بسم الله الرحمن الرحيم
اولا اعتذر عن التاخير فى شرح باقى الموضوعات .. .. اليوم سوف نتحدث عن افضل الانظمه فى الارسال واقواها واثبتها واكثرها تحملا للضغط فى الواير لس..
وكالعاده قد تواجهك مشاكل فى فهم واستيعاب هذه المعلومات البدائيه فى الشبكات . لذلك وجدت انه من الافضل ترك رقم الهاتف الشخصى و الايميل اسفل المقال . وذلك من منطلق الحديث الشريف ( من كتم علما الجمه الله بلجام من نار ) لذلك اذا كانت لديك مشكله او استفسار فانا دائما موجود على الياهو . او على الهاتف .. وبدون اى مقابل مادى
اعتقد ان هذا سيكون اخر مقال لى على موقع كنانه اون لاين ... وسابدا بعد ذلك فى شرح دورات فيديو فى الواير لس .. لذلك اردت ان اترك فى هذا المقال خلاصة التجارب الشخصيه فى الواير لس ... وبالتاكيد ستستفيد منها ايا كان مستواك التعليمى وايا كانت خبراتك السابقه عن الشبكات
وسوف اتحدث قليلا عن بعض الشبكات اللاسلكيه التى تعاملت معها سواء كنت انا المصصم للشبكه او صديق لاحد الاشخاص اصحاب الشبكات .. وبالتاكيد ليست هذه كل الشبكات التى تعاملت معها .. اخترت فقط بعض الشبكات .. وتاكدت من عدم تكرار المعلومات قبل رفع المقال
ولكن قبل ان تقرأ هذا المقال يفضل ان تكون لديك اساسيات الشبكات اللاسلكيه ويجب ان تكون على درايه تامه ببعض المشكال البدائيه فى الشبكات اللاسلكيه والروابط التى انصح بها موجوده على الموقع فى قسم المقالات
فلنبدأ على بركة الله
توضيح.......
اسوأ سرقه هى سرقة العلم فاذا اردت ان تنقل الموضوع او تستفيد منه ماديا باى صوره من الصور فانا لا امانع اطلاقا بشرط ان تذكر اسم كاتب المقال الحقيقى والرابط الاصلى ... غير ذلك فانا سعيد جدا لانك اهديت الى حسناتك لانك سرقت مجهودى
اولا برج 2003
يتكون برج الارسال من امبرفير تايوانى واحد واط وانتنا 12 دى بى اومنى ... وبرج الاستقبال كان انتنا 12 ياكى + امبرفير نص وات مع اكسس نت جير .. مع وجود سيرفر مايكروتك ( على ما اتذكر ) او سيرفر ايزا
المهم .. المسافه بين البرجين كانت تقريبا 4.5 كم حسب قياسات جوجل ايرث . وكان التحدى الجقيقى هو وجود ابراج ضغط عالى فى منتصف المسافه .. وقتها لم تكن لدى اى خبره اطلاقا عن الشبكات سواء كانت سلكيه او لاسلكيه .. صاحب الشبكه كان صديقا لى .. وتابعت معه كل التطورات فى الشبكه .. كنت اساعده واتعلم من المهندس الموجود لتركيب الشبكه .. بدأت قصة الشبكه كالتالى
اول شئ عند تركيب برج الارسال .. اعتمد المهندس المسئول عن تركيب الشبكه اختيار اعلى المبانى فى القريه التى يرسل منها وكان ارتفاع المبنى تقريبا 7 ادوار .. ثم رفع ماسوره 15 متر فوق المبنى ليصبح صافى الارتفاع تقريبا 36 متر .. اى اعلى من برج الضغط العالى ب 3 متر تقريبا .. لم اكن افهم وقتها لماذا كل هذه التكاليف ولماذا ذلك الارتفاع
ثانى شئ هو وجود قريه فى المنتصف بين البلدين .. متوسط الارتفاع فيها لا يزيد عن 4 ادوار .. لذلك فهى لا تمثل عائق اطلاقا
ثالثا كان الاستقبال فوق مبنى 4 ادوار مع رفع ماسوره 6 متر .. وكما ذكرت كان الاستقبال بانتنا ياكى مع امب نص
رابعا المشاكل التى واجهت الشبكه هى التقطيع الشديد فى البنج .. مع ثبات التصفح والدون لود .. شئ غريب طبعا ..
