-- كنا صغار
-- نجرى و نلعب
-- جنب الدار
-- او فى الملعب
-- لما بنتعب
-- كنا بنقعد
-- تحت التوتة
-- كنا صغار
-- بقلوب حلوة
-- ناخد مش و عيش و خيار
-- اكل كتير
-- نعمل غدوة
-- ما نسيبشى منها فتفوتة
-- كل دا فين ؟
-- تحت التوتة
-- كنا اصحاب
-- كنا اخوات
-- نقسم قوتنا بقلب برئ
-- تكفينا لقمة صغيورة
-- او بسكوتة
-- و التوتة شايفانا بعينها
-- شايفة الحلم بيكبر بيننا
-- تحت التوتة
-- راجل قاعد
-- لأ مش قاعد
-- ده كان ساكن
-- عم ربيع
-- كنت بحبه
-- كان يطلب منى اللقماية
-- كنت مطيع
-- كان عايش تحت الشجراية
-- كانت بيته
-- ما يسيبهاش
-- كان خايف لو سابها دقيقة
-- هى تفوته
-- كنا نقول ده ابن التوتة
-- قلت يا عمى حكايتك ايه؟
-- احكى لنا كل الحدوتة
-- قال لى يا ابنى
-- اللى يبيعك فورا بيعه
-- و ما تبكيش
-- اجرى و عيش
-- ليه تحزن و تقول مجروح
-- ليه تنزف زى المدبوح
-- عيش و اتهنى
-- زى ملاك عايش ف الجنة
-- سكينها كان حامى عليه
-- مقتول لكن من غير دية
-- اوعى لهمك يوم تستسلم
-- قلت اتكلم
-- ها و بعدين
-- قال لى خلاص خلصت
-- توتة توتة
-- و اما كبرنا و رحنا الجامعة
-- رحنا بعيد
-- عالم كله جديد ف جديد
-- و الايام
-- يكبر معها الحلم الدافى
-- و الاحلام
-- فرحة بتحضن قلبى الصافى
-- حب بقاله سنين و سنين
-- حب و شايله ف قلب امين
-- من ساعة ما عيوننا اتلاقت
-- تحت التوتة
-- كانت عايشة ف قلبى و روحى
-- كانت اهلى و كل صروحى
-- كانت حلم و حلم بديع
-- قبل انا ما ابقى عم ربيع
-- كله اتغير
-- تحت التوتة
-- ولا فيه واد
-- ولا بنوتة
-- ولا راجل قاعد بينوح
-- ولا شبان هلوا ولا بانوا
-- مات الراجل
-- لما اتطمن
-- انى خلاص هاقعد ف مكانه
-- تحت التوتة
