ويْقُول عَبِدْالصِّبُور
شِعْرعَامِية :
مَاهِــرمُهْـــرَان
إتْرَعَشِتْ الرُّكَب
من كُتْر أَحْمَالها ..
واتْقَفَلِت أبْوَاب السَّما
ف بَاعِت النّاس عِيالها..
وكَشََّرِت الأرض ف اللى حَبُّوها
ف تَاه الْبَرَاح
وحَاصَرِتْنَا الْجِرَاح
واتْرَمَت الْعِيال قِدَّام الْجَوامِع
واتْرَمَت ع الجِسُور!!
ويْقُول عبدالصَّبُور:
نَفْسِى أَرُوح الْشَّرَم
وألْمَحْهَا ب عْينِيه
وأرْمِى الْهِمُوم ف الْبَحر
وأرْقُصْ طَواْعِيِّة
لَكِنْ أعْمِل أيه ف الْحَظْ
اللى خَلا بِيَّا
وخَلانِى عَاْيِشْ مِقََشْفَِرْ
لامِعَايا فِيَزا كَارِدْ
ولاعِنْدِى مَاهِيِّة ؟!!
ويْقُول عبدالصَّبُور:
بِلادِى غَزَالة صَابِتْها الْقِرُوح..
وانْتَشَرفى الْجِلد ألاف الْجِرُوح..
واتْلَم عَليها نَمْل
وجَرَاد
وِشَرْكَس
وِمَمَالِيك!!
وتَاه جَمَالها
ــ يأ ألْفين خُسَارة ــ
وِلَومِش مِصَدِّق
بص من حَواليك!!
هَاتِلْقَى مَمَالِيك
بِتِهْجِم على الدّكَاكِين
ومَمَالِيك ع تَْقلِّب النَّاس ف الشُّوارع
ومَمَالِيك فى الدُّواوين
ومَمَالِيك فى الْقَصْر
مَمَالِيك عَ تِفْرَح قَوى
لمَّا النَّاس تِتْعَصِرعَصر
ولمَّا من شِدِّة الْعَيَا
الدِّنْيا بالنّاس تِدور!!
ويْقُول عبدالصَّبُور:
الْحَصَى لَغََمْ
والأحْزَان نَغَمْ
والدِّمَاغ إتْمَلِت غَبَاوة
والْوَرد اللى فَتَّح ف الشِّتَا
هَايْكُون دِيْنَامِيت ف الْحَرب !!
هوَّ أيه دا
اللى نَايِم فى وِش الدَّرب ؟!
وليه
نَابُه نَاب دِيب
وجِسْمُه جِسْم طفل حَبِيب
جِوَّه تُوب كَسْتُور؟!!
ويْقُول عبدالصَّبُور:
مِن طَلْعِة الْبَنَات مِن الْمَدَارِس
مِن ضحْكِة الْحِنَّة فُوق الأيِد
مِن الأنُوثَة اللى ع تْفُوح مِن الْغَجَر..
مِن ريْحِة الطِّين
وبْرِمْهَات
وجناين المانجة
والْحَجَر..
مِن خَمِّرة الْعِشِق فى الْمُولِد
مِن الْحِكْمَة
اللى ع تْشُر مِنِّنا
سَاعِة نِمْشِى..
أخَدُوا الْبِنَيِّة
وِحَطُّوها ع الْكُرْسِى..
وِرَسَمُولها طَرِيق مُنْحَنِى
وِقَالُولها :
مِن هِنا يِكُون الْمَشِى
وِمِن هِنَا يِكُون الْمرُور!!!
ويْقُول عبدالصَّبُور:
أنا قَلْبِى أَخَفّ من الرِّيشة
ونِيّتى خِير..
لاعِنْدِى كُنُوز
ولا تحَْوِيِْشِة
ولابَأْذِى الطّير..
ولا بَاطْمَع ف اللى ف أيد غِيْرِى
ولا بَاكْرَه حَدّ..
ولا بَاجْرَح جَارِى
ولا بَاحْقِد
على أيُّها حَدّ..
ولا عينى ع تْمِيل ع اللى ف أيْدَك
ولا باطِيق التّكْويشة..
ما أنا قلبى أخفّ من الرِّيشة..
ــ لاسَرَحَتْ عليكى
ولا خُنْتِك..
ولايوم عشقت غيرحُضْنِك..
