انا كنت محتاجه احكى حكايتى علشان الناس كلها تشهد عليا وعلى اللى كنت بعمله وانى اصلح غلطتى ودا كان شرطه الوحيد علشان يسيبنى اعيش ...

انا اسمى آمال كانت حياتى عاديه ويمكن اقل من العاديه وعمرى ما تخيلت انى اعيش يوم واحد من اللى انا عشته انا ساكنه فى منطقه شعبيه وبيت زى اى بيت. امى ست طيبه بسيطه اوى ممكن الحاجه الغريبه فيها انها كانت بتخاف من ابويا قوى انا مش فاكره قوى علشان امى توفت وانا عندى عشر سنين واخويا الوحيد سيد كان عنده 15 سنه. وبعد اقل من سنه ابويا سابنا ومشى حتى انا مش فاكره شكله ودا اللى وصلنا للنهايه اللى هاحكلكوا بس كل اللى فاكراه عن ابويا انه كان بيحب يقعد لوحده طول الوقت وكان تقريبا مبيشتغلش لكن ممكن يغيب كام يوم ويرجع معاه فلوس تكفينا شهر او شهرين محدش يعرف بيجبها منين بعد ما ابويا سابنا لوحدنا انا واخويا سيد اضطر يسيب المدرسه علشان يصرف علينا علشان احنا مقطوعين من شجره لكن كل جيرانا وقفوا معانا علشان احنا زى ما كانوا بيقولوا لسه قطط مغمضه. سيد حاول يشتغل اى حاجه علشان يجيب فلوس وفعلا الناس كانت بتزوده فى اليوميه علشان ظروفنا.

المهم احنا فقدنا الامل فى عوده ابويا وهوا ملهوش اثر فى اى مكان حتى المستشفيات أو الاقسام ولا حتى المشرحه.

الكلام دا عدى عليه حوالى 5سنين و فى يوم سيد اخذ قرار أنه هيخلينا نعيش حياتنا فى ندم !!

انا مش هنسى اليوم دا ابدا كنت لسه جايبه النتيجه بتاعت الاعداديه وكان كل حلمى ادخل ثانويه عامه لكن سيد قالى على بلاطه ظروفنا ماتسمحش ولو انتى عايزه تكملى قدامك يا ثانوى تجارى او ثانوى تمريض والتمريض احسن علشان شغله مضمون مش هاكدب عليكوا انا اتنكدت بس كنت عارفه انه معاه حق فى نفس اليوم بالليل لقيت سيد داخل ومتعصب تقريبا اول مره اشوفه بالشكل دا قعد يزعق ويكسر اثاث البيت وصوته عالى كل اللى انا فاهماه من كلامه "هو ليه عمل فينا كده !!" وقعد يكررها اكتر من مره فسألته ... سيد انت بتتكلم عن مين فبصلى وهو متردد وسكت شويه وقالى بتكلم عن ابوكى طبعا هو فى غيره. مش هو اللى سابنا لوحدنا عيال صغيره مانعرفش حاجه عن الدنيا انا سيبت تعليمى وانتى اهه هتضحى بالمجموع الكبير الللى انتى جايباه علشان ظروفنا متسمحش تدخلى ثانوى عام او جامعه وبعد ما خلص كلامخ لقيته قام وقف وسكت خااااااااااااااالص وبيبص على الاوضه اللى ابويا كان بيقعد فيها لوحده.

آه انا نسيت اقولكوا ان احنا من يوم ما ابويا ساب البيت مفتحناش الاوضه دي لان احنا الاتنين بصراحه كنا بنخاف منها !! مش هقولكوا بيطلع منها اصوات ولا نور ولا اى حاجه !! بس كنت بحس وانا ماشيه جنبها ان جسمي كله بيقف وقلبي كان بيتقبض قوي ... فجأة !! لقيت سيد رايح ناحيه الاوضه وحاول يفتح الباب بس الباب كان مقفول بالمفتاح تقريبا وانا ببصله ومش قادره اتكلم كل اللى بفكر فيه بيني وبين نفسي انه بلاش يفتحها... فجأة !! لقيته راح المطبخ جاب سكينه ورجع تاني قعد يحاول يفتح الباب قلتله انت بتعمل ايه !! لقيته بيقولى انا هفتح الباب و ندور فى الورق اللي جوه يمكن نشوف اى ورقه نعرف منها اى معلومه عنه... وفعلا فتح الباب ومفيش حاجه حصلت... نورنا النور لاقينا الاوضه مليانه تراب كتير وده طبعا لانها مقفوله بقالها سنين وكان فيها كراتين كتير.