وكان مصير هذه الشبكه الى الزوال للاسباب التاليه
· مدير الشبكه لا يدرى اى شئ عن الواير لس .. لذلك اذا واجهته اى مشكله ولو بسيطه جدا يستعين ب مهندس متخصص . وطبعا كان لذلك تكلفته
· اعتمد ذلك الشخص على برج استقبال وحيد . ثم بعد ذلك بدأ يوزع النت باسلاك وسوتشات لمسافات كانت تصل احيانا الى 800 متر و احيانا 1 كم .. تخيل انت حجم السوتشات فى الشبكه ..تسبب العدد الكبير بعد ذلك الى حدوث مشاكل تقطيع وتهنيج كان يمكن تفاديها
· التكلفه الشديده التى تكبدها صاحب الشبكه .. ففى ذلك الوقت كان ثمن برج الارسال لا يقل عن 4500 وبرج الاستقبال لا يقل عن 2500 .. ولك ان تتخيل حجم التكلفه + تكلفة المهندسين
· اما من الناحيه الفنيه فكانت من اكفئ الشبكات التى تعاملت معها .. وساترك جانب فى اخر المقال اتحدث فيه عن اسباب الفشل والنجاح وعن جانب الكفاءه وكيفية الحصول عليه
· تحملت هذه الشبكه عدد يوزر اون لاين تقريبا 40 يوزر اون لاين .. كان اجمالى العدد تقريبا 150 يوزر
مستعدون لتركيب وصيانة جميع انواع الشبكات السلكيه واللاسلكيه فى جميع انحاء الجمهوريه
ثانيا .. برج 2004
هذا البرج كان خاص بى انا .. عندما تعمقت فى الشبكات (( اقصد فى الدراسه )) فكرت ان اضيف لمسات عمليه فى الشبكات .. بالاضافه الى الاستفاده ماديا من ربح الشبكه .. لم تكن لدى وقتها المبلغ المالى الكافى لانشاء شبكه من البدايه الى النهايه خاصه بى وخاصة ان تمن الاجهزه فى ذلك الوقت كان ما زال مرتفعا .. المهم حصات على خط انترنت واحد ميجا من بلد تبعد عنى 4.5 كم .. ثم ارسلت الانترنت من خلاله واستقبلته بعد هذه المسافه .. والاستقبال كان ب انتنا ياكى 14 دى بى من النوع تى بى لينك مع اكسس تى بى لينك 501 جى
وللضمان الشخصى قررت الاستعانه باى شخص يكون قد مارس عمليا فى مجال الشبكات .. تعرفت على شخص يدعى م / نادر .. اكتشفت فيم بعد انه حاصل على دبلوم زراعه .. المهم بعد تركيب الانتنا الياكى حصلت على اشاره تتراوح 13 – 17 .. سالته هل هذا يكفى .. اكد لى انه كافى جدا .. المهم الربط بين البرجين كان فعال بالرغم من ضعف الاشاره .. وعند عمل بنج على الراوتر او الاجهزه الموجوده فى الارسال كان البنج لا يتعدى 10 مللى .. راااااااااااااااائع جدا
المهم 3 اسابيع النت تمام .. عدد يوزر اون لاين من 3 او 4 يوزر فقط.. والدنيا شغاله تمام .. ولم اكن استطيع تشغيل الانترنت على اكثر من 5 اجهزه فى وقت واحد .. بعدها عرفت ان المشكله فى الراوتر . وان الراوتر كان لا يتحمل اكثر من 4 يوزر اون لاين
بعد 6 شهور .. مشاااااااااااااكل كتير .. سببها الرئيسى انى لم اتعلم من تجارب السابقين .. فانا اعتمدت ايضا على برج استقبال واحد .. ثم وزعت بعد ذلك بسلوك لمسافات بعيده .. نفس المشكله السابقه
بالاضافه اننى وقتها قررت الاعتماد على نفسى 100 % .. ولم اكن مؤهلا وقتها لتلك الدرجه .. كان لدى كبريااااء يمنعنى من ان اسال شخص عن معلومه .. المهم بعد فترة ال 6 شهور .. كنا قد تغلبنا على 90 % من المشاكل وتعلمت ايضا من اخطائى واخطاء غيرى .. دخلت وقتها السنترالات من الداخل ورأيت الدسلام ورواتر سيسكو و ........ . المهم اكتسبت الكثير من الخبره
المشكله الكبرى التى واجهتنى هى وجود مشاكل فى سنترال البلد التى ارسل منها الانترنت .. هووووووووف .. ايه الحل الوفتى .. سالت الناس وسالت الشركه قالوا شهر والقصه هتتحل .. طبعا الناس مش هتستنى شهر بدون نت . المهم تحملت وانتظرت الشهر الموعود .. ولكن عدى شهر و 2 و 3 .. ومفيش جديد .
طيب التفكير الوقتى كان كالتالى (( مفيش فولس لبرج جديد لحسابى )) عندى برج استقبال .. اعمل ايه .. والدى نصحنى كتير اصفى الشبكه واركز فى الدراسه .. ما زال سنى صغير (( 14 سنه وقتها )) وكالعاده كبريائى منعنى من انى افشل بسهوله كده ..
