- ابو جابر الخليلي –
تاليف : توفيق فياض .
اعداد واخراج : كامل الباشا .
لاخذ الاذن للنشر او الانتاج يرجى مراسلتي على بريدي الالكتروني
********************************************************************
المكان: أي مكان .
الزمان : هنا والان .
ابو جابر :
يا حواجبة يا عينيه حطوه عالمغتسل
جارت الدنيا عليه في الدنيا مالو امل
يا حواجبه يا عينيه ...
*************************************************
يه يه يهنيني ، يهنيني ، يهنيني .. اذا مت ، امانه عليكو اتغنولي اياها وما تغنوا غيرها ، شو بدنا نقول ، بيعين الله
************************************
هادا يا جماعة الخير والحكي للجميع ، فيما ارويه انا لولادي وولاد ولادي ومن لف لفهم من ولاد وبنات هالشعب الملطم ، بيقول الراوي توفيق ابن فياض انه قبل السبعه وستين بقا في بالقدس حارس ليلي واسمو ابو جابر الخليلي يعني اكيد كان عندو ولد اسمو جابر ، ولاّ لأ ؟ اقولكو : خليني اجيبلكوا ايا وهو بيحكيلكوا قصتوا ومنكو الو اصطفلو : ابو جابر ، يا ابو جابر !
( يبدل حركته )
جابر ! الف مرة قلت ما حدا يجيب هدا الكرسي ، هدا لازم يظل محلة في فندق البترا ، غاد ، في المصرارة مفيش غير جابر الله يرضى عليه ، اكيد هوة اللي جابه ، جابر ! يا جابر ! يا ام جابر ! شو السيرة محدا رادد ، يأ ، بينها بتطق حنك مع واحدة من الجيران ، يا ترى سيرة مين جايبين اليوم ، الله يهديكي ياام جابر اكم مرة قلتلك هاي نميمة ، حرام نجيب سيرة العالم ، حرام ! ولك يا ام جابر ردي ردت المية بزورك . يأ ، وين راحوا هدول ، ام جابر ! يا ام جابر .
يا مرة ! يا حرمة ! جابر ! يا اولاد ! مش مكفيني الكوابيس اللي بتيجيني ؟ **************************************
اما حلمتلكو حلم ، قولوا خير اللهم اجعله خير قال انا مت وكفننوني ، وطلعتلي جنازة بتهز وبترز ، وبعدين حطوني بالقبر وراحوا ، ولاّ أنا صاحي . ولا قيتلكو حالي هون بغرفتي وقال حاطين بنص الغرفة تابوت وجوا التابوت انا ممدد ومكفن ، لمن شفتلكو هالمنظر قلت لحالي : بدي افهم شغله واحده ، انا يا بكون عايش ، يا بكون ميت ، صح ؟ اذا عايش معناته هادا حلم وبدي اصحى منه ، واذا ميت ليش ما يدفنوني ، اكرام الميت دفنه . ولاّ لأ ، والله بينكوا ميتين ، ليش بتردوش ، بيني وبينكو شعبنا ، شو شعبنا الامه العربيه نصها ميته اذا مش تلت ارباعها ما بتشوف الا جتت ماشيه .
الممثل : مالك يا ابو جابر ؟ انا جايبك تحكي قصتك ولاّ تنظر عالعالم .
ابو جابر : خير يخي ؟ شو في ؟
الممثل : خش بالقصه العالم مش فاضيتلك .
