بسم الله الرحمن الرحيم

بداية احب ان انوه الى اننى لست من اصحاب الشركات ... اى اننى لا احاول ان اروج لمنتج معين او شركه معينه .. كل ما احاول عمله هو عرض المعلومه بصوره صحيحه حتى يستفيد منها الجميع

واحب ان اضيف اننى خلال بحثى على النت .. وجدت من يروج للاكسس البوليت بصوره واسعه .. ومنهم من يروج للامبرفير والاكسس وهكذا ... ومن خلال البحث وجدت انه غالبا من يشكر فى منتج معين اما لسبب ان هذا النظام هوالذى يستطيع التعامل معه فقط او انه من اصحاب الشركات ولديه مثلا صفقه  للاكسس البوليت او ان هامش الربح فى هذه الصفقه اعلى .. وهكذا

بمعنى اخر لم اجد صدق او اجماع على راى معين .. لذلك حاولت ان اكشف الغموض عن افضل هذه الانظمه ( مزايا وعيوب ) ولك فى النهايه ان تختار ما تريد

وللاطمئنان حتى تتاكدوا من صدق المعلومه .. اعرفكم بنفسى فى نبذه سريعه

م / محمد عصام البرم  .. بكالريوس تجاره ... حاصل على شهادة ccna   فى الشبكات ...... ودراس لشهادة mcse  ودارس لشهادة n +  من شركة comptia بالاضافه الى اننى حاليا ادرس شهادة ccnp

وبالنسبه للخبره العمليه ... لدى 8 سنوات خبره فى الشبكات اللاسلكيه .. سواء تركيب او صيانه او امن وحماية الشبكات ( سيرفرات المايكروتك – سيرفرات الايزا - .... )

قبل البدء فى شرح الانظمه انصحك بقراءة هذه المقالات اذا كنت مبتدئ فى عالم الشبكات

                   ((( مبادئ بناء محطه لاسلكيه ))

 http://yomgedid.kenanaonline.com/topics/59196/posts/94730

                       (( مشاكل الارسال والاستقبال ))

http://yomgedid.kenanaonline.com/topics/59196/posts/97473

كثيرا منا فى الفترات الحاليه يفكر فى مشروعات تجاريه مربحه ... وغالبا اذا وصلت لهذا المقال فانت تبحث عن ربح مادى من مشروع شبكات الانترنت

غالبا الهدف الهدف الرئيسى من انشاء شبكه لاسلكيه قويه ... هو ان لك منافسين وانت ترغب فى ان تكون الافضل او انك تريد ان ترسل الانترنت لاسلكيا لمنطقه لا يوجد بها خدمة dsl

المهم فى النهايه الفكره هى فكرة ربح مادى

اذن قبل ان تبدأ فى اى مشروع لابد ان تحسب تكاليفه من جميع الاتجاهات .. وقبل ان تحسب التكاليف يجب ان تعرف ما هى الاشياء التى تسبب هذه التكلفه

اسئله كثيره تدور فى خاطرى وانا اكتب هذا المقال .. سأحاول ان اكون منظم جدا فى عرض المعلومه

فلنبدأ على بركة الله

اولا ... الشبكات السلكيه

تبدأ القصه مع الاشخاص فى الشبكات السلكيه كالتالى

تتعاقد مع شركة نت وتحصل على خط نت فرضا انه بسرعة 2 ميجا

توزع انت الخط على المشتركين وتستفيد ماديا من عدد المشتركين

ثانيا ... مشاكل الشبكات السلكيه

بعد فتره قصيره هتلاقى ان الشبكه بدأت تحصل فيها مشاكل .. والمشاكل بتكبر ... اولا النت بيكون ضعيف .. لان الناس كلها بتعمل دون لود .. انت لسه ما اشتغلت ب سيرفر ... وشويه هتلاقى السوتشات مش شغاله كويس ... شويه كمان هتلاقى السلوك عايزه تتغير ... وهتلاقى مشتركين بعاد عنك وعايز توصل ليهم نت ... او هتلاقى نفسك فى منطقه راقيه ومحتاج انك تزود من خدماتك وعايز تطورها للافضل