أنا السَّند ساعة حُزْنِك..
وأنا الْفَرَح
وأنا الْكُوشِة..
وأنا لُوزة الْقُطن الْمَنْفُوشِة..
وأنا الحياة
وأنا الْعِيْشة..
وأنا قلبى أخف من الرِّيْشة..
عملت السَّما ليكى سجادة
وفرشت روحى تَعْرِيشة..
ورَهَنْت حياتى علشانك
وعملت الْقَمَرة غُوْيِشة..
لكن قسيتى
ورمتينى
وقلتى عليا : عيل طيشة..
قاعد
وعمال بيْسَقَّط
وكأنه شاربْ قرش حشيشة..
ف رجعينى لأحضانك
وصالحى روحى على العيشة..
دا أنا طيب ــ والمصحف ــ خالص
و قلبى أخف من الريشة..
و ما تسيبيش قلبى الْبَفْرة
متْنَشِّرْ ع الطرق قتيل
وما تفتحيش جَنِّة حسنك
للهالوك
ولورد النيل
والكدابين
والهبّيشة!!
وأوزنى قلبى المسكين
تلاقيه أخف من الريشة
ويْقُول عبدالصَّبُور:
الْمَطَبَّات
قِدَّام كُلّ بِيت!!
والسِّلاح
فى إيدين الْعِيَال!!
والْغَرِيب مَاشِى يِتْلَّفَّت
وِبَنَات النَّاس الجُّوع عَرَّاهُم
وإيدينا ف جِيُوب بَعض
وِقَرَّب الْحَوامِل يَاكلُوا الشُّوك
واخْتَفَى النُّوَار
وِبَشَاشِة الْوِش
وِزَاد الْهِيش
والْحَشِيش
والْقَش
وإتْدَلَت الْحِنُوشِة
مِن ع السُّور!!
ويْقُول عبدالصَّبُور:
عَمَلْت أيه
ف اللى الضَّلْمِة
أَكَلِتْ نُورعِينيهُم ورا الْقُضْبَان؟
عَمَلْت أيه فى شَوارِع
أحْتَلَّها الصُّيع
والبلطجية
والدِّبَّان؟
عملت أيه
فى الظّلم اللى على ودْنُه؟
والنَّاس اللى مِسْتَنْظَره هِدْمِه؟
عملت أيه
فى فلاح إتَّاكَلْ عُمْرُه من الْحِرْمَان؟
عملت أيه
فى الشَّرَخْ
اللى عَ يِهَدِّد قَصَبِةْ الْمِيْزَان؟
عملت أيه
فى هِيْمَنِة أوروبا
والأمْرِيْكَان؟
رَدّْ عليَّا وقَال : الْحَمْد لله
أنا والْحَاجِة
عَمَلْنَا عُمْرَة فى شَعْبَان !!
ويْقُول عبدالصَّبُور:
رِيْحِة الْفَقِير
خَلَّت الْعِيون تِحْمَر..
والنَّاس تِلْعَن الطَّرِيق
اللى فِيهَا عَدََّىَ
وِمَر..
رِيْحِة الْفَقِير
قَلَبِت الْمَصَارِين
وِعَلَّت الضَّغط ف الدِّمَاغ..
رِيْحِة الْفَقِير
خَلَّت النَّاس هَاتْرِّجِع
مِن كُتْرالصِّدَاع !!!
ويْقُول عبدالصَّبُور:
سَنِة
والْفَلاح ع يْخَضِّر الأرض
سَنِة
ع يُعْزُقْهَا بِضوافرُه
و ع يِرْوِيهَا من الْبَحربالْفِنْجَان
هُوَّ
والْحَرِيم
والْولْد..
سَنَة
وهُوَّ ع يْرُش كِبْدُه سِمَاد
و ع يِزْدَاد سُمْرَة
وضْمُور..
وسَاعِة الْحَصَاد
ع يَاخُد الْحَرَامِية السََّنَابِل
و ع يدْوُّه هُوَّ الخَابُور!!
ويْقُول عبدالصَّبُور:
النَّخَل لُه الشِّمُوخ
ودْيُول الْكِلاب لَها الْهَزَّة!!
والطَّيبين لُهم الدِّمُوع
والنَّصَابِين لُهم الْمُتْعَة
والَّلذة!!
