حِلم والا عِلم قصيده خاصه
كلمات الشاعر / رضا أبو الغيط
**************************
وف ليله سِمعت الباب بيدق
و القلب ف صدرى ما بطل دق
وهلال بينادى كأنه بلال
والصوت كان واضح والله بحق
الصوت بيقول افتح الابواب
انا جاى من بعد سنين وغياب
طمنى ياولدى عامل ايه ؟
وازى أحوال كل الأحباب
فتحت عيونى وقمت جريت
ع الباب المقفول بالترابيس
ودعيت المولى وقلت ياريت
ما يكونش ده حلم او كوابيس
ولقيت ترابيس ومفاصل الباب
بترحب قبلى بالاحباب
وبتحضن فيه وتبوس ف ايديه
وتقوله وحشنا بعد غياب
وأنوار البيت رقصت ع الحيط
والبوص عمال يرقع زغاريد
والقلب ما قاعد م التنطيط
فرحته ملياه مبسوط وسعيد
قربت عليه....أتحقق فيه
أحضن ف كتافه وأبوس رجليه
وأملى العين من نن العين
والشوق كان مالى يومها عينه
مشتاق يطمن ع اللى فاتوه
فاكرينه ولا خلاص نسيوه
رديت من غير لحظة تفكير
معقوله الابن ها ينسى أبوه
وجريت صحيت كل النايمين
من طير ومواشى وبنى أدمين
وسمعت الحاجه بلهفه تقول
معقوله الليله يزورنا الزين
م الفرحه دموعها مطر بيسيل
وتقول بالذمه ده اسمه كلام
من بًعدك والله ليلنا طويل
وعيونا ما عارفه يا عبده تنام
شايف طرحك مبسوط ازاى
لما طليت كده يوم ع البيت
طب لحظه و ييجى يا غالى الشاى
ونقوم بعديها نزور الغيط
ونشوف القمح يا عبده هناك
تلقاه مشتاق وبيستناك
من يوم ما غيابك عننا طال
وسنابل عمرى بتجرى وراك
على مهلك عاد واصبرى يا وداد
م اطمن قابله على الأولاد
ازيك يا ابنى يا نن العين
وازى حبيبتى. الحاجه سعاد
خلفت ياواد صبيان وبنات
بتلاقوا الزاد.. بتجوعوا ساعات
م تريحى قلبى يا غالي امال
وكفايه دموع ..وكفايه أهات
أنا قلت يا أبويا احنا بخير
ونقصنا يا دوب حبة تغير
ونشوف الناس كده زى زمان
بقلوب مفتوحه وليها ضمير
قام مًد ابديه
والفرحه لآلئ ماليه عينيه
ومسح ف دموع قلبى الموجوع
ووصى ولادى يطوفوا عليه
قضينا الليله ف قلب الدار
بين فرح وجد وحبه هزار
وسمعت أنا صوت أجراس الموت
جايه وبتبنى ما بينا جدار
لا عرفت أفوت ولا هو يقوت
وصحيت على صوت تراتيل الموت
بسأل حصل ايه... وللا جرا ايه
فقالولى الناس ( كلنا هنموت )
