عارف .. لما يجيلك رغبة تقول الحق
لما ضميرك يصحى و يصرخ لاء
لما تشوف الظلم سنين حكايات
لما تقول الاهه بطعم سكات
لما يجيلك هاتف
و قلبك خايف
و عامل نفسك آل
مش شايف
و ف لحظة صدق يصحى ضميرك
و يقولك حدد ياللا مصيرك
و انت لسانك
راضي بحالك
فيرد يقوله كتر خيرك
عارف لما تعيش دايماً ع الهامش
و ترضى يقولوا عليك م الواغش
مش فارقة معاك
ان كان ده شيطان
و لا ملاك
قلبك ميت .. عقلك ميت
حسك ميت
كل جوارحك شئ ع الهامش
و مصدق نفسك انك عايش
لما ده كله يمر عليك
و العالم يجري
من حواليك
و انت حياتك ع المنوال
يوم شغال
و يوم بطال
مستني الحظ يحن عليك
او حد يغمض ايه ف ايديك
و اللي لاهيك
هدمة و لؤمة
و ست عيال
بالزمة يا خينا عاجبك عيشتك
و كل جيرانك اكلت وشك
بالزمة جايلك نفس تعيش
و انت مافيش
ف السلبية واخد راحتك
و انت و بختك
بكرة هايجي
او مايجيش
اصحى يا سيدنا ياللا و فوق
ازاي راضي تعيش مخنوق
ارفع صوتك
علشان قوتك
و رزق عيالك
مش هايفوتك
و ان داس الظلم
فوق الحلم
تبقى يا سيدنا
انت المحقوق
قوم يا أخينا
مصر لسة بتناديك
قوم معانا
مش هانتحايل عليك
المصري عمره ما كان جبان
لا انجليز و لا امريكان
ليهم يوم عليك وصايا
قوم معايا
خد بإيدي و هات ايديك
الحكاية مش بسيطة
و مش غويطة
و الاهم من ده كله
ان الناس دي مش عبيطة
الناس دي عارفة
عايزة ايه
و بيشترونا
بالمعونة
وده كله ليه
و انت عارف قد ايه
دي ناس حويطة
لو نفرق يوم ايدينا
ايديهم هاتطول علينا
و حبة حبة
هايخدوا سينا
و بعد ما كنا بيت و عيلة
في يوم و ليلة
هانلقى روحنا
ف لحظة روحنا
و لا حد هايبكي يوم علينا
قوم معايا يابن والدي
بالارادة و التحدي
نكتب سطر ف التاريخ
مش ف صفحة الطبيخ
يابن والدي
لازم نعدي
لازم يبقى الحلم واقع
قبل ما يبقى حق ضايع
يا سدرة هاتي
يا مدرة ودي
و ان رضينا يكون ده حالنا
و بإيدنا يضيع مصيرنا
و الارض منا تتسرق
و العرض يولع يتحرق
يا ميت ندامة
ع الكرامة
لما يدوس علينا
شوية لمامة
و ينسونا اصلنا
و نسلنا
و يخلونا نبيع ضميرنا
و فوق البيعة كمان عيالنا
دي عمر ما كانت مصر تستاهل
تنده علينا و احنا نتجاهل
اللي نصرت يوسف
و موسى
اللي ف كتاب التاريخ
عروسة
ازاي تهون علينا يا ولاد
ازاي هانرضى عليها جلاد
ازاي هانرضى يقسموها
ازاي ولادها هايسبوها
و يبيعوها
تعيش فوق الجبين شايل
وصمة عار
مكتوب عليك فاعل
نفسك تنظف بس مش طايل
هايكون خلاص فات الاوان
و قطعوها الامريكان
و الصهاينة اتمددوا
و اتبغددوا
مادام بنسكت
لما يهددوا
و نرضى الزل و الهوان
و تعيش حياتك
عبد متهان
و ان حد سألك
انت مصري
ترد تقوله
ده كان زمان
ياللا دلوقتي ناخد قرار
مش هايفيد الانتظار
لازم نتلم نتجمع
مانسيبش وصالنا يتقطع
ما دام عرفنا
ايه هدفنا
و كسرنا خوفنا
و ماردنا قام بيتمطع
يبقى حليفنا الانتصار
لو ميت مليون حصار
و حصار
لو مليون خاين خسيس
مصر مش هاتروح فطيس
و برنة واحدة
نشيل رئيس
و نجيب رئيس
ما دام ايدينا مشبكين
و مصر جوانا كلمتين
دنيا و دين
هاتفضل مصر على طول عروسة
و شعب مصر على طول عريس
مرحبا بك اخي الزائرنرجو ان ينال الموقع اعجابك الكلمة الطيبة جواز مرور إلى كل القلوب
نشرت فى 14 نوفمبر 2011
بواسطة akramalsayed
ساحة النقاش