ابو جابر : القصه ؟! معاك حق . هادا يا جماعة الخير والحكي للجميع :
*************
ليليتها ، زي كل ليله ، ام جابر نايمة في التخت ، مهي الدنيا نص ليل ، مديت منخاري من الشباك عشان افحص الطقس ، مهو أنا مئلتلكوش انه عندي انف لا يخطئ زي ابو كلبشة ، الفرق بيناتنا انه منخاره بيكتشف المجرمين ومنخاري بيكتشف حالة الطقس ، عرفت انه الليلة راح تكون برد ، لبست الساكو اللي صارله عندي من ايام الانجليز ، وحطيت البرنيطة ولفيت الحطة ، وحملت اللوكس بيد والحطه بيد :
- بدك حاجة يا ام جابر ؟
مردتش عليّ ، ضلت نايمة زي الموات وقصدت باب الكريم ، سحبت حالي من باب السباط عباب العمود ، الدنيا كانت كحل مهو مكانش في كهرباء زي هالايامات ، هادا الحكي يا جماعة كان سنة التسعة وستين ، لا ، الله لا يعينني عاالكذب يا اما آخر التمانية وستين يا إما أول التسعة وستين . ووينك يا فندق البترا - في المصرارة - بتعرفوه . حملت الكرسي ، وحطيته قدام البنك البريطاني وقعدت وباب العامود قبالي : ( يغني اغنيه عبد الوهاب : امتا الزمان يسمح يا جميل )
***********************************
بدكو الصراحة الدنيا مبتقدش صقعة كثير ، بس يا عمي طقس القدس زي اهلها معلهوش رباط وبسواش الواحد ياكل لفحة هوا تجيب اجله ، هوه العمر بعزقة ؟
مسألتونيش ليش كنت اقعد غاد بنصاص الليالي ؟ كود بتفكروني صايع لا شغلة ولا عمله ، لا يا عمي ، هو انا مجنون اقعد هالقعدة زي قرد مربوط ببلاطة ؟ خصوصا في الشتا هيكد الواحد بيصير يتخيل حاله جواه الفرشة الدافية جنب مرته دفيان وبتمتع بالهبر . يعني هادا اذا بقت مرتة مربربة زي ام جابر ، ولا مستحي منكو . بس يا عمي رزق العيال ، وكل رزقة والها نطة مش هيكد .
************************************
عشر سنين ما الي غير هالشغلة ، في الزمانات بقيت شرطي ، شرطي تحارير ، شغلة خفيفة نظيفة ، وعمري ما طلبت من ربي غير الصحة والعافية ، بقيت اقول لحالي :
وكلها لربك يا ابو جابر كلها كمان اكم من سنة وبتطلع عالتقاعد وبتفتحلك مخفر ، شو مغفر يا زلمة دكانة صغيرة باب السباط بتبيع فيها مصاص ، خلي الناس تمص ، وبوظة خليهم يلحسوا . هادا طبعا بعد ما تكون جوزت الولاد وخصوصا جابر ، آه جابر :
- راح اجوزه واعمله العرس اللي بالي بالك يا ام جابر ، اسمعي تألك ، انتي بتعرفي اهل الخليل اكثر مني ، انتي انولدتي وترعرعتي غاد ، مين بدك تعزمي ؟ ردي يا بنت الحلال ؟ إسمعي ، احنا مش لازم نقصر مع حدا بنعزم كل العيل الكبيرة ، دار السلايمة ، والجعبري ومزعرو والتميمي والشويكي وسند هدول عزمونا على عرس ابنهم يأ ، شو بدو يغدي كل هالعالم ؟ والله عشر باصات ما بتكفيهم . اسمعي بنعزم من كل حامولة كبارها وهمو يعزموا اللي بدهم اياه وان شاء الله بيجيبوا الكبير والصغير والمقمط بالسرير ، هدول اهلنا وعزوتنا ، ها كيف ، وخلي اهل القدس يشوفوا العراس والزفات اللي على اصولها .
( يرقص ويغني )
الهيل امان الهيل أمان لا تمشي درب الحرام
الهيل امان على شعره يا شعرة ريش النعام
الهيل امان على عيونه يا عيونه عيون الغزلان
الهيل امان على خده يا خده تفاح الشام
الهيل امان على ثمه يا تمة خاتم سليمان
الهيل امان على سنة يا سنة لولو ومرجان
الهيل امان على صدره يا صدره حب الرمان
الهيل امان على ايده يا ايده سيف اليمان
الهيل امان على رجله يا رجله عمود ارخام
الهيل امان على طوله يا طوله يا غصن البان
الهيل امان على شخصه يا شخصة ضابط اركان
**************************************
مسألتونيش شو يعني شرطي تحارير ؟ تستحوش أسالوا ! .. إسألوا ... شرطي التحارير هادا كان عزمنات الاردن ، كانت شغلته يبلغ الناس اوامر الحجز والحبس ، ومرات بقيت اداوم بالقشلة بتعرفوها ، يعني ادير بالي عالموقوفين آخذهم على الخلا اجلكم الله يقضوا حاجاتهم ويتوضوا وصدقوني وما الكو علي يمين اني بقيت راضي بس شو تعمل الماشطة بالوجه الشنع .