فكرت كالتالى . انا عندى برج استقبال بعتمد فيه على انتنا ياكى .. طيب ما اجرب واوجه الانتنا الياكى الى كل الاتجاهات واشوف يمكن حد قريب منى المنطقه اخد منه واشغل الناس مؤقتا .. وانتقلت الى الخطوه التاليه
ثالثا. برج 2005
المسافه بينى وبين البلد دى 14 كم .. هووووووووووووف كتير اوى .. المهم انا لاقط الاشاره بالياكى 5 دى بى .. بالرغم من انه فى شبكات تانيه اشارتها اقوى بس انا فضلت اجرب اتعامل مع الشبكه دى .. لان انا اعرف صاحب الشبكه ( صدفه ) ذهبت اليه وحكيت معه القصه وقولت ليه الموضوع بالتفصيل .. قال نعرض الامرعلى المهندس اللى بيتعامل معاه .. طبعا كبريائى منعنى .. بس ما فى اليلد حيله . وافقت .. المهم المهندس ده جاب انتنا 18 دى بى ياكى محلية المصنع مع اكسس اير ليف فى الارسال .. والاسقبال بانتنا طبق ( ياكى ) محلية الصنع مع اكسس اير ليف .. والمفاجأه الوقتى ان الاشاره كانت 42 .. بصراحه احترمت المهندس ده لسببين
اول سبب انه عرف يضحك علينا .. لان الاشاره ممكن تنقلها 100 كم لو انت عايز . وده عرفته بعد فتره من الدراسه فى مجال علم الفيزياء وفى مجال الشبكات .. يعنى وصل لينا اشاره بدون نت .. هههههههههه واخد اكتر من 1000 جنيه واخد منى الانتنا الياكى اللى كانت عندى .. طبعا انا اللى سمحت ليه انه يعمل كده .. يعنى سرقنى بمزاجى (( ان جاز التعبير ))
تانى سبب انى اتعلمت منه ازاى اصنع الانتنا الطبق .. بالرغم من انه رفض يعملنى .. بس انا لقطت حركات ايده وهوا شغال .. وفهمت بسرعه ازاى هوا بيصمهها .. وعرضت عليه انى اشتغل معاه بدون مقابل مادى .. رفض .. عرضت تانى انى اشتغل معاه وادفع فلوس .. برده رفض
المهم اتعلمت الوقتى الفرق بين الاشاره الوهميه والاشاره الفعليه .. وازاى تخلق انت كمصصم شبكه الاشاره الوهميه .. وازاى تنقل الاشاره مسافات كبيره .. واعتمدت على نفسى عشان افهم بعد كده ازاى تنقل النت والاشاره لمسافات تعدى 60 كم .
المهم اشتغلت مع الشبكه دى 3 ايام خسرت فيها 3 الاف جنيه .. ههههههه . علقه سخنه .. وما زال سنى 15 سنه
خسرت كل اللى معايا وكمان مديون وانتقلت للمرحله التاليه
رابعا .برج 2005
الوفتى انا عندى انتنا طبق .. او انتنا دش زى ما الناس بتسميها .. موجهه بزاوية 120 درجه .. رجعت احاول القط الشبكات الموجوده .. لقيت شبكه اشارتها 30 دى بى ربطت عليها وروحت للراجل صاحب الشبكه ..
برج الارسال كان مايكروتك بورد + انتنا 15 دى بى .. وكانت شبكه ناجحه جدا جدا جدا .. وكان السبب الرئيسى لنجاح الشبكه هنا هو الادراه الصحيحه .. سواء ماديا او فنيا .. وطبعا الظروف كلها كانت فى صالحه .. الشخص ده صاحب محل ( نت كافيه ) من فتره طويله وله معارف كتير .. ف اللاسلكى ساعده بالاضافه انه فى مدينه والتعداد السكانى فى المدن اكثر فمثلا لو غطى اشاره ونت 500 متر احسن ليه من انه يغطى 3 كم ..
