#‏حال‬ ‫#‏الناس‬

فى ناس تشوفها تتبسم
على وشوشها الجمال مرسوم
وناس تسمعها..تتجنن..وتتعكنن
كلامها لحن مش مفهوم

وناس بعنيها تنظرلك..تجيب أجلك
نظرتها الخنجر المسنون
وناس بعنيها تنظرلك..تمهدلك
نظرتها حنان مسكون

وناس تغهم ف لغة العين..وحساسة
تشوف النظرة تفهمها
وتفهم هى منها الود..
والا الرفض بشياكة.. وبكياسة

وناس دايما" تشوف الناس
ماشية بكرسى أو عكاز
تساعد فيها وتطبطب
وناس تطلب مساعدتها
يادوب تغضب..وتتهرب

وناس تضحك ف عز الجرح
بس الضحكة..بهتانة
وناس تبكى ف عز الفرح
فرحة بريئة مش سيعاهم..ولا حتى سيعانا

وناس بتخوض ف عرض الناس
ونمامة وحريفة
وناس ماتجبش سيرة الناس
مهما الناس ولا صالحة ولا شريفة

وناس تمنع زكاة المال
وهى فلوسها حمل جبال
وناس بتزكى..وتحكى
دفعنا زكتنا قال لفلان.
صبح مستور وعال العال

وناس بالفلوس تتباهى
تقول أنا عندى قرش يغطى
من رأسى يجيب ضفرى
وناس معهاش عشان تحكى وتتباهى
وتنساها الحظوظ الحلوة من بدرى

وناس الدنيا شرياهم..وتديهم كتير تبذير
وناس الدنيا بيعاهم لدنيا تانية هتبعهم
بدون تفكير

وناس مهما السنين تاخد من الأعمار
تشوفهم برضوه لسه شباب
وناس ف العمر لسه صغار
تشوفهم تبكى على حالهم
تلاقى الشعر أبيض..شاب

وناس مغلولة وبتحسد
كأنى عنيها سهم اتسن م السنان
وناس مهما العيون بصت
لايمكن تحسد الأنسان

وناس الظلم يحدفها
بعيد ف حديد..وجوة سجون
وناس العدل ينصفها
بسيف الحق..سيف مسنون

بقلمى/ هانى السيد
من وحى اللحظة
4/5/2016