*****************************
- انت متهم انك سبيت الملك ، وحرضت المساجين على النظام ، وانك قومي عربي . هادا مش انا ، هدا الزابط زقطوا معها واحدة داشرة ودايرة من مخفر لمخفر ( يقلد مشيتها وضحكتها وغنجها ) حمدان ! مش راح اقدر اجي بكره ، معزوره ، ابعتلك اختي ؟ وانا موتي الادب والاخلاق ، خليلي ابا عن جد ودمي حامي .
فقعته شكوة جابت لي الدور ، ورموني مع المساجين في القشلة ، معلوم ما انا قومي عربي ولا شو بدك اياني اكون امريكاني ولا صهيوني ؟ بس عمري ما سبيت الملك ولا غيره وعمري ما اتدخلت في السياسة .
يخلف عليها ام جابر لولا هي وشوية اجاويد شرواكم كان نفوني عالجفر ، وما ادراكم ما الجفر ؟ سجن اللي داخله مفقود واللي طالع منه مولود .
قطعوا رزقي الله .. ولا بلاش ، ومش هيكد وبس ، حرموني من التعويضات ، مخليتش حدا من وجهاء البلد الا رحلته من انور نسيبة وجر بس عالفاضي . مضلش غير ابيع صيغة ام جابر واسافر ع عمان ، ووينك يا قصر رغدان ، اول ما يوصل الملك بسيارته برمي حالي عليه : اسمعني يا جلالة الملك ، اللي حكولك ياه عني مش مزبوط ابدا ، انا عمري ما تدخلت بالسياسة وعمري ما سبيت حدا ، بدي ارجع عشغلي وبدكو تدفعولي تعويضاتي على داير باره ، انتو جماعه حقانيه وما بترضو بالظلم ؟ اسأل عني مين ما بدك انا زلمة بخاف ربي وبعرف مصلحة الناس كويس واهم اشي عندي الاخلاق ، بعدينش هاي القدس ، بلاد مقدسه وقلة الحياة فيها ممنوعة اكثر من غيرها وبسلمه الورقة هييه عليها اكثر من عشرين بصمة وعشرين توقيع من الناس اللي بعرفوني ، لساتها معي ، تذكار ، مهو انا لا رحت ولا جيت ، مهو المتعوس متعوس ولو علقوله ميت فانوس .
***************************
وماله الحارس يخي كود مش عاجبك ، شغلة شريفة وخفيفة عصاي ، وبدله رسمية ، ولوكس وبتحمي ارزاق العالم من الحرامية والسرسرية ، واوعك تتدخل في حدا ان شا الله تشوف العالم مفحجين بنص الشارع ، اللهم اسألك نفسي ......
اللهم اسألك نفسي ؟ مهو هدا اللي جابلنا الدور ..، ثمن سنين وبعدها العلم الاسرائيلي صار يرفرف فوق المسجد الاقصى . وولاد الميته دارو يشطحو وينطحو .
( اغنيه: اخي جاوز الظالمون المدى وحق الجهاد وحق الفدا
انتركهم يسلبون العوبة مجد الكرامة والسؤددا
اخي ايها العربي الابي ارى اليوم موعدنا لا الغدا
( ينتقل فجأه للرقص والغناء بالعبريه )
كله بيضل بالبيت ويخط خرقة بيضة فوق الباب ( يرددها عدة مرات ) فهمتو حاجة ؟ اكيد فهمتو ما انتو مثقفين والمثقفين بيعرفو لغات ، شلحت الاندروير مهو ابيض بفت وعلقته عالباب ، وست تيام والطخ يلعلع في البلد وانا جواه الدار ، مالي ومال السياسة انا لا بتحمل تعزيب ولا مقايس عن عمري
وقال يا شارد من قضاي ما الك رب سواي ، بعدها باسبوعين الله وكيلكو صحيت عصوت خبط عالباب .
- اهدي يا ام جابر ! مالك بترجي زي العصفور المنتوش ريشه ؟ هدول اكيد غلطانين ، مخربشين بيني وبين واحد ثاني ، ما انتي عارفة جوزك لا بكش ولا بنش .
" وجعلنا من بين ايديهم سدا ومن خلفهم سداً فاغشيناهم فهم لا يبصرون "
الجنود استنفروا ، هجموا عليّ من الباب للطاقة وكلبشوني وعالقشلة ، اسبوع ولا س ولا ج .