المهم ... اشتغلت معاه 5 او 6 شهور .. وكان النت زى الفل
المشاكل اللى قابلتنى معها
اولا مشكله ماديه .. انا باخد اشتراك 30 جم من كل مشترك .. منها تمن سوتشات واكسسات و .... .. بشترى اجهزه وبسافر مواصلات وكروت شحن .. هوا كان بياخد 15 جم على كل يوزر وانا اشتغل ويطلع عينى واخد 15 جم لليوزرات التانيه
وصل معايا يوزر كتيرررررر .. بصراحه النت كان كويس والاشاره زى الفل
تانى مشكله كانت فى الربط .. ودى فادتنى كتير كتير كتيرررررررر .. ايه اللى كان بيحصل ؟؟
كانت الاشاره من 30 ل 45 دى بى . على الانتنا الطبق . بس الربط صفر .. يعنى ايه .. لما ادخل اعمل سيرفى فى الاكسس بلاقى الاشاره 45 .. اعمل كونكت .. الاقى مفيش اشاره اقصد مفيش ربط.... طبعا دى مش اشاره وهميه ...لانها لو كانت وهميه ما كانت تشتغل معايا فى الفتره السابقه .. ايه العيب . من عندى ولا من الارسال
كلمت الشخص ده .. نزل معايا القريه .. نجرب ونفصل ونشغل .. وفيه واحد قاعد لينا جنب برج الارسال .. يغير الشنال مره . يفصل الكهربا مره .. . يعنى كانت قصه طويله
المهم العيب فى الاخر طلع من عندى .. طلع من الاكسس .. لما قررت انى اعرف ايه اللى بيحصل اخدت الاكسس وقررت انى اكسره .. رجعت فى كلامى .. لان تمنه وقتها 350 جم (( اكسس اير ليف )) .. قولت افكه الاول واشوف فيه ايه .. لاقيت حاجه مكسوره فى الكونكتور .. كويس اتعلمت حاجه
غيرت الاكسس .. الدنيا رجعت تانى مظبوطه .. بس ماديا برده الموضوع مش ناااااااقع خااااااااااااااااالص .. قولت اشوف حل تانى
برج 2006
دورت على شبكه تانيه اشتغل عليها لقيت شبكه اسمها ابو كريم .. اشارته 30 دى بى .. طبعا كويس .. جيت اربط عليه .. ربط .. بس مفيش اى حاجه ظهرت عندى .. لا فى اى بى شغال .. ولا فى بنج شغال .. انا دايما متعود انى شغال بال dhcp او تقدر تسميها توزيع الاى بى اوتوماتيكيا.. .. ايه ده اللى انا ربطت عليه .. المهم كلمته على التليفون .. قالى دخل اى بى .. دخلته . والنت اشتغل بكفاءه عاليه جدا جدا
بصراحه كانت اعلى كفاءه انا شفتها فى الواير لس .. نسبة التقطيع = صفر تقريبا .. معدل بنج الياهو من 200 الى 300 مللى .. الدون لود ثابت من 24 ل 28 .. لانه كان فاتح خط 256 ..
قررت انى اقابله .. روحت ليه وقعدت اشوف ايه القصه
وكانت المفاجأه ... شغال ب انتنا 12 + سيرفر مايكروتك مثبت عليه كارت واير لس ..
طيب ازااااااااااااى .. دا المسافه بينا تقريبا 10 كم .. ازاى النظام ده يشتغل بالكفاءه دى .. والقوه دى .. وتكلفته اقل 5 مرات من الابراج التقليديه ( امب وانتنا ) او ( راوتر بورد وانتنا )
طيب قولت اجرب . لانى اتعلمت من اللى فات .. قولت افتح 10 يوزر .. ماديا كان اصعب من الشبكه اللى قبلها كان عايز 20 جنيه لليوزر .. قولت ماشى بس نجرب
المهم اشتغلت معاه 15 يوم كانت احسن ايام النت لان الدنيا كانت ثابته جدا والدون لود رائع .. ثبات رهيب وسرعه وكفاءه و ............. .. الدنيا ثابته اوى
بعد ال 15 يوم عدد اليوزر زاد وصل ل 40 يوزر منهم 20 اون لاين .. ده المشتركين بتوعى .. وهوا عندى مثلهم .. يعنى اجمالى العدد الاون لاين تقريبا 40 يوزر
الدنيا وقعت ...... نجرب ونغير ونشوف .. ما فى حل .. غيرنا نوع كارت الواير لس المسئول عن الارسال والنتيجه برده ما زالت صفرحتى بعد رفع سرعة الانترنت ل 8 ميجا ظل الوضع كما هو عليه