ف عيشوا
فى الْعَتْمَة سِنين
لجل ما يعِيش فى الُّنُور
الأخوة فى غَزَّة!!!
ويْقُول عبدالصَّبُور:
الشَََّمس مَا خَمَّرِتْشِى الْعِيش
وعَمِّنا الطِّيب
بَطَّل على عِشَشَنَا يِدُور
وبْدَال مَاكُنَّا مِرَايِة الْسَّمَا
صَابْنَا الْعَمَى بالْدُّور
ف فتِّحُوا عِينيكُم
وأتْشَعْلَقُوا فى خِيط النُّور
واحْضُنُوا فتافيت الأمل
اللى نَبَّتت فى ريْحِة التُّرَاب
دا ريحة التراب
هىَّ اللى هَاتِحْمِيكُم
مِن شِتَا
طَويــــــــــــــل مسْعُور!!
ويْقُول عبدالصَّبُور:
شِيح ف الْحَلْق
شِيح ف الْكْعب
شِيْحَة زى كُرْدَان فُوق الْقَلب
شِيييييييييييييييييييييييييييح
والشِّيح يَعْنِى الصَّبْر
والجَّنَة وهْمْ
عَ يِضْحَك بيه الْكَهَنِة ع الْخَلْق
والصِّقُور ع الطِّيور!!
ويْقُول عبدالصَّبُور:
السُّوَاقِى إتْمَلَتْ عَفَاريت
والْحَمَام أصْبَح غَتِيت
والزِّيَار رَشَحِت مِلْح
والنَّاس أَكَلِت الصَّخَر
والإحباط
والصِّرَاصِير..
وطَلَع للعَقَارِب أجْنِحَة
وقَتَل الأخ أَخُوه
على شِويِّة صِير..
وأدِى الْعُمْدِة
عَ يِتْحَامَىِ ف مْرَاتُه
وأدِى الجَّبَل
عَ يِتْحَامَى فى الْغُور!!
ويْقُول عبدالصَّبُور:
نَبَّت الْهِيش ف الصَّخر
وطَلَّعِت الْخِيبة الْلِسِان ..
وَأْدِينِى ف خَرِيِف الْعُمْر
بأعترف إنِّى
ماقَادِرشِى أشْتَرِى جَزْمِة!!!
ومِتْأكِد
إنِّى لى مَالِيش لازْمِة
ومِتْهَيَّألِى كَمَان
إنِّى هَامُوت
وأنا مِش مَسْتُور !!
ويْقُول عبدالصَّبُور:
بَنَات النَّاس
لِبْسُوا الجَّلابِية فُوق الْلَحَم
رِقَابْهُم كَلَبَش فيها الْحَلَب
نَامُوا مِنْ غِيرعَشَا..
بَنَات النَّاس
ريحْهُم مَشَى ..
وبِقِيت كَرَادِينْهُم الدَّهَب
أرْخَص مِن الْلُقَمَة !!
وبِقِيت مَلامِح الْعِز فى وشُوشهُم
عَلَى لِسَان الْغَجَرمُسْخَة !!
ولا (رع )
قَلْبُه رَقّ عَليهُم
ولا صْحَابْ
ولا أهَلْ
ولا أخْوَة!!
ولا حنّت عليهم سَمَا
ولا سَأل فيهم القصر
ولا حَدَف لِهُم غِنْوُّة
فى يوم عصفور
ويْقُول عبدالصَّبُور:
الْحَرَامِية
سَرَقُوا حتى التِّرَاب!!
والتَّعَالِب كَمَشِت
لحد مَا أَكَلُوا الْعَنَبْ!!
ف سِيبكُم
من الْقَعْدِة ع الْكَنَبِة
وسيبكُم
من مَصْمَصِة الشَّفَايِف
والْعَجَبْ!!
دا الْحَلّ مِشْ فى الدَّهَشِة
إنَّمَا الْحَلّ
هُوَّ الْغَضَبْ!!
ويْقُول عبدالصَّبُور:
خَيَّمْ الْحُزن ع الرَّهَبَة
وشَاخِت قُلُوب الْعِيَال
وشِرِبْ النَّاس الْعَطَشْ
واتْغَطَّوا بضِل النَّخْل
والصَّبر
والْعَشَم فى بُكْرَة
والْهَلاهِيل..
يا جِيل
جَاب لِنَا النَّكْسِة
ليه قَتَلْتُوا بَعد مِنْكُم
ألف جِيل؟!
