قوم يا ولد
شعر / حامد الأطير
قم يا ولد
فجرك النهارده اتولد
وعودك اليوم اتفرد
انصب في الفضا طولك
اللى ياما اتسجن واتجلد
زلزل كيان الظلم
اللى اتوحش بالبلد
حطم جدار الصمت
جلجل بصوتك للأبد
اصمد فى وش القهر
الشعب لك معونة ومدد
قوم يا ولد
ضيك شقشق في العيون
واتكحلت بيه كل الجفون
نار ثورتك حطم سجون
اتبسمت مصر الحنون
قوم يا ولد
وأوعى ترجع للثبات
وألا تسلم للسكات
وألا تنسى اللى فات
وألا تفاوض على الآهات
للي اجرح واللى مات
وألا تقبل سياسة خد وهات
قوم يا ولد
انفض عنك غبارك
أوعى تفرط في تارك
وألا تطفي نور نهارك
وألا تنسى طعم مرارك
اللى سببه الحزب المبارك
أوعى تسلم لهم قرارك
قوم يا ولد
واحضن الشمس بكفوفك
واقطف منها شعاع
يحرق كل اللي خان
واللي اشترى واللي باع
واللي عمل مالوطن
هدية و فرش ومتاع
وداس بجزمته اللي
مِرض واللي جاع
واللى خنق وشنق
شبابنا اللى ضاع
قوم يا ولد
دفي قلوب الحيارى
جفف مالعين دموع
نور طريق العتمة
ولع للوطن شموع
أمشى طريقك لآخره
ومعاك كل الجموع
ابدر بدور الأمل
في الزوايا والربوع
اصرخ في الكون ودوى
طلع أنينك من الضلوع
اياك ترجع لنومك
والا تقبل ابدا خضوع
قوم يا ولد
حطم قيود الهوان
شق الليل الحزين
رجع كل الحقوق
للعمال والفلاحين
لكل ولاد الوطن
الشقيانين التعبانين
ازرع القمح سنابل
لكل مصري أمين
عوض كل اللي طالك
من عذاب السنين
نزل عن كتافك
ظلم الحسن والحسين
قوم يا ولد
طهر أرضك من المبيد
وهات رقبة ملك الحديد
امبراطور مصر الجديد
اللى سرقهم مع جرانة ورشيد
اللى افتكر ولاد مصر عبيد
وألا ورثهم من عاطف عبيد
قوم يا ولد
حاكم اللى زاد ماله وعزه
ولا قانون فى البلد هزه
حرم الشعب زيته ورزه
وغرق في بطه و وزه
قوم يا ولد
وشوف اللى
باعو البلد
مخلوش حاجة
لأب ولا ولد
فقروا الف جيل
قبل ما يتولد
وعروا ضهرك
وسابوك من غير سند
قوم يا ولد
هات اللى باعوا ارضك
ورخصوا فى المزاد عرضك
قوم ياولد
حوش وحلق على العصابة
اللى خلوا مصر غابة
ونصبوا نفسهم سادة
ونهبوها بفجر و بلادة
واتوحشوا زى الديابة
ونهشوا ولادها الغلابة
قوم يا ولد
دا قصقصوها قصقصة
وحصصوها حصحصة
وسرقوها خصخصة
ومصمصوها مصمصة
قوم يا ولد
دا لعبوا بالبلد كورة
غصبوها خلوها مقهورة
وحطواعلى روسنا
لعيبة الكورة
عطوهم ملايينا
مواردنا مهدورة
ورفعوا على روسنا
رقاصة فى الصورة
دا بلادنا برقصها
فى الدنيا منصورة
وقعَدوا فى البيت
مهندس ودكتورة
وطفشواعقول البلد
فى الدنيا مبدورة
مصر الخضرا
خلوها مهجورة
شربوا دمها
كلاب مسعورة
قم يا ولد
خطى طريق الموت ما ترجعش
الحرية تمنها دم ما تبخلش
قول كلمة الحق ما تخافش
لبلدنا تفضل سجينة ما تقمش
اوعاك تصدق ان
الحزب بيغير كوادره
كلها شهور ويرجع لعهده
يمارس فساده زى عوايده
افتكر يا ولد
انهم خلوا السماسسرة الوف
وقطعوا جتتك بالسيوف
للرغيف وقفوك صفوف
وسقوك العذاب صنوف
افتكر
اللى لعب على الدرام
واللى اكل مالك حرام
افتكر
اللى شفط منك فلوس
وقسمها مع كل التيوس
قوم يا ولد
لملم بسرعة جراحك
عطر بنفسك صباحك
كلل بالفخر كفاحك
اطلق بأيدك سراحك
أوعاك تنسى
تحنى كفوف الصبايا
وتستر جسد العرايا
خليك يا ولد
صامد فى الميدان
ورابط سنين كمان
لما يحين الأوان
وتلبس توب الأمان
ساحة النقاش