طيب قللنا عدد اليوزر الاون لين .. الدنيا ظبطت .. بعد تجربه وملاحظه وجدنا ان اقصى تحمل للنظام ده 30 يوزر اون لاين .. بعد كده الدنيا بتقع خااااااااااااااااالص وكانت الخطوه التانيه كالتالى
مستعدون لتركيب وصيانة جميع انواع الشبكات السلكيه واللاسلكيه فى جميع انحاء الجمهوريه
برج 2007
تلاته شباب واحد فيهم بيدرس فى حاسبات ومعلومات والتانى فى تجاره والتالت خريج تجاره ومعاه خبره كبيره فى الشبكات
قررت اشتغل معاهم .. برج الارسال بينى وبينه 8 كم .. والبرج عباره عن امبرفير واحد واط وانتنا 15 اومنى واكسس اير ليف فى الارسال .. الاشاره كانت معقوله .. اشتغلت معاهم فتره صغيره جدا . والسبب ببساطه ان الناس دى كان فعلا معاها عدد يوزر اون لاين كبيرررررر لانهم كانوا موزعين الخدمه واير لس فى اكتر من 5 قرى .. وبالتاكيد ده كان له اكبر الاثر فى ان النت يكون تعبان والربط تعبان .. بس اتعلمت منهم كتير
طيب يا جماعه انا الوقتى اعمل ايه بصراحه اتخنقت جدا .. ولولا اصرارى كان زمانى سبت الشبكات من زمان
بعد تفكير عميق ققرت ان اعمل انا لحسابى بغض النظر عن الماديات
برج 2007
ده كان اول برج انا اعمله لحسابى .. البرج كان فى اقرب بلد ليا .. قريه صغيره اقصى خط ممكن يشتغل عليها 2 ميجا .. الشخص المسئول عن توزيع الخدمه محترم جدا واتعلمت منه كتير
المهم انا اللى ركبت البرج الاشاره كانت تمام .. الاول البرج عباره عن امب واحد واط تايوانى + انتنا 15 اومنى اير + اكسس تى بى لينك 642 فى الارسال وطبعا سيرفر مايكروتك 2.9 .. . متوسط الاشاره بعد 2 كم كان 30-35 دى بى مع العلم ان الاستقبال كان باكسس تى بى لينك 501 جى .. اما الاير ليف فكان يستقبل على اشاره تتراوح ما بين 45 – 55 دى بى
... مشاكلى فى الشبكه دى كانت باختصار ان النت كان دايما تعبان .. البنج عالى جدا 3000 او 4000 .. مش اقل من كده .. والدون لود كان اقصى حدود ليه معايا 100 كيلو لو انا لوحدى اللى على الشبكه .. واحيانا كان بيكون 20 كيلوا بايت وانا لوحدى
ده كان سببه .. اولا ضعف مزود الخدمه .. كنا نتعامل وقتها مع شركة لينك .. ثانيا ضعف الراوتر الموجود فى الشبكه .. بالرغم من ان نوع الراوتر سبيد تاتش صناعه اتحاد اوروبى الا انه كان ضعيف .. كان بيحتاج ريستارت كل نص ساعه لان الكهربا كانت ضعيفه .. ولما جبت محول اتظبط شويه .. نسبيا
وبرده الشبكه دى فشلت .. لانى مش قادر حتى اللحظه دى اظبط كل الظروف .. فى الظروف دى كنت بدات اقرأ فى الشبكات اللاسلكيه .. وكنت انتهيت من شهادة n+ من شركة comptia .. والخلفيه العلميه موجوده
يعنى السبب الرئيسى لفشل الشبكه هوا ضعف الخدمه المقدمه من السنترال .. لذلك قررت الابتعاد لفتره ليست بالقصيره عن الشبكه .. شويه رفاهيه وشوية دراسه لانى وقتها كنت فعلا مخنوق جدا
(( اجا ))2009
اول مره اركب فيها شبكه خارجيه كانت دى ... وكانت عباره عن اكسس بوليتbullet + انتنا 15 اومنى هايبر لينك امريكى .. وكانت كفاءه جدا لدرجة انها كانت اقوى من البرج اللى كنت انا عامله لنفسى .. بس كنت متاكد انه فى المستقبل هيقابله مشاكل .. المهم ربطنا على بعد 3 كيلوا و 5 كم و 7 كم .. والربط تمام
ايه اللى حصل بعد ما عدد اليوزر زاد عن 70 يوزر .. وكان معاه 25 على الاقل اون لاين
الشبكه وقعت تانى ........ بعد فحص الاسباب والتحليل وصلت لان الاكسس البوليت ضعيف .. وليه نقطتين ضعف .. اول شئ انه ما يتحمل عدد يوزر اون لاين .. تانى شئ انه ما يتحمل عدد كبير من الاكسسات تربط عليه .. يعنى ممكن تربط ب 10-15 اكسس كحد اقصى