وليه طَبَّلْتُوا للتَافِة؟!
وسْرِقْتُوا الْغِنْوَة من قَلْبِنَا الْعَيِّل؟!
اللى قَادْ رُوْحُه شَمْعِة
عَشَان يهشْ الضَّلْمِة
وقْت انْقِطَاع النُّور!!
وعَشَان يِطَرِّى ع الْقِلُوب اللى نِشْفِت
من كَاس الْمَرَار
اللى من سنين ع يدور!!
ويْقُول عبدالصَّبُور:
خَايِف أَبُوح لِكْ
تِرْمِى الأمَل فى النِّيل!!
خَايف أَخَبِّى فى قَلْبِى
تِقُولِى عَلَيَّا تَقِيْل!!
خَايِف أَلَمِّح
وأرْسِم عَلَى الْمَنَادِيل!!
وأشْكِى لأصْحَابِى
وأبْعَت عِتَاب للنِّيل!!
وأقُولُّه :
تَايِه مِنْ غِيرشَفَايْفِكْ
ضَايِع
ومْحَاصِرْنِى الَّليل!!
خَايِف أقُولُّه يِقُولِّك
تِزْعَلِى مِنِّى
وتِخْطِئِى التَّأْوِيل !!
ويْقُول عبدالصَّبُور:
كِْترِتْ الْغِيوم على الأسْوار
وعَطَىَ الْمَلِك ضَهْرُه للرَِعِية!!
وِسَلَّمْ وِدَانُه
وِكَيَانُه
لوَاحْدِة مِشْ هِىَّ !!
عَمَلِت منُّه سِمْبِلِة
وِعَمَلِتْ مِنُّه شُخْشِيخِة
تِقُولُه : شرِّق يا سُوْنَا
يِشَرِّقْ
غرِّب يَا سُونَا
يغرَّب
لحدّ مَاصِغِر
وخَاْرِت الْهِمِّة
وعَطَانَا أكْبَرخَاذُوق
ولبَّسْنَا فى الْعِمِّة!!
وفَضَّى مَصَارِين الْبِلاد
للْعَجَمْ
ولِعِبْ دُورالطَّّرْطُور!!
ويْقُول عبدالصَّبُور:
عَْايِز حَجَرْ
وأَزْمِيلْ
أنْقُشْ أُوجَاعِى عَلِيْهُم..
عَايِز وَرَقِةْ بَرْدِى
وِرِيْشِة تِكْتِب اللى هَايِكْويْهْم..
عَايِز صَبْرنَبِى
وِعِنْدّ فَلاح صَعِيْدِى
وِمَقْبَرَةْ فى سَابِع أَرْضْ
تِتْفَتِحْ بَعْدّ مليون سنة
ف يْشُوفْهَا أَحْفَادْنا
ويْقُولُوا:
شُوفُوا اللى حَصَل لْلبَلَدْ
عَلَىَ ايْدِيْهُم!!
ويْقُول عبدالصَّبُور:
كَرْمَشِة وشِّ الْوَلايَا
تَحْت سَقِيع الظُّلم..
صَفَار وشِّ اللَّحَادين
فى بداية الْعُمْر..
مَلْمَس الأرض لجَبِين الْوَرْنَاشِين
حِيْرِة الْفَلاحِين..
حُزن الْحَلَب..
ِرِقِّة قَلْب بَيَّاعِين الْبُوظَة
والتِّرُمُس..
أديِّنى شِويِّة ياعَمّ
يِدِّيِنِى
والدَّمْعَة فى الْعِيون تِرْمِش..
زى دَمْعِة غَفِير النُّقْطَة
والْفَرَّاش
وِالْبَطََلْ اللى كان صُبْح ليْلَنَا فى الْحِرُوب
والْمِزَيِّن اللى رِجْلِيه حَافْظَه الدِّرُوب
والْمِقَرِقِرِين فى الجِّرُون ..
اللى واقْفِين فى نِهَاية الْعُمر
بين الصَّبر
والْجِّنُون ..
ف بصوُّا لِتَحْتّ مَرَّة
وازرعوا ضحكة فى الرَّمَاد
واعملوا حسابنا
وأنتوا ع تنتشوا
وياريت تسجِّلُوا أسامينا
فى دفاترالْحِضُور
ويْقُول عبدالصَّبُور:
يا حَلاوِة قُصُورالْحَاْشِية
وِيَا جَمَالهَا
هِىَّ مَلْفُوفَة فْ رِيش النَّعَام..