بصيت لـ سيد كنت حاسه انه مسيطر على فكره انه يدور ويلاقى أى حاجه حتى التراب والعفره مفرقتش معاه... انا بصراحه خوفت ادخل بس كنت واقفه عند باب الاوضه ببص عليه.

المهم سيد قعد يفتح الكراتين وكل شويه وشه عمال يصفر اكتر ولقيته جايب كتابين وجاى عليا وبيقولى انا عرفت يا هانم ابوكى كان شغال ايه !! ابوكى كان شغال في السحر والاعمال ... قولتله بتقول ايه راح رازع الكتب على الترابيزه وقالى اتفرجى كده على اللي موجود في كل الكراتين اللى جوه مفيهاش غير كتب عن السحر وبس ... انا معرفتش ارد عليه من الصدمه ولكن كنت متوقعه دا لان ابويا كان فيه حاجه غريبه مفيش بنى ادم طبيعى يسيب عياله ويمشى !! ببص على سيد لقيته بيبتسم وقالى انا كمان هاعمل زيه وهشتغل الشغلانه دي لانه شغلانه مش متعبه وفلوسها كتير ورزق الهبل على المجانين !! بصتله وقولتله سيد انت بتقول ايه قالى بقولك اللى هاعمله انتى عاجبك بهدتلى طول النهار فى الشمس والتعب وفى الاخر الفلوس اللى بأخدها مبتكفيش حتى ناكل عيش حاف قولتله هو انت هاتفهم فى الحاجات دى ازاي يعنى !! لقيته بيقولى هو انا هاعمل دكتوراه هما كتابين هانقراهم وكلمه من هنا على كلمه من هنا وخلاص ... وفعلا سيد لم كل الكتب والكراتين ودخلها اوضته وقفل عليها.

طبعا سيد ساب شغله واتفرغ لقراءة الكتب دى وبقى بيعمل تجارب ساعات الاقيه بالليل راسم رسومات غريبه فى الارض ومولع شمع وساعات بيدبح طيور فى الرسومات دي و واحده واحده ابتدى صيته ينتشر فى المنطقه انه دجال شاطر والفلوس بقت كتير والعيشه ارتاحت بس انا مكنتش مرتاحه وتقريبا فى الوقت دا خلصت دراسه التمريض وكان كل همى انى الاقى شغل بدخل ثابت واخلى سيد يسيب الحاجات اللى بيعملها وفعلا لقيت شغل فى مستشفى خاصه وكان همى اخد نبطشيات بالليل علشان مكنش موجوده فى البيت فى الوقت اللى كان سيد بيعمل فيه الحاجات دى ...

المهم عدى على شغلى تقريبا سنه فى المستشفى واتعرفت على زمايل فى الشغل وطول السنه دى بحاول اتحايل على سيد يسيب شغل الدجل اللى بيعمله ... من ضمن الناس اللى اتعرفت عليهم الست محاسن مغسلة المشرحه كانت بتعتبرنى زى بنتها وانا كمان كنت بحبها جدا .. اكتر واحد فرح بالصحبيه دى سيد اخويا انا كنت فاكره انه فرح علشان لقيت حد يتعامل معايا زى امى بس اتضح انه فرح علشان حاجات تانيه خالص لانه ابتدى يطلب منى حاجات غريبه زى انه ادانى حاجات وطلب منى احطها فى كفن الميت ولما قولتله ازاى !! قالى انتى سهل اوى تدخلى المشرحه وتحطى الحاجات دي وسط الكفن ... فى الاول رفضت ولكن بعد الحاح كتير منه وبعد ما قالي وطمنني ان مفيش اي ضرر عليا وافقت.

