مجلة بشرى الأدبية الإلكترونية – قصيدة : الزمن بيضحك

 الزمن بيضحك 



هو ليه كل مابقول أه
الاقي الزمن بيضحك من جواه

ليه حاسس أن الكل شمتان فيا
ليه نشفت حتى دموع عينيا

لا مع حبيب قادر أعيش واتهنى 
ولا لغيره قادر حتى أتمنى

عايش ومش عايش في دنيتي
وتايه ومش تايه برضه في سكتي 

هو إنتوا زيي ولا أنا لوحدي
عندكم نفس ناري ولا داه وعدي

عايش دنيتي كأني غريب
من كوكب تاني ومليش حبيب

كل اللي حواليه ياناس أغراب
لا قلب حنين ولا حتى أصحاب 

كله بيقول يالله نفسي
قبل القيامة علينا ماترسي 

حاسس إني ماشي بدنيا التوهان
و روحي معميه بضباب ودخان

ليه كل داه في دنيتي يجرالي 
ليه كله بيقول طب وانا مالي

كل اللي حبيتهم باعوني
عمري مانسيتهم ونسيوني 

هي دي الدنيا اللي حبيتوها 
عشان عذابها ونارها عشقتوها 

لا خلاص مش عايزها تاني
داه كل الحب فيها أناني

صبرني يارب على بلاويها 
وريحني منها ومن شكاويها 

دي دنيا ظالمه وغداره
والضحكة فيها سم بسنارة

مقصوص جناحي قبل ما أطير 
لا شفت فيها هنا ولا مشاوير

لنا عايز أحب ولا عايز أتحب
كفاية كده دا المر فيها صعب




صائغ القوافي