قطر تمانيه عدانى
والجاى فاضلو ساعه
هقعد فى الركن الجوانى
واوصف الصوره ببراعة
ناس قاعدين هنا وهناك
وناس قلقانه وبتفكر
وصوت بيقول خدنى وياك
والتانى قال شهرين مش اكتر
وعيون جميله وفيها دموع
ونظرات خايفه وقلقانه
ومسافر بيفكر فى رجوع
ومسافره شكلها زعلانه
ودكه عليها واحد نايم
مستنى القطر المش قايم
وكافتريا فاضيه من الناس
تطلب شاى تشهر إفلاس
وعامل نضافه رايح جاى
وشباب من الفاظها يا باى
وست كبيره جايه بتسأل
قطر كام هيقوم الأول
وشباك الترسو مليان
وبريمو معليهوش انسان
وعسكرى على كتفه شريطين
كان فى أجازه وغاب يومين
وبنت جميله بتودعه
فى عنيها كلام بيسمعه
وبياع وبضاعته شيله
شكله بيجرى على عيله
مباعشى ولا حتى بجنيه
ياترى الناس دى بتعمل إيه
صوت بيقول القطار القادم
جاى من طنطا لسيدى سالم
باى باى بقى هركب وهروح
لو ملحقتش كرسى اتسوح
منير خاطر