بدأت اخد الحاجات دي منه وفعلا كنت بدخل المشرحه من وراء الست محاسن او عم احمد ... مكنتش متخيله ان اللي بعمله دا غلط بس صدقونى انا عرفت ان اللى انا عملته دا كان غلط والميتين فعلا بيتازوا من الورق دا قعدنا على الوضع دا سنتين تلاته محصلش حاجه ولا حد خد باله ولا محاسن ولا عم احمد لحد ما فى يوم من الايام كان فى جثه راجل كبير فى السن كان اليوم دا سيد مدينى عمل علشان احطه وكالعاده نزلت المشرحه وقعدت اتكلم مع عم احمد لحد ما خرج يعمل حاجه بره روحت بسرعه ناحية الجثة وحطيت العمل فيها قبل ما اهل الميت يستلمو الجثة ... وروحت البيت عادى بس الليله دى ماكانتش زى اي ليله ... كانت حوالي الساعه 12 بالليل لاقيت نور الاوضه بتاعت ابويا نور لوحده !! والباب بدأ يتفتح لوحده.

انا جريت على اوصه سيداخويا لقيته قاعد بيقرا كتب ابويا قلتله سيد الحقنى اوضه ابوك قالى مالها قلتله النور ولع والباب بيفتح قالى انتى هبله الحاجات دى احنا اللى بنعملها مش هايضحك علينا بيها وقلتله لا تعالى بص جه معايا ولاقينا النور والع والباب مفتوح لحد الاخر وعلى الارض وجدنا ورقه مكتوب فيها ستتمنون الموت بعده النور طفى والباب اتقفل فضلنا فى الصاله و الورقه فى ايدينا معرفناش ننام طبعا وتانى يوم نزلت وانا بفكر فى االلى حصل ومين اللى عايز يقتلنا وهل دا ليه علاقه بالدجل اللى بيعمله سيد ولا لا واشمعنى المره دي ... ما احنا بقالنا سنين على نفس الحال ولا دا ليه علاقه بالجثه بتاعت امبارح !!

روحت الشغل تاني يوم وخوفت حتى اقرب من المشرحه مش عارفه ليه بس كنت خايفه جدا... اول ما رجعت البيت جريت على اوضه سيد علشان اشوفه عمل ايه لانه طبعا كان مقضى الليل كله فى قرايه الكتب وتحضير الجن لانه طبعا عايز يعرف ايه الحاجه الغريبه اللي حصلت ... بس ملقتش سيد موجود فى البيت مع ان دا ميعاد بدايه شغله.

دخلت الحمام علشان اخد شاور وافوق علشان هموت من التفكير واول ما دخلت الحمام لقيت مرايه الحمام منوره جدا !! أنا شوفت المنظر دا وقفت في مكاني معرفتش اتحرك ولكن كان في حاجه جوايا بتقولي ابص على المرايه ... وفعلا كان الفضول اقوى منى و روحت ناحية المرايه علشان ابص عليها ولكن !! الغريبه انى ماشوفتش صورتى فى المرايه كل اللى شوفته جسم متغطي بكفن وماسك فى ايده عمل... محستش بالدنيا الا وسيد بيفوقنى وقعد يقولى مالك ردى عليا فى ايه !! وانا كل اللى بقوله "الكفن ... العمل" ولكن اول ما فوقت شخطت فيه بصوت عالي انت كنت فين ؟؟ قالى مفيش كنت بشوف ناس من اللى شغاله نفس شغلتى علشان يفهمنى ايه اللى حصل امبارح.

قولتله ووصلت لحاجه قالى موصلناش لاى حاجه كل ما حد يحاول يعرف مين دا ومين اللى باعته يقولى دا سحر انا عمرى ما استعملته ولا حتى شوفته قبل كدا فقولتله واحنا هنعمل ايه دلوقتي؟؟ رد عليا بكل سذاجه وبرود ... تلاقى واحد بينافسى فى المجال دا وبيحاول يخوفنى !! قولتله دجال وبينافسك انت اهبل يا سيد؟؟ دا طلعلى فى الحمام ... قالى الحمام !! حمام ايه ؟؟ مين دا اللى طلعلك فى الحمام ... انا مش فاهم حاجه قولتله الجثه والعمل ... قالي بالراحه كده واقعدي احكيلى ايه اللى حصل بالظبط.

بص يا سيد انا رجعت من الشغل والتفكير هيموتنى فوقلت ادخل اخد شاور يمكن دماغى تفك بس اول ما دخلت الحمام لقيت مراية الحمام مطلعه نور جامد ... فضولى قتلنى وروحت ناحية المرايه اشوف النور دا ايه ببص لقيت فيها جسم ملفوف بكفن ماسك فى ايده العمل اللى انت كنت بتخليني احطه جوه الكفن وبعدين اغمى عليا وانت فوقتنى.