ده اللى قابلنى بصراحه .. بعدها بفتره مش كبيره ... ركبت شبكه تانيه برده بالبوليت وانتنا 15 .. وعدد اليوزر الاون لين فيها كان اكتر من 30 يوزر والشبكه كانت شغاله تمام
واستنتجت ان الاكسس البوليت لا يخضع لتجارب بمعنى انه قد يكون قوى جدا وقد يكون ضعيف جدا .. وهذا ليس له علاقه بالاصلى او مش الاصلى .. لان المصدر اللى جايب منه البوليت واحد ونفس الاصدار ونفس السعر ونفس اليوم .. وعلى فكره الاكسسات البوليت دى جايه من السعوديه مش من مصر .. يعنى مضمونه
اتاكدت وقتها ان البوليت ضعيف جدا .. اشارته ممكن تكون قويه وتعجبك .. والنت كويس فى المراحل الاولى من اعداد الشبكه لكن بعد فتره ولما الشبكه تكبر .. هتلاقى مشاااااااااااكل انت فى غنى عنها
برج المنصوره 2009
تعرفت بالصدفه على احد الاشخاص المهمين .. وطلب منى تركيب محطه لاسلكيه خاصه به .. وعرفت منه ان الاجهزه دى جايه من امريكا .. وانه استعان بمهندسين قبلى وفشلوا فى تركيبها .. ولما روحت اركب لقبت الانتتنا الهايبر لينك ولقيت اكسس انا مش عارف نوعه وامب شكله غريب
المهم بدات اركب الشبكه .. اشتغلت معايا تمام وتوصلت للنتائج التاليه
المسافه اللى الشبكه دى وصلت ليها كانت دايره نص قطرها 25 كم .. تخيل انت حجم المسافه
ثبات قوى جدا جدا فى الاشاره
ثبات فيم بعد حتى مع ضغط العملاء
وفهت من الشبكه دى اساسيات حركة الموجه لانى وقتها استغربت جدااااااا جدا ازاى شبكه تغطى 25 كم فى كل اتجاه .. يعنى 50 كم .. دى اقوى من ابراج المحمول .. وقتها قريت شوية كتب فى علم حركة الموجه والالكترون واتعلمت كتير جدا من كتابات الدكتور قصى الفرضى
برج طلخا 2010
سيستم عباره عن اكسس اير ليف بانتنا 10 دى بى .. صاحب الشبكه كان طالب منى مسافه صغيره وعدد يوزر 25 اون لاين كحد اقصى ..
هنا اتعلمت ارسال النت على مسافات صغيره جدا والاستفاده من الضغط السكانى فى المدن .. لانك لو فى مدينه يكفيك انك يكون معاك حى او شارع .. ممكن تطلع منهم عدد يوزر لا يقل عن 100 على عكس القرى . عشان توصل ال 100 يوزر لازم تغطى مثلا 3 كم مربع
المشاكل اللى كانت بتقابلنى فى الشبكه دى هيا الضغط على الاجهزه
كان لازم تعمل ريستارت كل فتره للاكسس الرئيسى لانها كانت بتهنج بسرعه .. دى كل مشاكلها .. وما تنسى ان عدد اليوزر اللى كان على الشبكه لا يتعدى 50 يوزر منهم 20 اون لاين
وصلت التغطيه معايا تقريبا 1.5 كم مربع
برج الفيوم .. 2009
ناس كلمتنى على النت وطلبت منى اركب ليها سيستم .. كان كا طموحهم 5 كم مربع .. قررت الاعتماد على الامبرفير + انتنا 15 + اير ليف
وصل معايا الارسال ل 8 كم .. وبرده الشبكه قابلتها مشاكل . السبب الرئيسى ان الناس كانت عامله حسابها ان هيا هتشتغل على خط 4 او 8 ميجا .. وبعد تركيب الواير لس لقينا ان اقصى خط ممكن تشتغل بيه هوا 2 ميجا .. وحتى لما شغلنا الخط ال 2 ميجا لقينا ان النت ضعيف والسبب فى ضعف النت كان من مزود الخدمه (( شركة الفيوم )) وكان من الراوتر لانهم كانوا شغالين ب راوتر تى بى لينك وطبعا هوا ضعيف
برج الشرقيه
البرج ده غريب لدرجه فوة الخيال … فى البدايه كان شغال بانتنا 15 واكسس تى بى لينك وامب واحد وات .. بعد كده اشتغل بالمايكروتك بورد + كارت اكس ار تو .. الغريب انى انا بقرأ اشارته وانا فى البيت ..
