مع السلامة

..........
قالت حبيبتي
مع السلامة ..
ودموعها ع الخدين
مطر ..
أنا قلت من فين
السلامة ..
وليلنا دا ..
من غير قمر
..........
العتمة كاتمة
الصوت في قلبي ..
والذهول 
أنا لسة فيه ..
وبقيت وإيدي
بترتجف ..
محتار أودع 
فيها إيه
وأمسح دموعي
أو دموعها ..
ولا دمع حاجات
كتير ..
بتبكي ..مش قادر
عليه
..........
إزاي عرفت ساعتها
أقرب من عينيها ..
أبوس جبينها 
أبوس إيديها ..
كانت بتضحك 
والأسى ..
من قلبها بيبكي
عليها
..........
أنا مش طبيعي
ولادا ..
حكم الوداع
بياخدني مني فحأة
شيئ
من ألف شيئ ..
لحظة ضياع
..........
كانت بترسملي
بدموعها 
بحر حزن .. وليل
جريح
وقلب باكي ..
أكيد دا قلبي
في مركبة 
من غير شراع
..........
ماقدرتش أتصور 
ساعتها ..
الصورة هتوديني
فين ..
ماأهي لومسافرة
أكيد هترجع ..
حتي لو ..
هتغيب سنين
لكن النهارده
الرحلة دي ..
من غير رجوع
أولها جرح ..
آخرها حزن
عذاب .. دموع
..........
العاتمة كاتمة
الصوت في قلبي ..
والذهول
أنا لسة فيه ..
وبقيت وإيدي
بترتجف ..
محتار أودع ..
فيها إيه
محمدعبدالرحيم