردّ
، وإلا
هاتخسروا الّسما
، وهاتخسروا
كمان
الأرض !!
حديث مش شريف
قال يوسف :
أنا علىّ
أسرق الكحل
من العين
وأقلّب الشعب
وأشفط دمّ البلد !!
وقال العادلى :
وأنا على ّ
أزرع قلوب
الناس بالخوف
والرعب
والدم
والعذاب
وروايح العفن
وأشغلهم عن
المليارات
والبلاتينيوم
والفوسفات
والدهب!!
وقال نضيف :
وأنا على ّ
هأخلّى الجو
لطيف
وعلنا هاملا
البلد إبتسام
وفى السر
هاهدم الأركان
وهاخلى الشعب
دايخ من التعب !!
وقال الريس :
وأنا على ّ
أحط دا كله فى
الصناديق السوده
وأطلّعه بلا عوده
عشان يكبر
ويزيد
فى بنوك
أوروبا
وأمريكا
وهاواى
وبنوك ملوك
وامراء العرب!!
السمكة
أول ما سرقوا دهبها
، ولطشوا ماسها !!
أول
ما لففوها السبع لفات
وكتموا نفسها !!
أول ما أشتقنا لفولها
واتوحشنا عدسها !!
قلت : خلاص
ويا ألف خسارة :
السمكة فسدت من راسها
قلتوا : لا
دى فسدت من المية اللى حواليها
جبنا المغرفة
، وغرفنا
(ف) بانت بلاويها
وأدينا تانى رجعنا نقول :
خلّوا بالكم من الراس
عشان يصح
بقية الجسم
قصدى يصح
بقية الناس !!
الميتين
ــ ياللى أنت ساكن مقبرة
بقالك سنين ..
، وحواليك صبّار
، وأطفال شوارع كتار
، وأشباح مرعبة لأموات
، وبتجرى فى دمّك
ريحة الميتين ..
ــ ياللى إنت ساكن مقبرة
، والخلق شايفة فى صوتك
رعبك قوى من موتك..
ماتخافش
دا الموت
مابيموتش الميتين !!
كفاية علىّ
مش عايز شقة
، ولا نفسى (ف) عربية
، ولا عايز أسهر
سهرة تخلى الدنيا
تلف بىّ
، ولا عايز أمثل
، ولا ألعب كورة
، ولا حتى أكتب أغنية
، ولا عايز كاميرات
، وجوايز
، ولا بنت تدوّب بجمالها الحزن المترسب فى ّ
مش عايز شقة
، ولا نفسى ف عربية
، وكفاية على ّ
أتبهدل طول اليوم فى الشارع
، ولمّا أرجع
ألملم أوجاع الناس
، وأعملها قصيدة
، وأضربها (ف) وش الزيف
، وأنام
، وأول ما أصحى
ألاقى الرضا عنباية
بتطرح عناقيدها علىّ
مش عايز شقة
ولا نفسى ف عربيةّ
أنا
أنا
لومالقيتشى لىّ كبير
بأجيب لى كبير
إن شالله
من طالون ..
وأنا
لو مالقيتشى لىّ غفير
بأخد جريد النخل
وأعمله خيال مقاته
وألبّسه عمة
وجلابية
وساعات
قميص وبنطلون
وأنا
لو مالقيتشى لىّ فتوة
بأ نحت فى الصخر
لحد ما أعمل لى من الجرانيت فرعون
ف ماتدّعيش إنك فاهمنى
وأنا تلتى
خوف من الإلة
وتلتى نار
والتلت التالت
مرارة الجوع اللى تشبه لمرارة الأفيون !!!!
حد مش عادى
ــ اللى كسر القيود
، واللى مزق توب المذلة
، واللى رمى روحه
فى النار قصادى..
، واللى كان صوته رعد
، ونظرة عيونه وعد
، واللى خلّى الأرض دم
بيغلى فى كل شبر فى الوادى..
، ويبكى لحد
ما جسمه من الدمع
يتعصر
، واللى خلى الفرعون يتكسر
، ويشحت العفو من أمى
، ومن ولادى..
واللى صقف له الأصدقاء
وإنحنى له
كل الأعادى..
أوعا تقولى تانى :
إنه مبالى
أو إنه مستهتر
أو إنه
حد عادى ؟!
الطغاةالطغاة
اللى سقونا المجارى
فى المياة !!
اللى أصغر واحد منهم
عاملى نفسه رب
أو إلة !!
ــ الطغاة
اللى واخدين البلاد ورثة
واللى بتترعش ركبهم
لو حصلت لنا كارثة
الحنينين خالص
قدام العدا
القاسيين خالص خالص
(ع) الشعب
و(ع) الغلابة
و(ع) اليتامى
و(ع) الحفاة !!
ــ الطغاة
اللى ياما جوعونا
، وعطشونا
، وشردونا
، ونهبـــونا
، وسرقونا
، وعذبــونا
، وحرقونا
، وفجـروها
، وقتــلونا
، وعشان طمعهم فى الكراسى
دمروا فيها الحياة !!
ــ الطغاة
والله العظيم
حالفين مايسيبوها
قبل مايجيبوا الغزاة !!