سيد قالي اعقلى وبطلى تخاريف دا حد بينافسنى وبيخاول يخوفنا ... مقتنعتش باللى هو قاله بس سكت وخلاص بس قررت انا لازم اعرف ايه اللى بيحصل بالضبط ... واول خطوه هاعملها دلوقتى من غير اى تفكير انى هدخل الحمام و اقف قدام المرايه وانادي عليها !! وفعلا دخلت وعملت كده والغريبه اني لاقيت صوت بيرد عليا !! قالى انتى جاتلك الجراه تندهيلى بعد ما دنستي كفني انا هاخليكم تتمنو الموت واخليكوا متعرفوش توصلولو ... قولتله انت مين انا عملت لك ايه انا معرفكش !! قالى لالا انتى عارفانى كويس على العموم الحاجه الوحيده اللى انا متاكد منها ان انا اخر واحد هاتحطوا عمل فى كفنه ... واختفى و برضه مفهمتش حاجه ... الحاجه الوحيده اللى فهمتها من الكلام دا معاه ان الموضوع ليه علاقه بالموضوع بتاع سيد ودى اخر جثه حطيت فيها العمل.

خرجت من الحمام وانا مقرره انى هاروح بكره المستشفى واعرف كل حاجه عنه وفعلا نمت وقومت روحت المستشفى تاني يوم و اول ما دخلت روحت على المشرحه جريت على عم احمد اساله .. قولتله عايزه اعرف الراجل اللى انت غسلته اول امبارح دا اسمه ايه لقيته بيقولى اشمعنى يا آمال انت عمرك ما سآلتى عن حاجه بالشكل دا قولتله ابدا عادى يعنى كنت بشبه على اهله ... المهم طلع دفتر تسجيل الموتى وقعد يدور لحد ما قالى اسمه "احمد سلطان المليجي" انا مسمعتش اى حاجه تانى والدنيا اسودت فى عينى واغمى عليا وصحيت لقيتنى فى اوضه فى المستشفى ومعايا الست محاسن وبتفوقنى وبتقولى ... آمال آمال مالك يا بنتى !! فيكى ايه قولتلها مفيش انا عايزه اروح بس روحوني من فضلكم.

وفعلا روحت واول ما دخلت البيت بقيت انده على سيد قالى فى ايه يا آمال قولتله مصيبه يا سيد !! قالى مصيبه ايه يا آمال فى ايه ... قولتله انت عارف الراجل اللى احنا حطينا العمل فى الكفن بتاعه اخر مره دا يبقى مين ... قالى لا طبعا معرفش هيكون مين يعنى؟؟ قولتله ابوك !! وشه اصفر وقالي بتقولى ايه ... قولتله زى ما سمعت يا سيد ابوك ... الاستاد احمد سلطان الميلجى.

قالي يا نهار اسود !! ابويا ازاي دا حصل ... كل اللى جه في بال سيد انه حط العمل في جثه ساحر ... طب ايه العمل دلوقتى !! قولتله ما تجيبش سيرة الاسم دا تانى انا مش عايزه اسمعها تانى انا مش هعمل اى حاجه تطلبها منى تانى ... قالى طيب خلاص اهدى اهدى .. طيب ايه الحل دلوقتى قولتله حل ايه !! انت اللى ورطتنا الورطه دى ولازم انت اللى تحلها دا قالي هموتكم ... قولى بقى انت ايه الحل قالى يا بنتى يموتنا ايه انتى بتصدقى !!

دخلنا نمنا وتانى يوم الساعه 12 باليل لقيت سيد بيخبط على باب اوضتى وبيقولى انا لقيت الحل !! قولتله حل ايه يا سيد قالى هنحضر روح ابوكى !! قولتله انت مجنون يا سيد دا من غير ما نحضره معفرتنا ... قالى هى ملهاش غير الحل دا ... ساعتها حسيت ان سيد اتجنن وفعلا شدنى من ايدى ودخلنا اوضه بابا ولقيته مجهز القعده وحاطط ورق عليه طلاسم والارض مليانه دم والاوضه مليانه شمع اول ما دخلت قفل الباب وطفى النور ولقيته بيقول كلام بالهمس شويه ويعلى صوته شويه مفهمتش من كلامه غير " الساعه الساعه ... الواحه الواحه ... العجل العجل ... اامركم بسلطان قيقعان ... وكل ممالك الجان ان تحضروه الان" وقعد يكررها كتييير وفعلا دى كانت اول مره اشوف جلسه تحضير.