- قومي عربي ... ها ؟! انت واحد كذاب يا ابو جابر ، كذاب كبير ، شوف الملف تبعك .
- طبعا انا قومي عربي ولا شو بدي اكون ، امريكي ولا صهيوني ؟
- ماله الصهيوني يا بزونك ، مش عاجبك .
شو بزونك هاي ؟ اكيد مسبه ! بقيت بدي اقوله عيب عليك انا قد ابوك .
– مش عاجبك الصهيوني يا عرص ، مش عاجبك ، يا جوز ..
وبطلت اسمع بعدها شو قال تمنيت لو تنشق الارض وتبلعني ، وين بدي اخبي وجهي من ام جابر ، ام جابر الاصيلة بنت الاصول يقول عنها ..
( اغنيه حزينه مناسبه : يما القدس عريانه )
***********************
آه بس لا اخذوا مني حق ولا باطل ، هاكيف ؟ و تميت زي ما أنا حارس في القدس بحافظ على ارزاق الناس من الحرامية واولاد الحرام ، اما " فدائيه " اللي بيحكي عنهم الحاكم العسكري شو دخلني فيهم كل واحد ذنبه على جنبه .
- اسمع ابو جابر ، انت كان ممكن تضل في السجن عالقليلة عشر سنين بس احنا طلعناك ورجعناك على شغلك ، احنا بنعرف انك ممكن تكون مخرب خطير وممكن نرجعك عالسجن اذا ما بتثبت العكس ، انت لازم تفتح عينيك كويس وتشوف المخربين ! انت حارس ولازم تحافظ على الامن في البلد يعني اذا شفت او سمعت أي اشي انت لازم تيجي تخبرني .
قال مخربين قال ، انا شو دخلني بها القصة ! قلت لحالي اوليتها بكذب عليه وبقوله اذا طلبني مرة ثانية وبحلفله عالمصحف اني ما بشوف حاجة غير الصيع والد شر اللي صاروا يفيعوا علينا من القدس الغربيه ، بعدينش قلت لا يا ولد مالك ومال هالقصة ، انت قله بس انك مشفتش حاجة وخلص .بس بيناتنا ، الصراحة انا شفت ، وشفت كتير ، بس وحياة شرفكوا عالطيب مش لو حبسنوني حتى لو شنقوني ، أي هو كل ما دق الكوز بالجرة بدهم يفتحولي الملف ويقولو قومي عربي ، أي بدي اصير قومي من حق وحقيق ، ومش بس هيكد لا بدي اصير فتح كمان ولا بصير جاسوس .
ما احلاني وانا قاعد قدام الحاكم العسكري وبقوله اني شفت الحاج محمد وبدر الدعنا بيرموا قنابل عالسفارة البريطانية شوف العين . باطل عليك يا أبو جابر ، هاي آخرتك ! تصير جاسوس للصهاينة ... اوعوا حدا فيكو يكون جاسوس ويروح يقلهم !
الممثل : مالك يا أبو جابر خربطنا نبلش ! مش قلنا خليك بالقصه .
***********************
المهم ليليتها كل اللي حكيتلكو اياه عدا قدام عيني وانا قاعد عالكرسي قبال باب العامود كاني بتفرج عفيلم سينما ، شوي اضحك وشوي اعصب ، شوي ابكي وشوي افكر لحديت ما صرت احكي مع حالي : وكلها لربك يا ابو جابر واللي مكتوب بدو يصير .
حملت الكرسي وحطيته عند فندق البترا حتى بالامارية ساعتها بقا في اكم من شب من عرب التمانية واربعين ، اياميتها مبقوش ييجوا عالقدس عشان يصلوا زي اليوم ، لا بقوا يقولوا جايين تنزور الاقصى مش نصلي فيه ! بقيت احزن عليهم وعلى قلة دينهم ، وبنفس الوقت اعذرهم . كويس اللي لساتهم بيحكوا عربي وبقولوا عن حالم عرب ومسلمين ، بس بدكوا الصراحة مبقتش احب اتغمقق معهم في الحكي خاصة بعد ما قال لي صاحب الفندق :
- ميغركش انه في منهم ناس فدائية او بيساعدوا الفدائيين هدول يا عمي نصهم شيوعية ونصهم جواسيس .