والنَّاس عَ تِتْعَرَّا
عَلَشَان تُسْتُرعِيَالْهَا !!
ويْقُول عبدالصَّبُور:
مَا تِبُصِّش للحِيْطَان
دا فى الْحِيْطَان غَضَبْ
مَا تِبُصِّش فى الْوِشُوُش
دا فى الْوِشُوُش تَعَبْ
مِاتِبُصِّش ع الْقِلُوب
دا ف كُلّ قَلْب عَاْيِش
تِمْثَاْل لأبُولَهَبْ
وف كُلّ عَقْل خِيْمِة
وغَنَمْ حَوالِين الْوتَدْ
وكَأنِّنا مِشْ أحْنَا
اللى عِرِفْنَا الله
مِْن بِدْءْ الأزَل
وكَأننِّا مِشْ أِحْنَا
اللى فَتَحْنَا طَرِيْق
من طيبة للسَّمَا
وكَأننِّا مِشْ أِحْنَا
اللى ِمَلينَا الدُّنْيَا حِكْمَة
وِعَدْل
وسماح
ومَعَابِد
وِنُور!!
وكأننا مش أحنا
اللى شربنا من النيل
ولعبنا فوق الطور!!
ويْقُول عبدالصَّبُور:
يَا قَصْرعَالِى السُّور
مَاتِكْسِرشِى
والَّنبِى صُوْتِى..
دا أنا اللى بِعَرَقِى بَانِيْك
مَاتِقُول يَا نَبُّوتِى..
ولا أنْتَ رِضِيت بالجُبْن
وِنَزَلْت مِن فُوق هَرَم الرِّجُولَة
لنِقَّاعِة الذُّل..
بَقِيْت مَدَاس لِلِكُلّ
وعَبْد للمَأْمُور!!
ويْقُول عبدالصَّبُور:
الْلِى رَفَضْ يِحيِّى الْعَلَمْ
والْلِى قَعَدْ
يُوم مَا وَقَفْ
يِهْتِف الْجَمِيع مِنْ قَلْبُهم لِيْهَا
إزَّاى
تِسَلِّمُوه مَفَاتِيْحَها؟!
وإزَّاى
يُبْقَا وزير فِيْهَا؟
ويْقُول عبدالصَّبُور:
(السَّاعِة أتْنِينْ
يُوم لاتْنِيـــنْ
صَابْتِك عِينْ)
يَا بَـــــــــدَارِى !!
سَقَط النُّــــــــــوَّارْ
مِن لَهَب النـَّــــــارْ
وِزَاد الْمـَــــــــرارْ
فى الشَّهد الجَّارِى..
واه يا بــــــدارى!!
ســَــــــــــــــالَّ الدَّمْ
وأشْــــــــــرِبت الهَّمْ
وادينــــــــــى يَا عَمّ
بقيت واحدْ
.. أنا و مرارى
واه يابَدَارِى !!
النَّخل أهُو مَالْ
والْغُلب أهوطَالْ
وكُنَّا ف حَالْ
وبقينا ف حَالْ
عِنَدِى
وهارى..
وآه يابدارى!!
إتحكّم فيناْ
اللى مَاهُوش لِيْنَاْ
وبَقِيْنَا ع نتدّفا ببعضيناْ
ولا حد سامعْ
ولا دارى..
واه يابدارى!!
ورُمَّانِى لأحْمَرْ
بَقَا لُونه أسْمَرْ
وعَنَبِى لأخْضّرْ
حَرَقُه
وحَرَقْنَا الْبِنْدَارِى..
واه يا بدارى!!
ويْقُول عبدالصَّبُور:
الْلِى عَاش الْحَيَاة
حَازِم قَوى
وصَارِم..
والْلِى إتْعَوَّد عَلَى الطَّاعَة
وتَنْفِيذْ الأوَامِر..
الْلِى لا بِيْنَاقِش
ولا بِيْفَكَّر
ولا بِيِتْأَمَّل..
إزَّاى هَايكُون رُبَّان للسَفِيْنِة
فى زَمَنْ التَّحُوُّل؟!!