كنت ميته فى جلدى و لقيت الى حضر كان جسمه اسود طويل ملهوش ملامح ومكان العين فجوه حمره وجو الاوضه بقى حر اووى ولاقيناه بيتكلم بصوت غاضب عميق انتوا عايزين منى ايه !! جايبنى هنا ليه !! انتوا عارفين نتيجه اللى بتعملوه دا هتكون ايه !! انا مقدرتش اقول غير كلمه واحده بابا.

سيد زعقلى وقالى اسكتى خالص وبعدين سيد قالوا انت عايز مننا ايه بتهددنا ليه قالوا يعنى انت مش عارف ان انت دنست جثتى حطيت فيها عمل سفلى سيد قاله هى دى مش كانت شغلانتك برضه ... وانت عايش وبتسخر الجن وبتعمل اعمال ولا انا غلطان !! ... الكيان دا غضب جدا و كان فى نار طالعه من عينه قالوا انت جبت الكلام دا منين !! سيد قاله مبتشبهش على البيت اللى انت فيه والاوضه اللى انت فيها انت فعلا ابونا وانا وصلت للى انا فيه علشان انت سيبتنا لو كنت فضلت معانا زى اى اب ماكناش وصلنا للى احنا فيه ... الكيان غضب اكتر من الاول !! وقاله انا سيبتكم علشان احميكم مسيبتكوش علشان اهرب من المسئوليه ... سيد قاله اااااه تحمينا من ايه بقى !! قاله احميكم من الجن اللى معايا بس يا ابنى عمرى ما فكرت اضركم معايا ... انا هحكي لكم حكايتى يا ابنى ودا حقكم عليا...

وبدا الكيان يحكى ويقول وانا صغير كان عندى فضول بالحاجات دى و فضلت ادور واشترى كتب واقرا بس ... وانا بجرب مكنتش عارف عواقب الموضوع دا لانى حضرتهم ومعرفتش اصرفهم فضلت اهرب منهم وفاكر انى ممكن اهرب منهم ... وبعدين اكتشفت انى مستحيل اهرب بدات اقرا اكتر علشان اعرف اتحكم فيهم ازاى علشان اسيطر على الوضع اللى انا فيه مش اكتر وفضلت احاول اسيطر عليهم ... وكنت قادر لحد ما امكم ماتت ومعرفش ليه اول ما امكم ماتت سيطرتى عليهم قلت اووى ... وخدوا بالكم انا مش بتكلم على جن عادى انا بتكلم على ملوك الجن لان التعويذه اللى انا حضرتهم بيها مكنتش اعرف ساعتها انها تعويذه ملكيه بتستحضر ملوك الجن وبعد ما امكم ماتت بدأو يفكروا في أزيتكم علشان اسمع كلامهم وكان مستحيل اسمح ابدا ان يحصلكم حاجه بسببي علشان كدا قررت ابعد عنكم علشان اقطع اى صله بينى وبينكم وحتى قبل ما امشى حطيت على كل واحد فيكم طلسم علشان يحميه لو فكروا يأزوكم وسبت البيت واجرت شقه فى مكان تانى وكل اللى كنت بفكر فيه ازاى ابعدهم عنكم ما انكرش انى ساعات كنت بفك اعمال مش بعمل اعمال يا سيد بيه ... عرفت بقى انى عمرى ما استعملتهم فى الشر وعرفت ان انا كنت بحميكم !! بس دا مايمنعش ان انتم لازم تصلحو غلطتكم ومش معايا انا بس لكن مع كل واحد حطيطوا عمل فى كفنه وعلى فكره لولا الطلسم اللى عليكم كانت اوراح كتير ازتكم ... على اللى انتوا عملتوه فيها.

