شمر وانهض يابو شعبان
وقوم اتوكل ع الرحمن
الرزق مبيجيش بالنوم
وتبكى وتقول محروم
الشكوى مش للكسلان
اعمل بس انته اللى عليك
هتلاقى كل ما يرضيك
وهتفرح وتنام شبعان
إضحك تلقى الدنيا تروق
وارمى حمولك ع اللى فوق
هوه الحنان المنان
راس مالك دايما عزة نفسك
الناس تحترمك وتحسك
وتكون سيد ولو غلبان
ربك بيقسم بالعدل
هوه لوحده صاحب الفضل
إوعاك تطلب من إنسان
ميغركش اللى معاه مال
هوه كمان بيشكى الحال
يكفيك ربنا شر التوهان
إرضى بقليلك هيزيد
وتبقى كل ايامك عيد
وعمرك متقول أنا عيان
منير خاطر