هأ أو
أنا اللى ورث من أبوه
دراع عفى
وبندقية
بيكسّر بيهم دماغ القهر ..
وأنا اللى أمى رضعتنى
إن قولة لا فى وش الظالم
أحسن ألف مرة
من قولة نعم
لوشوش معفنة
تدارى العفن بالعطر..
وأنا اللى إتعلمت
أشيل ريشة العدالة على راسى
من زهور بتموت من البرد
ومن أحلام بتنشف
من شدة الحر فى القيالة
ومن غضب المية فى قاع النهر..
(ف) لمّا يجى حتة مخبر
ويهددنى بإن أبن أبنى
مش هايلاقى حاجة يورثها منى
غير الفقر..
هاقوله : هأ أو
وأقوله :كفاية يعيش مرفوع الراس
من الميلاد
ولساعة دخول القبر!!
ضيق
ــ برغم الزحمة
وإتساع المكان
وضوضاء المدينة ..
إلا إنى
حاسس بوحدة
وحاسس بغربة
وحاسس بضيقة ..
وباحنّ لبلاد
لا فيها زحمة
ولا ضوضاء
بلادى العزيزة
بلاد البلاء
بلادى البعيدة
بلادى البريئة ..
اللى برغم ضيق اليد
وضيق الخُلق
ونار الحريقة
باشوفها وسيعة
إتساع الحقيقة !!
بلاد الخصوبة
والميلاد
والصدق
والصراخ فى الطلق
بلاد الجحيم
والنسيم
بلادى البعيدة !!
ثورة الصعيد
ما إبتدا الشرق
يرش الضى فوق الوش ..
وإبتدا الصفار من الملامح
يختفى
ويكش ..
وإبتدا عصفور الحياة
يعود للعش ..
وإبتدا الزيف يستخبّا
وصوت الحقيقة يقش ..
قلت لى :
إنت ماكنتش واقف جنبى !!
وضحكت ضحكة صفرا
وقلت :
إنت كنت نايم فى العسل قبلى !
ونسيت تبص من حواليك
وتشوفنى حبات عرق
منثورة على القورة
وسكينة فى بلاطة مكسورة
ولقمة ناشفة بين إيديك
وصرخة بتقوّى العزم فيك
ودم حر وقف للموت
وبسمة على شفة شاب مات
أنا همس الأغانى
والصخب اللى فى الهتافات
وأنا القطنة اللى على الجرح
والأيد اللى (ع) تطبطب عليك فى الحيرة
واللمة فى عزالفرح
وأنا ثبات الرجل اللى مكلبشة فى الأرض
والجلد اللى هزم البرد
والأيد اللى بعدّت عنك النار
وأنا اللى ساعة الصفر
كنت للموت فاتح الصدر
وأنا
دعوة أمك فى ليلة القدر
وأنا
الصدق فى هتاف تلميذتى
ثمرة صرختى فى وش الظلم
فى عز ما أنت
كنت غرقان فى السكوت
(ف) ماتتهمنيش بالموت
عشان لقيت نفسك مرة فى الهتاف ..
وماتنساش
إنى أنا اللى بانيك
من القشرة للألياف ..
(ف) إستحى
وأتلوّم
وخاف
وبص حواليك
هاتشوف أثر أفعالى
أنا
وواد عمى
وبلدياتى
وجارى
وواد أخوى
وواد أختى
وأفتكرإن الثورة
مش تحت رجليك بس
دا الثورة
كانت شرق
وغرب
وبحرى
وقبلى
وكانت نار قايدة فى كل قلب حر
ونار قايدة فى كبدى
و(ف) جنبى
الثورة مش نص شهر
الثورة دهر
الثورة مهر
دفعه أبويا
قبل ماتسلّم الأرض على رجلى
بس يا خسارة
أنت ما أخدتش لبالك
من النار اللى قادت
سنين
جوّه فى قلبى
الثورة قبلى
ألف مطرود فى الجبل
الثورة قبلى
ملايين فاتحه الصدور للموت
فى عز ما أنت
كنت (ع) تسجد للاتى ولهبل
الثورة قبلى
قايدة من زمان
بس إحنا ما (ع) نحبش
نحط (ع) النار عبل
إنما يا صاحبى
ثورتنا عدودة
وطوفان
ما(ع) يحبش يمشى فوق الخط ثورتنا قبلى
جنون
ومليون خط
ومليون حريق
ونار (ع) تغلى جوّه أبريق
وصبر من الجملى
لو ثار يدعك الخلق
ويتفرط على الجميع حملى
مش أقف فى الميدان
والسلام
لا
أنا ثورتى
مش هتاف
على حبة كلام
يتقالوا على الشاشة
أنا طول عمرى
عصايتى بندقية رشاشة
وكلمة زى السيف
مش كلمة مايعة
ولا كلمة غشاشة
ولا بالأحتمال حبلى
أنا ثورتى قبلة
بس إنت
بص كويس
تلقى عيونى حمرا
وكأنها رصاصة
وتلقى دمى متفرق (ع) البلاط
و(ع) الكوبرى
دم فاير
دم ثاير
من الظلم اللى شافه البشر قبلى !!!