بس الله اعلم بالحقيقة والواحد مش لازم يجب سيرة الناس بالعاطل ، لانه مهمن صار بيتموا اهلنا وحبايبنا .
( يحمل المصباح ويدور جولته مغنيا )
سلامتك يا فوز ، اختي بدالك .
اختي وبنات عمي ، وتالي القرايب .
وان سألت العروس ، وينوا عريسي .
عريسك بالحمام ، بقلع وبلبس ،
بيدوا ضمة ريحان مخلوطه رنجس .
******************************************
غمضوا عينيكوا ! غمضوا ! بدي اخذكوا عالجولة تبعتي . مهو طالما هالعفاريت واقفينلي عالباب مش ممكن اقدر اخذكو ونروح نلف في شوارع القدس ، بس بنقدر كلياتنا نغمض عينينا ونروح مطرح ما بدنا ، صح ؟ طب أسمعوا ! انا بغمض وبروح وانتوا حرين اللي بدو ييجي معي حياه الله واللي بدوش على كيفه ، هه ، هيوني بديت الجولة :
من باب العامود بتم ماشي قبال السور لحديت ما اصل باب الزاهرة ، ومن غاد بحود عالشمال ، صرنا بشارع صلاح الدين بتم ماشي لأخرته وبعدين عالشمال ، صرت في شارع السانت جورج ، مشيت اكم من خطوه مقر الحاكم العسكري عن يميني ، داهيه تاخده ، لقدام شوي هي السفارة الامريكية عن يميني وشارع نابلس عشمالي ، انتو معاي ؟ هه وصلنا الهاي لايف ومن غادة عاليمين لاخر الشارع وبعدينش عالشمال ودغري دغري رجعنا عالمصرار ، كل واحد ياخذله كاسة شاي من قهوة الشيخ عبد شايات على كيفكو بيبلو الريق : يسملوا هالايدين يا شيخ عبد ! وبعدها اكم من خطوة ، وين صرنا ؟ لأ قدام البنك البريطاني . خلينا نكمل عالشمال عشارع نابلس من اوليته في غاد كمان اكم من دكان لازم اتفقدهم ، قولوا اتفقدناهم ، عليكو نور ، ومن غاد نلف ونرجع والا إحنا وين ؟ فتحوا عينيكو عشان تشوفوا .. لا ، باب العامود . ومن غاد دغري عالدار .
الممثل : وين رايح ؟ كمل القصه .
ابو جابر : هادي هي .
الممثل : مش هادي ، قصة الجندي .
ابو جابر : انو جندي يا زلمه ؟! انت بدك تلبسني تهمه .
الممثل : تخافش الجماعه منا وفينا .
ابو جابر : هو مخوزقنا غير اللي منا وفينا ؟
الممثل : لأ ، هدول غير شكل .
ابو جابر : قال انتو غير شكل ؟... ها...اقولكو ما بيقطع الراس غير اللي ركبه ، هادا
*******************************
اول الليل كل شي كان تمام ما عدا مخي اللي كان يودي ويجيب ، وصلت باب الزاهرة بامان الله ، اتطلعت عالبريد ولا اول سمة بدن ! حارس البريد قاعد ورا مكتبه والرشاش قدامه كانه بنص تل ابيب ، والا مهو مسنود ، دوريات رايحة جاي هادا غير الجنود اللي عالسور ! اتطلعت عليه ، اتطلع علي ، خزيت الشيطان ولفيت عصلاح الدين ... قبل الاحتلال ، الشارع بقا رايق يعني ممكن في هبك ساعة تلاقيلك واحد ازعر واحد سكران ، حشاش مسطول ومخربش بباب الدار : عدي غاد .
اما بعد الاحتلال فحدث ولا حرج ، كل اللي في الشارع حبيبه الله وكيلكو شباب وبنات ومجق بوس بنص الشارع والقانون شو بيقول : قال ممنوع تتدخل الا في حالتين الاولى اذا البنت صارت تصرخ وتنادي الشرطة والثانية اذا كانوا بيمارسوا الدعارة بنص الشارع ، والدعارة مش معناتها البوس ، الدعارة يعني الدعارة مية بالمية ..
