.....................................................................
كراكيب
.....................................................................................................بدروم فؤادي انشرخ
لما اتملى كراكيب
يام العيال إهمدي
فيه ضيف ما بينا غريب
زارع في قلبي الشوك
وف الحشا لهاليب
والشمس لما تغيب
الليل أكيد سادة
عشمانة ف الجنة
فارشاني سجادة
وإنتي اللي طول النهار
تقري ف سورة النكد
لما بقت عادة
أنا أبطل الدخان
وانتي إلا دا
وأدبل من الأحزان
والطبع نجاجة
وأشحت من الدكان
وبرضو بدادة
وتاجي آخر الليل
تعملي دادة
لأ .. كله إلا دا
إللي عليه الدين
عليه الإكس ..... بزيادة
- روح اكتب الأشعار
- غني ف صوت العرب
وايش فهمك إنتي
ف الشعر ولا الطرب
وانتي اللي من همستك
صرصور نافوخي ضرب
والوحي يوم دخلتك
لملم خيالي وهرب
وايش فهمك إنتي
يعني إيه لمة ؟
يعني إيه عيلة ؟
أنا والله يا ليلة
مانيش مجنون
أنا لما نقيتك
وطرقت باب بيتك
كنت حبيتك يا ست الدار
ولما خطيتي عتب بيتي
إتقطع زيتي
وخليتي حياتي مرار
والعمر دار
نهاري نار
وليلي كاس
وخل ملاه
ليه تحسدي غيرك
وغيرك ربنا أعطاه
وعايزاني أتور طايح
ف خلق الله
وقوم جيب لي
وروح جيب لي
ولو حتى ها أقول لله
وتتجني لو الفرشة
شكت مني ف قولة آه
ياأم العيال رقي
أنا أب من حقي
أفرح بأولادي
وأحس بالأعياد
يا أم العيال عيشي
نتف الغلا ريشي
وانا ما حيلتيشي
حقاش أفوتها البلاد
وانا سندباد خايف
والسندباد الصح مش شايف
فات البلاد لبلاد
أخده البعاد
ف العز فت وغرق
وسكر مع الأوغاد
ورجع ف يوم ملقاش
لا البصرة ولا بغداد .......
شعر / حمدى حسين
ساحة النقاش