سيد قاله يعنى انت عايزنا نروح المقابر نطلع الجثث نشيل منها الاعمال !! قاله ايوه لان بموتى الطلسم بطل مفعوله والارواح دى هاتازيكم وهاتخليكم تتمنوا االموت انا عملت كل دا اللي عليا وهددتكم وخوفتكم علشان احميكم منهم وتعرفكم ايه الحل لان هما ماكنوش هايجوا يقولولكم الحل ... وفي شرط تانى كمان لازم الناس كلها تعرف اللى كنتم بتعملوه يمكن الناس تسامحكم وربنا يسامحكم ... انا معنديش حاجه تانى اقولها انتوا حرين اختارو يا تعملوا اللى انا قلت عليه يا هتبتدى اسود ايام حياتكم.

واختفى الكيان من الاوضه وابتديت انا وسيد نبص لبعض ومش فاهمين حاجه وكل اللى طالع عليا اني بقوله انت السبب ودتنى فى داهيه حرام عليك ... ايه الحل دلوقتى انا مش عايزه اموت لقيته بصلى قوى وبيقولى وهو انتى مصدقه !! قولتله طبعا مصدقه و خايفه جدا ... انت ازاى مش خايف ؟؟

قالي واخاف من ايه الارواح عايزه تيجى تيجى كلها ... كل روح هتيجى عندى ليها 100 جن يحمينى منها ولا انتى فاكرانى خايب ... بعد كدا كل واحد فينا دخل على اوضته على اساس انه ينام وطبعا دا كان مستحيل بالنسبالى لان من كتر التفكير مش عارفه انام قعدت افكر فى اللى حصل ولكن غلبنى النوم ونمت وصحيت فجاه على صوت قطه بتنونو بشكل هستيرى ومرعب وصوت خربشه جامد ... قومت نورت النور ودورت فى البيت كله مش لقياها مع ان الصوت طالع من الاوضه بتاعتي قلبت الاوضه كلها وابتديت اركز على الصوت لقيته طالع من جدران الاوضه.

كل اللى جه فى تفكيرى ان القطه دى محبوسه فى الحيطه وبتحاول تخرج بس دا مش صوت قطه واحده دا صوت قطط كتير فجاه النور قطع صرخت بصوت عالي وندهت على سيد وفعلا سمعت صوت حاجه جايه بتجرى من اوضته لاوضتى قعدت اقوله يا سيد الحقنى انا خايفه ... مردش عليا فتحت كشاف الموبايل ويارتنى ما فتحته اللى شوفته كان كلب اسود كبير وقاعد يقرب منى كل ما بيقرب يكبر ويكبر وكنت بشوف ملامحه اوضح عينه حمرا وسنانه بتنقط دم قعدت اصرخ وانده على سيد ولكن صوتى مكنش بيطلع محستش بنفسى الا وسيد بيفوقنى قالى مالك فى ايه حكتله اللى حصل قالى متخافيش ... انا هعمل جلسه تحضير وهعمل طلسم يحمينا زى اللى ابونا كان عامله وهدانى وقعدت اقرا قران ونمت ويا رتنى ما نمت.

المرادى صحيت علشان مكنتش قادره اتنفس زر ما يكون فى حاجه على وشى مش مخليانى عارفه اتنفس حاولت احرك ايدى معرفتش كانها مربوطه اتفزعت ابتديت اتحرك بسرعه اكتر لانى حسيت ان جسمى كله مربوط ولكن كنت سامعه صوت زقزقه وحاسه ان فى حاجه ماشيه عليا وفجاه !! حسيت ان فى اظافر بتخربش فى وشى والدنيا ضلمه وانا مش شايفه حاجه وابتديت اشم ريحه غريبه عامله زى ريحه الميتين ... جيت اصرخ صوتى مطلعش وابتديت اعرف احرك ايدى واشيل الحاجه اللى كانت ربطانى ولكن الغريب ان ملمسها زى ملمس الكفن فابتديت اجمع تركيزى واكتشفت ان انا فى المقابر.