انا مش فاهم كيف قدروا هدول يذلوا امة محمد ويحتلوا الاقص... !! استغفر الله العظيم ... شو مالي الليلة هو انا يا بحكي بالسياسة يا بحكي بالدعارة ، شو السيرة ؟ ماكلة دعارة بدعارة . وكله بيهون عن شارع الزهراء واللي شفته غاد . هادا بعيد عنكو شارع الكزينوهات والمطاعم والاوتيلات ، اللي فيه سينما القدس ، غزمان الاردن بقا ملان سواح عرب واجانب وع ايام اسرائيل صار ماخور لليهود ، شرب ورقص ومخدرات وجوادين ، ومومسات في اول الليل لليهود وفي اخره لولاد العرب المقاطيع اللي لا هاممهم احتلال ولا فلسطين . اول ما وصلت عنده درت وجهي بلاش اتورط ، مهو انا مئلتلكوش : الفدائية كانوا اياماتها ما يمر اسبوع الا ويرمولهم قنبلة او يطخولهم حدا فيه وبعديها تبلش الاعتقالات والتحقيقات هذا غير الطوش وضرب السكاكين اللي كان يصير كله ليلة ، يعني باختصار كنت اتجنبه تجنب واول ما اوصله ادير وجهي عالشقة التانية ، وما درت وجهي إلا وانا سامع صوت :
يأ ، صوت غنج ! ولا ّ واحد داقق في واحدة وبلز فيها عالحيط وهات يا بوس بس مش من هداك البوس تبع صلاح الدين ، هدا غير شكل ، البنت ملقحة عالحيط وفاتحة اجريها والشاب بين اجريها وبلز ، اعوذ بالله من الشيطان الرجيم . بعدينش مد ايده عقميصها فتح الزرار وبلش دعك ، تقول بسن لبن كشك ، وبعدينش ، استغفر الله العظيم ترك تمها وهجم عصدرها غبه غب يكسر جاهكو ، يفضحكوا ! شو اسوي اخبطكوا بالعصاي ويصير اللي يصير ولاّ استنى عبين ما تتعروا ؟ شو صارلك يا ابو جابر بلشت تنتفض وعرقك يزرب وعينيك ملزقة فيهم مالك ومالهم ان شاء يقلبوها كرخانة اذا حكامها محافظوش عليها انت بدك تحافظ . دير وجهك وافعط ، افعط هو انت ناقصك بلاوي .
( يجلس – موال يما القدس )
يما القدس عريانه ، عريانه خوف .
بتنام نوم الحور ، جوا تخت مسحور ،
ومحوطه بالسور ، تضوي عليه شمعه
ومسكره هالدور ، بالوحده والدمعه .
***************************************
وكله بيهون عن اللي صار مع الحارس قبل ما ... الحارس اللي على باب الحاكم العسكري ، بتعرفوه ، قال صبّح عالكلب بلاش يعضك ، هيوه عضني يخي . بقا نايم زي عادته وسلاحة بين ايديه ، مش مكفي قلبوها كرخانة لأ ، حراسهم بيناموا وبيشبعوا نوم كانه الواحد فيهم بدار ابوه ، تقول مضلش رجال في القدس ! طب علي الطلاق من ام جابر بقيت بدي ارجعله واسلخه بهاالعصاي على نص راسه اسيح دماته وبعدينش اخذ سلاحه وافرغ الباغة فيه وبعدها ادعس ببطنه واتف عليه كمان . هان كرامتي يا جماعة ! بده يتكبر عليّ مع اني حارس زي زيه . كود مسمعش :
- صباح الخير يا خواجا
شد سلاحة وسحب الاقسام ، قلت يا روح ما بعدك روح ، ( يرتمي ارضا ويتدحرج ) هيكد علمونا بالشرطة .
- مش بتحرك يا خواجا / مش بتحرك ، انا ابو جابر الحارس مش عارفني ؟
- ما كراه؟
- ولا حاجة ، بصبح عليك ، الصباح لألله .
- انتو عرب مش بفخم ، يلا روخ ، امشي .
الله يلعن التصبيح واللي بيصبحوه ، خصوصا التصبيح السياسي ، شو الي انا بالسياسة ، آه ، هدا تصبيح سياسي . انت شو الك تصبح على الحارس اللي عباب الحاكم العسكري ، بدك تتذبذبله ؟! بتستاهل اللي صارلك وزيادة بتستاهل ضرب بالصرمة على طارة نيعك ، خليك بشغلك اشرفلك ولاّ بدك ترملها لام جابر ؟!