ويْقُول عبدالصَّبُور:
يَالْلِى مِعَاكْ قَالِب
وعَايزتِصُبّ الرِّجَال فِيه
عَلَىَ كِيْفَك !!
وَقِّّف شِوِيِّة
وِبُصْ حواليك
هَاتْلاقِى فِيه إخْتِلاف
بيْنَك
وبيْن طِيْفَك..
وفِيه رِجَال أحْرَار
لاتِمْلا إنْتَ عِيْنِيْهُم
ولا يِهزّ شَعْرَه منْهُم
كُل كِدْبَك
وتَخْرِيفَك..
عَشَان كده
وقِّّف شوية
وأرْكِن الْقَالِب
وحُطّ ف دْمَاغَك
إنْ الْمَسْخ مَغْلُوب
وإنْ التَّنُوُّع
هُوَّالْلِى هَايْضِيف لَكْ..
وهُوَّالْلِى هَايِخِّلى الرَّمْلِة وَرَدْ..
وهَايدِّى الْقُوَّة للأيد
الْلِى رَاح تِمْسِك بِها سِيْفَكْ ..
ويْقُول عبدالصَّبُور:
إبْعِدُوا الْفَرَاشِة عَنْ الضِّى
وَخَلُّوا النَّحْلِة
مَاتْْْحُطِّش غِيرعَلَىَ وَرْدِة
وسَاْعِتْهَا
هَاخَلِّى قَلْبِى يِبَطِّل شَقَاوَة
وبْدَال مَاهُوْطَايِح ف الْبَنَات
هَاخَلِّيه
مَايِعْشَقْشِى غيرواحْدِة !!
ويْقُول عبدالصَّبُور:
بَلاش تُرْفُض لَذِّة الْوُاقِع
وتْكَلْبِش ف لَذِّة الأوْهَام..
وتِحْلَم بِجَنِّة
وتِسْتَمْتِع بِطَرَاوِة الأحْلام..
وإنْتَ لا غَسَل النَّدَى كُفُوْفَك
ولاصُنْت الْلِى مِعَاك مِنْ الْمِيْلِة..
ولا صَاحَبْت الأمَل فى الْغُرْبِة
ولا رُحْت تَرْحِيلة..
ولا فى يُوم زَرِعَتْ عُود حِنِّة
ولاربِّيت حَمَام..
ف مَاتْصَدِّقشِى
الْلِى بِيرْمِى بذْرِتَك ف النَّار
وبيقولك :
مُوت عَشَان مَاتُدْخُل الجَّنِة
حتَّى لَو كَان الإمَام!!!
دا الجنة للشقيانين
مِشْ للى عَاشُوا حَيَاتهُم
متشعلقين فى حبال الوهم
وزيف الخدع
وبريق الشِّرُور
ويْقُول عبدالصَّبُور:
بالإبْرِة أنْقُّش
فُوق قَلْب الألمْ..
يَا تْمُوت شَهِيد
يَا تِرْفَع فُوق جَبِيْنَك الشَّامِخ
مليون عَلَمْ..
وأوْعَا تِحْبِس الْكَلام ف الْبُق
دا حَبْس الْكَلام
هُوَّ الْوَجَع
والألَمْ..
وهُوَّ إنْكِسَار الرِّجُوْلِة
والتُّوهَة
والْعَدَمْ!!
ويْقُول عبدالصَّبُور:
يَا سَاكِن الْقََصْر
أيَّام السَّنَة قَلُّوُا
والْحِدَّايَات خَطَفِت الْكَتَاكِيت
وِعَطَتْهَا للى أحْتَلُّوُا
يَا سَاكِن الْقَصْر
شَعْبَك قَضَمْ ف الصَّخَرْ
والْعِدَا مِنْ نَعِيم بِلادِنَا مَلُّوُا
وِرُوحْنَا بِقْيِت فِى مَنَاخِيْرنَا
والْعَفَارِيت مِنْ وشِّنَا طَلُّوُا
رَدّ سَاكِن الْقَصْر
وِقَال :
خَلِّيهُم يِشْكُوا
ويِبْكُوا
ويحْكُوا
ويِتْسَلُّوا!!!