بدات اصرخ واقول الحقونى الحقونى والفران عماله تقرقض فيا زى ما اكون وليمه ليهم قعدت افتكر اى ايه قرانيه علشان اقولها مفتكرتش غير ايه الكرسى فجاه لقيت المكان بقى كله نور وفى حد بيقرب منى انا شايفه خيال بس وسمعت صوت بيقولى خلى اخوكى يصلح اللى عمله علشان نرحمكم من اللى احنا بنعملوا دلوقتى ... ورجعت الدنيا ضلمت تانى بس المرادى لما فتحت عنيا لقتنى نايمه فى مشرحه المستشفى انا عرفت هما جابونى هنا ليه جابونى علشان اعرف اسماء الناس اللى احنا حطينا معهم الاعمال !! وفعلا قمت دورت على ملفات الجثث اللى خرجت من المشرحه بس قررت ان اخد نسخه منهم كلهم علشان انا مش فاكره احنا حاطينا الاعمال امتى ولمين وروحت البيت صحيت سيد حكتله كل اللى حصل قلتله دول مش هايسيبونا يا سيد !! لو مش خايف على نفسك خاف عليا تعالى ناخد الاسماء والعناوين دي ونشيل الاعمال من الاكفنه بتاعتهم سيد بصلى بصه غريبه وقالى انتى مجنونه دول اكتر من 100 اسم ... قولتله ماهى ملهاش حل تانى قالى طب اصبرى انا النهارده هعمل جلسه لو نفعت يبقى خلصنا من الموضوع كله ولو مخلصتش هاعملك اللى انتى عايزاه وفعلا دخل الاوضه يعمل اللى قالى عليه وانا دخلت اوضتى اقرا قران وروحت فى النوم وصحيت على اصوات غريبه وناس بتصرخ ستات ورجاله واطفال وسامعه كلام غير مفهموم وهمس واصوات حيوانات قمت علشان اركز واشوف الاصوات دى جايه منين لقيتها جايه من اوضه ابويا ابتدى جسمى يقشعر ندهت على سيد ولكن سيد مش موجود فى اوضته فقررت انى هافتح الاوضه واشوف ايه اللى بيحصل جوه وانا بقرب من الاوضه سمعت صوت اخويا سيد وهو بيضرخ اه اه اه اه اه والصوت عمال يعلى.

فتحت الاوضه لقيت اللى كنت متوقعاه سيد نايم على الارض وبيصرخ وبيتوجع وحيطان الاوضه كلها دم وبيخرج منها خيالات سودا كتير وعماله تقرب من سيد وكل ما تقرب صوت سيد يعلى اكتر واكتر وفجاه سيد طار فى الهوا وجسمه بينزف دم من كل حته مع العلم ان مفيش فى جسمه اى خدش ولكن بعد ما بصيت كويس لقيت الدم خارج من بقه وفجاه النور قطع وسمعت صوت هبده جامده توقعت انها جثه سيد خرجت من الاوضه وقفلت الباب وقعدت على الارض جنب الاوضه ولكن لقيت الارض غرقانه وفي اللحظه دى النور رجع ولقيت الارض غرقانه دم و الدم طالع من الاوضه.

اتفزعت جدا ودخلت الاوضه لقيت سيد على الارض والدم عامل دائره حوليه لكن مش لامسه ولكن الدم عامل يقرب يقرب وفجاه ابتدى الدم يخرج من سيد على هيئه خراطيم اوخطوط واصله بين سيد وبين الدم اللى مالى الاوضه وبسرعه غريبه الدم اتصفى من جسم سيد وبقى لحم على عظم اتفزعت وخرجت من الاوضه وفضلت اصرخ اصرخ وفجاه باب الاوضه اتفتح تاني دخلت بصيت لقيت الاوضه نظيفه ولكن لقيت ورقه فى منتصف الاوضه مكتوب فيها "من السهل ان ينقلب الجن على مسخره لكن من الصعب ان يسيطر او يؤذي اوراح معلقه".

انا اخدت الورقه وقعدت اصرخ والجيران اتلموا ومكنش على لساني غير أني بقول لازم اروح الترب.

اخدونى بسرعه على المستشفى والدكتور قال دى عندها انهيار عصبى ودوائها مستشفى الامراض النفسيه والعصيبه المشكله دلوقتى انى مش عارفه اخرج واصلح الغلطه اللى عملناها انا وسيد ...

انا بكتب لكم قصتى وبقولكم اى حد توفى له مريض فى المستشفى اللي كنت بشتغل فيها من سنتين ياريت تروح تفتح القبر وطلع العمل من الكفن انا دورى كده انتهى وجه الدور عليكم ... تمت