المهم ده كله عباره عن مقدمه انك فى النهايه هتفكر فى الشبكات اللاسلكيه

ثالثا ... التفكير فى شبكه لاسلكيه

طبعا انت بتكون زهقت خلاص من الشبكات السلكيه ومحتاج شبكه لاسلكيه قويه جدا جدا جدا .. بحيث تحل ليك كل المشاكل اللى عندك

عشان نتكلم فى الشبكات اللاسلكيه لازم انت تكون عارف بعض المقدمات فيها ... فانصحك بقراءة مقال مبادئ بناء محطه لاسلكيه ومقال مشاكل الاستقبال

الوقتى على اعتبار انك فهمت المقدمات دى

انت الوقتى محتاج تعمل ايه

بمعنى اوضح  ... عايز شبكه تغطى كام كيلوا ... تتحمل كام مشترك ... الخ

طبعا هتقول ليا محتاج اقوى شبكه

كده انت غلطت اول غلطه ... وتكلفتة الغلطه دى تقريبا 1500 جنيه ... لانك هتفكر تستعين بشخص متخصص فى المجال ده .. واول ما تقوله عايز اقوى شبكه غالبا هيحاول يستغلك ... على فكره انا شخصيا شوفت حاجات كتير زى دى ... ومن 10000 شخص ... المهم مفيش كلمه اسمها اقوى شبكه

طيب انت قولى انا اعمل ايه

رائى انا .. انك اول شئ تجمع اكبر قدر من المعلومات عن الموضوع ده

ثانى شئ تبعد تماما .. تماما .. عن البوليت او الرصاصه ... وكمان تبعد عن الانتنا الهايبر لينك اللى بيقولو عليها امريكى .. وما تسمعش كلام التجار .. دى خدها نصيحه من مهندس متخصص فى المجال .. ولاسباب كتير لان منتجات ال ubnt  كلها مصممه لنقل الانتنرنت لاسلكين بين نقطتين .. مش مصممه انها تتحمل يوزر كتير اون لاين .. وعلى فكره ده مش معناه ان البوليت  ضعيف او مش كويس .. اوقات معينه بنستخدم فيها البوليت

المهم الانواع كتير ومش هقدر اتكلم عن كل نوع بالتفصيل

نرجع تانى لاخر نقطه

قلنا هتجمع اكبر قدر من المعلومات ..... بعد كده لازم تستعين بشخص متخصص فى المجال ده .. ولازم الشخص ده يكون معاه خبره ودارس .. او على الاقل انت تعرفه شخصيا وتثق فيه ... بس فى النهايه ابعد عن كلام التجار لان اللى بيبيع بيكون حافظ مش فاهم .. وممكن يدبسك فى مشاكل انت فى غنى عنها

بعد كده الشخص ده بيركب ليك الشبكه وبتاخد منه ضمان ... وبتتعلم منه كل اللى انت محتاجه عشان تشغل الشبكه

كده انت عملت 1% من المطلوب منك عشان تبنى شبكه محترمه

رابعا  .... مشاكل الشبكات اللاسلكيه

طبعا انت هتقابلك مشاكل .. وعلى فكره مشاكل كتير ... لدرجة انك غالبا هتفكر تصفى الشبكه .. انا بقول كده لان فعلا هتقابلك مشاكل كتير

مشكال زى ... تقطيع فى النت ...  الاشاره ضعيفه ... النت شغال عند ناس وناس .. وحاجات زى كده كتير .. بس بمجرد ما هتفهم الامور ماشيه ازاى...هتستريح .. اذن 99 % من نجاح الشبكه انك تتعلم ازاى تشغلها

خامسا .... التطوير

اكيد لو نجحت انك تفهم ازاى تدير الشبكه بنجاح .. هتقدر تكسب منها ماديا كويس .. انا شخصيا عملت لحسابى اكتر من 5 شبكات .. وللاسف فى كل مره كنت بفشل لانى فى الفتره دى ما كنتش فاضى اطلاقا للشبكه وقبل ما اتعلم ازاى اشغل الشبكه

طيب يا باش مهندس ... الوقتى انت توهتنى ... انا ابدأ منين او ازاى ..

جمع معلومات .. اسال اكتر من واحد .. واحسب الامور ماديا .. وفى النهايه القرار ليك

الموضوع له تكمله

اسف على الاسلوب الذى كتبت به المقال .... ولكنى حاولت ان اكون اقرب ما يمكن الى القارئ

يتبع ان شاء الله