والله العظيم كنت هتهبل .. بينى وبينه فوق ال 45 كم .. ومع ذلك لاقط الشبكه .. الاشاره كانت ضعيفه جدا جدا .. ممكن اقراها من 5 ل 10 دى بى … بس دى تيجى ازاى دا المسافه 45 كم على الاقل فى الهوا
احترت فى الموضوع .. ولما قعدت معاه عرفت انه رافع البرج فوق عماره 15 دور .. وحاطط ماسوره 10 متر كمان
اكيد ده السبب فى ان الاشاره واصله بعيد للدرجه دى .. بس اللى هوا عامله كان غلط .. بالطريقه اللى هوا عاملها . يشتت الاشاره على مسافات بعيده وبس
يعنى عنده فى المنطقه محدش هيقرا الواير لس بتاعه الا لو رفع مسافه عاليه
المهم .. اتعلمت من الشبكه دى ازاى تربط ماسفه فوق ال 20 كم بطريقه صحيحه
برج الصالحيه الجديده
عرفت ان صاحب الشبكه مقيم فى منطقه متساويه تماما فى الارتفاعات . زى نظام مساكن كده . ودى انجح المناطق فى الشبكات لانك مش هتلاقى اى مشاكل .. الدنيا متساويه تمام
قدرت ارمى بانتنا 12 + اكسس اير ليف 4 كم ... بس الاستقبال كان بانتنا ياكى 14 دى بى مع التغطيه لمسافه 2 كم بكروت واير لس فى ظل توافر زاوية رؤيا جيده
برج الاسماعليه ( فايد )
فايد منطقه عسكريه واكيد هتقابلك نويزnoise جامده هناك لان هيكون دايما فيه تشويش عليك من اجهزة الجيش .. وبصراحه الشبكه دى كانت نقطة تحول رهيبه ليا .. لان دى كانت اول مره اشتغل بالانتنا السيكتور .. وعرفت من شغل السيكتور انها اقوى بكتير من الانتنا الاومنى .. بمعنى . لو انت عايز تغطى مسافه اكبر من 3 كم .. يبقى السيكتور.. هيا اللى تغطى ليك بكفاءه على عكس الاومنى .. الاومنى ممكن تغطى نفس المسافه .. بس الانتنا السيكتور اقوى بكتيررررر .. جرب بس تشتغل بيها وحط عليها حاجه الخارج منها 1000 مللى وات .. هتفرق معاك كتير
وصلت التغطيه فى الشبكه دى 9 كم .. من اول تجربه يعنى كان ممكن توصل لاكتر من كده لو ظبطت الدنيا .. (( وعلى فكره مش انا اللى ركبتها )) انا شفت صور الشبكه بعد ما ركبت
برج الاسكندريه
فى المدن دايما انا برجح عدم الاعتماد على المسافات البعيده .. الا اذا كنت انت عايز تغطى مسافه كبيره لاسباب معينه ..
ومهم جدا انك تعرف انه فى المدن الساحليه فيه درجة رطوبه عاليه .. عشان كده الاكسسات كلها لازم تكون فى امان من الرطوبه . وتكون محكمة الغلق
المهم .. كان المطلوب بالتحديد انى اغطى 500 متر بس .. وبشرط ان الناس تشتغل ان دور .. يعنى الاشاره تكون داخل البيوت .. وكان الحل هنا الاعتماد على الربيتر
بمعنى جبت اكسس اير ليف + انتنا 10 دى بى فى الارسال وحطيت كل 100 متر اكسس اير ليف وانتنا 5 دى بى .. وربطت ربيتر .. بس مع كل ربيبتر كنت بقلل الارتفاع شويه .. بمعنى اوضح .. النقطه الرئيسيه كانت على عماره 14 دور .. والربيتر الاول كان فى الدور العاشر .. الربيتر التانى كان فى الدور السادس .. الربيتر التالت كان فى الدورالتانى
بالطريقه دى بس ضمنت ان الاشاره تكون ان دور .. وفعلا دخلت الاشاره معايا ان دور مع العلم انه ممنوع تحت اى ظروف انك تعمل اكتر من 3 ربيتر . بمعنى اوضح .. النقطه الرئيسيه .. مسموح ليك تعمل 3 ربيتر بعدها فى كل اتجاه ... وركز على كلمة فى كل اتجاه .. وحاول دايما تربط على النقطه الرئيسيه .. ما تحاول تربط على قطعه عامله ربيتر الا للضروره القصوى
برج المعادى ..... المهندسين ..... المرج ..... حلوان
تقريبا ابراج متشابهه .. الهدف منها كان تغطية 500 متر ان دور وتغطية 3 كم اوت دور .. فى الشبكه دى اعتمدت على السيكتور + اكسس اير ليف ثرى جى او بافلو او لينك سيس .. كنت باخد نفس الكفاءه من الاكسسات دى
المهم عملت نفس القصه اللى عملتها فى برج الاسكندريه .. الاختلاف فقط فى المنقطه الرئيسيه .. لانى حطيت انتنا سيكتور بدل من الانتنا ال 10 دى بى