****************************
واللي هون على اكثر اني لما وصلت القنصلية الامريكية تذكرت صويلح الحارس الاردني اللي استشهد عالسور الله يرحمه بقا نهفة .
الله يلعن ابو امريكا عابو الامريكان ، ما جاب البلا غيرهم ، طلعنا من جورة وقعنا بدحديره وصرنا نترحم عأيام زمان ، لما وصلت المصرارة بقت الساعة ثلاثه بعد نص الليل ، شد حيلك يا أبو جابر خليك تلحق تتمغطلك ساعة زمان جنب ام جابر قبل ما يطلع الصبح ، ويا غافل الك الله :
- يا زلمة ، انت يا زلمة ليش مش بغد ؟
ولا ثلاث صيع جايين عليّ ، ( يضيء الفانوس باتجاههم ، ويلوح بالعصا)
بلاش يفكروا عظمي طري .
- معاك ولأه ؟
-هاي هي ؟ يا مستعجل وقف تألك ! ( يبحث عن الولاعة في جيبه )
ولا ثلاثة في العشرينات ، شعرهم اشقر وطويل وطايح عكتافهم ويادوب الواحد يقدر يميز رجالهم من نسوانهم ولا بسين بنطلونات ملزقة ، وفاتحين صدورهم الحلسا الملسا ، استغفر الله العظيم ! معقولة يا عالم هدول اللي اذا نفخت عالواحد فيهم بطيره هزموا كل الجيوش العربية وكسروا عينّا ؟
- ولع يا مايص ، ولع ! وانت كمان ؟ يأ ، مالك ، بتحسس عايديّ ؟ بلاش لعب يا ولد ، بحز غاد راح تحرق شواربي ! هاي آخرتك يا أبو جابر تصير مقردة لاولاد الهيود ؟
- انت مش بزعل يا زلمة .
- شو بزعل ؟ هوه الواحد بزعل من ولاد !!؟
- اتفدل ، انت لازم بوخذ واخد سيجارة .
- شو هادا دخان امريكي ! آه امريكي .
- انا اسمي ميكي ، وهادا الحمار دودو وخذاك آفي .
ذكروني بأسامي الرقاصات بالافلام والمسلسلات المصرية ، ام جابر بقت اتابعهم بالراديو ، ريري وزيزي وكوكي :
- انتي فين يا زيزي ؟ الزباين مستنينك من الصبح .. ؟
- الله ، ميستنوا يا ابلتي ، هوة انا حلحق على مين ولاّ مين ؟
- ايش هادا ابو جابغ ؟ خادا اسم يعني غابي ، انت ابو غابي ؟
بقدرة قادر تحول إسمي من ابو جابر لابو غبي ، وتخيلوني بنادي عالمرة يا ام غبي! هادا اللي ناقصني مش مكفي احتلوا القدس وسموها يروشليم بدهم كمان يغيروا اسمي .
- لا أبو غبي انت مش بروخ ، انت لازم بقعد شوي بدخن منشان كيف .
- مالي ومالكو ، اقعدوا زي ما بدكو انا زلمة ختيار ولازم اروح .
- لا أبو غبي انت مش ختيار ، انت كوي مثل بغل ، انت واخذ عرص .
- يكسر خاطرك ، انا من جيال ابوك ، عيب تقول عني عرص .
- انت مش بزعل ابو غابي ، عرص يعني كويس ، اخنا يهود بقول عرص يعني كبداي .
فهمتوا! عرص يعني قبضاي ، مش قلتلكو بدهم يغيروا كل إشي ؟ يأ ، شو هالسيجارة هاي ، بتشعط الحلق شعط ( ضحك) قيم ايدك عن رقبتي ، الفار بدا يلعب بعبي ، بينها ملغومة ! يحرق عرضها مش كاينة تخلص .
- انت من يروشلايم ابو غبي ؟
- وولدان فيها كمان ، مزبوط انا من الخـ
ولا بلاش يفتحولي سيرة التسعة وعشرين ولاّ سيرة الطابو اللي تركلهم اياه ابونا ابراهيم الخليل .
- انت بشتغل خارس ابو غبي ؟
- نعم، خارس .
- وين بخرس ؟
- انا بخرس في شاخيم ، باب شخيم . يعني باب العامود ....
