لما يكون في غنا في التلفزيون أو في حفلة..... ويكون الفنان زهجني ومافي طريقة اتخارج منو.... في التلفزيون يكون في زول بيتفرج معاي وعاجبو الغناي....أو في حفلة واضطريت أقعد مجاملة ... أخلي الغنا وأقعد اتمعّن في حركات الفنان.... ومتين بيضحك ومتين بيصر ومتين بيبلع ريقو.... ومتين بيقبل على الشيالين أو الأوركسترا... أويقبل على الزول القدامو البيانو و شغال فيهو زي المكوجي...بعد الملاحظة الدقيقة لمطربينا ربنا يغطي عليهم.. لقيت انو عندنا مطربين ... بيغنو بالحلق ومطربين بيغنو بالشلاليف.....ومطربين بيغنو بالنخرة.. ومطربين بيغنو بالنخرة والأضان..تلقاهو يغني وكل مرة يدي اضانو اليمين نفضة بايدو الشمال...والمطرب الضُباني ودا يكون بيغني و كل مرة يهش الضُبان بيدو من قدام وشيهو لو في ضبان أو مافي...ومطربين بيغنو بالحلق مع رفس بالكرعين...أو حلقومي مع هز الراس مع الموسيقي.....كانت دائماً ما تراودني نفسي الأمارة بالسوء..أن أكون مطرباً...وبدأت بتعلم الجيتار.... وجبت الجيتار.... وقعدت اتعلم الدق فيهو... كنت أدق النغمة... نغمة واحدة... ثم أطرب لنفسي لما الجيتار يقول(جييييييييييو)..أنا اتبسط وأقول (نبي!)...وكنت أهز راسي مع النغمة حتى أنني أحياناً أخلي الجيتار وأقعد أهز في راسي ساااااااااكت كدي..كان قدوتي مطرب ضباني كبير معجب به واعتبره مدرستي الغنائية، وكنت أقلدو أفك الجيتار وأهش الضبان وأرجع تاني أدق الجيتار....كان صديقي نصر الدين من المستمعين بحق الصداقة.... لكن عافي ليهو لي لله والرسول أصلو ما هداني ولا قال لي نضمك دا أعوج والشغلة دي ما شغلتك.... كنا طلبة بالجامعة نسكن في غرفة واحدة..وعندما تتاورني دقة الجيتار وأخرم، أقوم أكركب وانكرب نص الليل وأمرق الجيتار وأقعد أدق، أول حاجة اشوف أي وتر في الجيتار واجرو جرة شديدة ويقول (جييييييييو).. وأنا اتبسط وأقول (نبي!)..وكان صديقي يقول (نبي!) معاي....وأحياناً قبال ما النغمة تمرق.. تشجيعاً لي! جزاه الله ألف خير...المهم سنة للحول وأنا في (جييييييو) و(نبي).... ولم أتقدم قيد أنملة.... وبقيت أفكر ليه أنا ما اتعلمتا ..يا ربي يكون الجيتار دا كعب وما النوع الأصلي؟واللاّ يكون نصر الدين دا أداني عين في (جيييييييييو)دي؟.... ثم فكرت في آلة أخرى أتعلم العزف عليها وكانت عيني حمرا على الدلوكة... لكن ربنا ما قسم...حكاية إني أبقى مطرب دي معاي منذ فجر صباي الباكر... وأنا بالمرحلة الثانوية...... إيماناً بالتدرج الطبيعي والعافية درجات.اشتغلت شيال لواحد من الطلبة البيغنو غُنا شعبي لمدة يومين.... ثم أحالني الفنان إلى الصالح العام بحجة أني أشتر وببوظ عليهو الغنا...لكن أنا عارف انو زول قلبو أسود وما بيدور الخير للناس وخايف أنافسو ...الغريبة الصفقة حقتي كانت أوضح صفقة من صفقّات الشيالين الباقين......لما أشوف برنامج نجوم الغد اتحسر انو البرنامج دا جا وأنا كبرتا.... لكن لو كان في زمني داك... كنت اسويهو شغلة وألزق فيهو لحام ...ولو الجماعة ما جابوني الأول ..بيني وبينهم المحاكم والقانون يجري مجراه..... قفل الباب:- أعطني الناي وغني فالغناء سر الوجود وأنين الناي يبقى بعد أن يفنى الوجود