وفى النهايه عايز اجمع اسباب النجاح فى الشبكات فى نقط .. وارجو قرائته جيدا .. يعنى كلام عن تجربه
اسباب النجاح فى انشاء الشبكات
1. اول شئ لازم تستعين بشخص متخصص فى الشبكات ايا كانت خبرتك انت النظريه .. لكن لو كان عندك خبره عمليه يكفيك انك تسال بس الناس اللى اشتغلت قبلك وتعرف منهم ايه الصح والغلط
2. اول قاعده فى الواير لس .. (( انه لا توجد قواعد))
3. قبل ان تبدأ فى اخذ قرار بانشاء شبكه لاسلكيه .. تقوم بدراسه ماديه لحجم المستخدمين المتوقعين والسرعات المطلوبه ثم تتأكد من ان السنترال يتحمل الخطوط المطلوبه
مثلا تتأكد انه توجد امكانية الحصول على خط 2 او 4 او 8 ميجا مثلا
4. لازم انت تتعلم ايه اللى بيحثل فى الشبكه .. لانه مش معقول كل ما تقابلك مشكله تسال الناس او تجيب مهندس يصلحها . وطبعا ده له تكلفته
5. فى الواير لس .. انت بتعمل نقطة ارسال .. ونقاط استقبال اوعى تعتمد على نقطة استقبال وحيده وتنزل منها سلوك بعد كده الا اذا كانت الظروف لا تسمح .. بمعنى ادق . خلى كل 5 عملاء على نقطة استقبال منفصله .. وابعد تمام عن انك تغطى مسافات كبيره فيم بعد بالسلوك .. لان هتقابلك مشاكل.
6. هناك اكتر من 50 نوع من الشبكات اللاسلكيه .. وكل نوع يصلح فى حاله معينه . بمعنى ان اللى يصلح فى المدينه لا يصلح فى الريف والعكس .. بالاضافه ان اللى يصلح فى منطقه ريفيه معينه لا يعنى انه يصلح فى منطقه اخرى ريفيه .. لكل منطقه ظروفها .
7. حاول قبل البدء فى اخذ قرار بانشاء شبكه .. حاول تقرا كتير فى اللاسلكى عشان تفهم الامور هتمشى ازاى
8. الشبكه اللاسلكيه تحتاج الى تفرغ تام لادارتها .. لا تقبل على شبكه لاسلكيه الا اذا كنت متفرغ فعلا لها .. او على الاقل لديك موظف او ما شابه يستطيع الاعتناء بها
9. ليست العبره دائما فى قوة الاشاره .. او المسافه فى التغطيه .. العبره فى النهايه فى الكفاءه والجوده
10. اقوى ابراج الارسال التى ينصح بها الخبراء فى هذا المجال هو المايكروتك بورد + كارت x2 + انتنا 15 هايبر لينك امريكى الصنع
11. يفضل فى حالة الرغبه فى ربط مناطق متباعده الارسال بانتنا اومنى والاستقبال بانتنا ياكى
واسباب الفشل باختصار
هى عدم تطبيق الامور السابقه
فى النهايه اسف جدا جدا على الاطاله .. واسف على الاسلوب الذى كتبت به المقال .. كنت احاول فقط ان اكون اقرب ما يكون الى القارئ لذلك ابتعدت تماما عن العربيه الفصحى
وارجو الا تنسونى من صالح دعائكم .. وارجو ان تدعوا لى ولوالدى دائما
وانوه مره اخرى
اسوأ سرقه هى سرقة العلم فاذا اردت ان تنقل الموضوع او تستفيد منه ماديا باى صوره من الصور فانا لا امانع اطلاقا بشرط ان تذكر اسم كاتب المقال الحقيقى والرابط الاصلى ... غير ذلك فانا سعيد جدا لانك اهديت الى حسناتك لانك سرقت مجهودى
ومؤخرا قررت ان اضع خلاصة تجاربى الشخصيه فى مجال الواير لس فى مقال تحت عنوان ( تجارب خبراء الشبكات اللاسلكيه ) فى الرابط ادناه .... بالتاكيد سوف تستفيد ايا كانت خبراتك فى مجال الشبكات اللاسلكيه او الشبكات السلكيه ... انصحك بقرائة المقال بتركيز شديد ... بعدها سيتغير تفكيرك فى مجال الواير ليس
http://kenanaonline.com/users/antennamaker/topics/69889/posts/217171
وانا موجود على الياهو فى اى وقت لمن لديه استفسار .. او تستطيع ان تختصر الوقت وانا موجود على الموبايل وان شاء الله اجيب على كل الاتصالات .. فالعظمه والكبرياء لله وحده
م / محمد عصام البرم
المنصوره- مصر
0185629052
مستعدون لتركيب وصيانة جميع انواع الشبكات السلكيه واللاسلكيه فى جميع انحاء الجمهوريه
ساحة النقاش