جارى التحميل
استخدم زر ESC أو رجوع للعودة
![](http://media.kenanaonline.com/photos/1238373/1238373107/large_1238373107.jpg?1397476229)
سؤال خطر ببالى فى مقابلتى مع كابتن روما .... هو كابتن روما بيخاف من إيه ؟
فى الحقيقة وجهت السؤال للكابتن روما ... بتخاف من إيه يا كابتن سألنى زي ايه ؟ قلت أى شئ إيه بيخوفك و بعد صمت دقيقة قال الحمد لله هخاف من إيه و لكن لأن عقلى مش مستوعب أنه فى حد فى الدنيا ما لوش أى مخاف كان عندى إصرار طالما هو إنسان و تكوينه الجسمانى زى أى انسان و فى غدة كزرية و بتفرز إدرينالين لازم يخاف لكن من إيه و هنا دار حوار غريب بينى و بين الكابتن روما .
انا : قولى يا كابتن يعنى مثلا لو حصل مشكلة بينك و بين ناس و حصلت خناقة كبيرة تخاف
الكابتن روما : ضحك قالى لا أتخانق ليه اساساً انا بعرف اتخانق بس ليه انا بحب كل الناس و هما بيحبونى
أنا : بلاش دى إفرض مثلا أنه الناس دى واجهوك بكلب شرس هتخاف
كوكو : و هنا لقيت كوكو نبح بصوت عالى " هو هو هو " طبعا فهمت خلاص يا كوكو انا بقول مثلا فاهمه شفتنى جبت الكلب و جيت عارفه انك مش هتسيب الكابتن دى حتى تبقى مش أخلاق كلاب .
أنا : بلاش السؤال ده إفرض مثلا مثلا يعنى الناس دول جابولك اســــــــــــــــد كبير هتخاف
شطا : لقيت شطا وقف جوه القفص و بدأ يزئر بصوت عالى " هاااااااااااااااااااا " طبعا فهمت خلاص يا شطا يا م انا بقول مثلا مثلا شفتنى جبت الاسد و جيت عارفه انك مش هتسيب الكابتن دى حتى تبقى مش أخلاق أسود .
أنا : بلاش كل الكلام ده خالص إفرض مثلا احنا بنقول مثلا الناس دى فتحو عليك مطواة
الكابتن روما : ضحك و قالى انا !!!!!!!!! خناقة و كمان مطواة ليه !!!!!!!!!!!! أنا فنان هو أنا بلطجى !!!!!!!!!!
أنا : المهم هتخاف من السلاح الابيض و لا مش هتخاف ؟
الكابتن روما : على فكره انا قناص و الضرب ده بجد شفتى السلاح بيضرب من مسافة قد إيه و سمك الخشب قد إيه يبقى هخاف منه ليه ؟
أنا : و طبعا لانى عايزه أتأكد أنه الضرب ده بجد و مفيهوش أى خدعة جريت بسرعة أشوف الخشب للى بيضرب عليه السلاح الابيض
![](http://media.kenanaonline.com/photos/1238373/1238373108/large_1238373108.jpg?1397476257)
الكابتن روما : ريحينى بس فى ايه هههههههه روحى شوفى الخشبة على فكره نفسى اريحك
و فعلا صورت الخشبه و مكان ضربة السلاح معلم فيها بجد و مش خدعة ولكن طبعا لغاية دلوقتى ما وصلتش الكابتن روما بيخاف من إيه ؟؟؟
أنا : طيب إفرض مثلا مثلا إنك واجهت بطل كاراتيه
الكابتن روما ضحك و قالى انا مش لسه قايلك انى التانى على العام فى الترابيز يعنى و الحمد لله جسمانيا اقدر اواجهة
أنا : صحيح عارفه عارفه ده عقبال ما يقف استعداد و يقولك هااااااااااااااااااا هتكون عملت 150 لفه فى الهوا وبعدت عنه 2 كيلو على الاقل بس انا بردوا ما وصلتس
الكابتن روما : طيب عايزة توصلى لايه بس ريحينى ؟
أنا : بلاش كل ده إفرض مثلا مثلا يعنى الناس دى جابتلك متفجرات هتخاف
الكابتن روما : ضحك و قالى نفسى أفهم مين لناس دول و يجبولى متفجرات ليه ..... على فكره انتى بتٍسالى أسئلة غريبة قوى بس لذيذة
أنا : يا كابتن التفجيرات فى كل مكان دلوقتى لو اتوجدت فى الجو ده و ضرب نار حواليك هتخاف ؟
الكابتن روما : شوفى مبدأياُ أنا ضد كل المظاهرات اللى بتحصل كلها لان بسببها شباب زى الورد بيموت على الفاضى و الشباب ده لو عاش هيعمل حاجات كثير حلوه للبلد و مش هتاوجد فيها اصلا لكن لو بالقدر فطبعا مش هخاف الاعمار بيد الله
أنا : يا كابتن ريحنى بس بتخاف من إيه
كابتن روما : أنا هريحك قالولى زمان أنك عمرك ما هتعرف الخوف الا لما يكون عندك أولاد و فعلا بعد ما ربنا رزقنى بأولادى بقيت بخاف عليهم .
أنا : طيب قولى يا كابتن امتى تلجأ للعنف
الكابتن روما : أظنك عرفتى انا اقدر اتعامل مع كل ده مع الكلاب و الوحوش و السلاح الابيض و بضرب نار و لكن عمرى ما الجا للعنف لانى فنان مش بلطجى و اللى بنعمله ده فن مش عنف بنلعبه فى السيرك على نسعد الناس مش علشان نخوف الناس و دى مش أخلاقنا بمعنى انى عمرى ما هقف فى موقف يحصل فيه عنف بينى و بين أى حد .
و خلص الحوار ده بينى و بين كابتن روما لكن شفتوا انه الموضوع فى الاول و فى الاخر مسألة أخلاق مش ضعف من الكابتن روما رغم كل القدرات اللى بيملكها
بجد الحوار ده إهداء لشباب كثير أول ما يحصل مجرد كلمة ما تعجبوش يبتدى يهين و يغلط و يسب و يلعن و طبيعى يحصل تشابك بالايدى و بعد شوية يتصل باصحابة و أصحابه توصل معاها اسلحة بيضا و ممكن كمان مسدسات و مدافع اليه ودايما بيتفاخروا بأسلحتهم و بقدرتهم على الحشد لاكبر عدد من " البلطجية " و لما تتناقش مع حد فيهم يقولك لا دى مسألة كرامة و انا مش ضعيف !!!
الشاب لما يلجأ لعنف مش معناه انه شاب قوى او بيملك قدرات خاصة و مواهب فذه ابدا ده و ان دل يدل على افتقاد التربية والاخلاق و الخوف من الله ده كمان دليل على إفتقاد القدرة على التفكير لحل أى مشكلة بطريقه سلمية و راقيه ومهذبه
طبعا فى ناس كثير ممكن تقرا الكلام ده بغير قناعة لكن هطرح سؤال هو مش فى ايد كابتن روما انه يحل اى خلاف مع اى حد بأنه يفتح باب القفص الحديد للاسد او بضربة سلاح متنشن صح يخلص من عدوه او بطلقة رصاص و رغم كل ده يقول انا فنان مش بلطجى
فعلا السيرك مدرسة كبيرة جدا فى تعليم الانضباط و الاخلاق و الرحمة و الاحترام اللى غابو عند ناس كثير جدا فى لمجتمع
مجلة أنين وطن - بقلم نانى محسن عبد السلام