يأه بينو لساني التوق !؟
- وبعدين بغوخ شاغع .. شاغع .. يأ ، شد حيلك يا ابو جابر عمرها ما صارت ! قلنا شاغع ايوه صلاح الدين ، وبعدها ... حغب؟ شو حغب ؟.. أي هو إحنا حاربناولاّ تسخمنا ، في البيت ، في البيت ، انا زلمة كبير لاتاع حرب ولا ضرب ..... والله كلامك مزبوط ، صح ، احنا كتير مليون وانتو مش كتير يهود ، بس انتو بغلب ، انتو تساهال زغير كتير بس بعطينا خازوق كبير .
- قال تساهل صغير قال وكل ما بصق الواحد بصقة بصيب واحد منهم ، هدا كيف لو كان كبير ؟!
- ريح اللي تنفخك وتنفخ اللي جابوك عهاالبلاد، وين نروح ؟ قال انتو لازم بروخ من يروشلايم تبع احنا يهود، يا فتاح يا عليم عصجة ربنا !
- بنعيش سوا سوا .. موت اللي يحشكو ويريحنا منكو.
- كسرة تكسر ايدك سيب الحطة ولا . مالك ومال شنبي ، زيح ايدك يا جواد ... لأ بينه الشغلة مش نعس ولا ما يخزنون ، شو اللي بيصير فيّ ، عملوها فيّ ولاد الحرام . شو هدا اللي بيزحف عقفاي ؟ عقربة ! اذا تحركت بتلدعني وهاي لدعتها والقبر ، لا ، هي وصلت لهون ، شو مفكرين قفاي مشاع زي قفاكو ، زيح غاد ، ابعد يا كلب ، ولكو استحوا عدمكو انا من جيال ابوكو ! هاي آخرتك يا ابو جابر ، قال لا تلعب مع الولد ولا تخلي الولد يلعب معاك ، زيح غاد انت وياه ! انا بحب قرود يهود ، بس ما بحب بلعب معاي ، شو يا با ! بدك تعمل واحد منشاني ، مفكرني من قوم لوط زيح لالطك بالعصاي اجيب آخرتك ، يا اولاد قلتلكوا بكفي لعب واكفوني شركو ، شو مخرب ومش مخرب ، انا لا فدائي ولا بستاهل اكون فدائي ، انا خلقة حارس داير عرزقة عياله وبمشي الحيط الحيط وبقول يا ربي الستر ... يأ وصلت لحد هون ، باطل عليك يا ابو جابر بشوف اللعب صار عاللحم ، يا دافع البلا ( يهوي عليهم بعصاه ).. ووين الجنب اللي بيوجعكوا عراصهم وايدهم واجريهم لحديت ما صارت دماهم حماهم ، بس زي العفاريت بسبع رواح ، وقفوا وبلشوا يطبشوا حجار ، فسخت عشارع نابلس تميت اركض لحد ما انقطع نفسي .
- وقف عندك / انت برفع ايدك ومش بتحرك ؟ /
هادا اللي محسبناش حسابه ، شمّر للندل مرة بتعود عليك / ( يده تسحل نحو جيبه يتحسس الموس ) ضربوا الاعور على عينه ، قال مهي خربانه خربانه واكثر من القرد ما سخط الله ، والله ما هي فايته عستيرة هالمرة .. الموت ولا المذلة يا ام جابر وانتي والولاد الكم الله .
حارس مقر الحاكم العسكري ، وقف قبالي ، بعدينش قرب منى وبلش يضحك :
-انتو عرب بعرف بس بربي شوارب ، يالله روخ من هون ، امشي واخد .
- شو واحد ومش واخد أي هو انت بدك اتضل تطلع من جورة توقع بدحديره ، من الانجليز للعرب للاسرائليين للامريكان والكل بحشر فيك بالقرنه ، ارهابي ، مخرب ، قومي عربي ، بتحرض عالنظام وانت ماشي الحيط الحيط بتحاول تحمي حالك وتحمي ولادك ومرتك وتحافظ عشوية الكرامة اللي ضللولك .. عفوّ عني ، وآخر متاخر بعد ماشبت ، شوية صيع يبهدلوني وخلقة جندي معفن زيك يقل ايمتي ؟!
ولك انا ابو جابر الخليلي يا بزونك ،ابو جابر ......
( يكررها عدة مرات مهددا بالموس ) .
النهايه .
ساحة النقاش