ويْقُول عبدالصَّبُور:
مَفِيش أمَل ف الْعَقْل
والْحَل هُوَّ الْجِنُون
ف شُقُّوا جلُود الصَّبر
واصرخُوا
وهزُّوا الْكُون
أخَدْنَا أيه م الْحَمَامِة
وفَادْنِا بأيه الزَّتُون
غِير زادْنَّا فَقرعلى فَقر
ف سيبْكُم بَقَا م الْعَقل
وتعالوا
نِصَاحِب الْجِّنُون
ويْقُول عبدالصَّبُور:
الْعُوم مَعَ التيَّار
سَهل وسَريع ومُريح..
(ف) عُومُوا
لحدّ مَا الْبِيَار تِطْرَح أفَاعِى
والْمَانجة تِطْرَح مَرَار..
إنَّما أنا هَاعْمَل عَبِيط
وهَاعْنِد ــ ألف مَرَّة ــ مَعَ التّيَار..
وابقُوا شُوفُوا
مِين الْلِى هَايِلْبِس بُكْرَة فى ضَلْمَة كُحْل
ومين اللى بُكْرَة
هَايْجِيب النًّهَار؟
ويْجِيب الْعَسَل
للى عَاش مَكْسُور
ويْقُول عبدالصَّبُور:
مِين يِرَجِّع لِقَلْبِى قَسَاوتُه ؟
مِين يِرَجِّع للفَارِس صِمُودُه؟
مِين يِرَجِّع للحَقّ نَدَاوتُه؟
مِين يَاخُد النَّبِى..
مِن حُزْنُه
وشِرُوْدُه؟
أنا اللى مَاشِى أشُرّ مَرَارْ
نُصِّى يِقُولِّى:
رُشّ ع الْكِّدب مُرّ الْحَقِيقة
ونُصِّى يِقُولِّى:
مَفِيش فَارِس مَاخَانْشِى جِنُودُه
ف كَبِّردِمَاغَك
وِكِدَه أو كِدَه
الْقَصرصَهْيَن
ورَاح فِى شِرُودُه
وغَاب ع الْحِضُور!!
ويْقُول عبدالصَّبُور:
بتطَالِب مِين ب أيه
وأنْتَ الْمَلِك يا بيه
وأنْتَ بس اللى ف أيدك
حلول للى أحنا فيه ؟!
طب أزاى وكيف وليه
تُصْرُخ زيِّنا؟!
ولاّ هُوَّ خَلاص
اللى إتْعَوَّد ع الْحُزن
لازمن يا خلق يصرخ
حتى لوكان الفرح
لعبة بين أيديه؟!
ويْقُول عبدالصَّبُور:
ما بين الضَّلمة برَّة الُّرُوحْ
وبين النُّور فى الْحَشَا
هَاتِلْقَا قَصِيدةْ !!
وبين الْقَصِيدة والْقَصِيدةْ
قَرَادِة ع تمُصّ فى دمِّى ..
أنا اللى ماشى متغمِّى
ورا أحْلامْ
يا ما حَكِيت لَهَا فى الضَّلْمَة
مِنْ قَلْبِى أَحْلَى حِكَايِة
عَشَان مَا تَنَامْ
لَكنَّها فى كُلّ مَرَّة ع تِنَيَّمْنِى
وتِسْرَح هِىَّ فى الْمَلَكُوت
وتْسِيبْنِى أصْحَا عَلَى وَاقِع
أتْقَل من خَبْطِة النَّبُوت
أنا اللى قلبى عَيِّل مَلْيَان حَيَاة
وأنا اللى شَبَابِى أتْرَصَدّ للْمُوت
وهوَّ ع يِنْحَت النَّشُوة فى الأحْلام
أخيراً
جَانِى الْيُوم اللى بَقِيت فِيه مَنْحُوت
فى الْوَاقِع
وفى الْقَصِيدة
أنا يا هلترى أيه؟
حَبِّة عِطر فُوق جِنَاح الْوَهمْ
ولا حَبِّة عَرَق
نَزَلُوا ع الْحَصِيدة
تحت ضحكة ع تبكى
ورا شجرة يأسْ
فى قَلب حِلم للطيبين مَكْسُور؟
ويْقُول عبدالصَّبُور:
هَاخْلَع تَاج السِّياسِى
وهَاعْشَقِكِ أنتى
يا مَزِّيكَا صَابحَة
ع ينام على خدودها النَّدَى
يا أحْلَى وش
ع يجى فى الضَّلمِة عَلَيَّا يِطُلِّ
يا رطبة زى اللبن</s
