انتى طالق بالتلاته
لم سبتى الكل يشرب
لما ربيتى الديابه
لم دوستى
و كلتى عيش
كل الغلابه
انتى طالق بالتلاته
قتل الورق
كل الحروف
و القلم مل الكتابه
و الفجر ميت عا البيبان
من غير شهاده
لما يبقى الموت فى حضنك
صوره واحده من الولاده
انتى طالق بالتلاته
و كنت عاملك سلاميه
قبل ما تتسلى بيا
كنت عاملك غنوه لكن
لوحه لونها
كله داكن
كنت واقف فى الحرس
مستنى يضربلى الجرس
انتى طالق بالتلاته
كنت نخله فى بر نيلك
كنتى بتشاوريلى اجيلك
كنت اشوف جرحك أداوى
كنت موالك غناوى
حبه قرد
و حبه حاوى
انتى طالق بالتلاته
ليه تبيعى اللى اشتراكى
و تشترى بايع هواكى
ليه تسيبى قلب حبك
نفسه مره ينول رضاكى
مهما تقسى عمره مره
فى يوم شكاكى
انتى طالق بالتلاته
حبه حبه عليا حبه
قلبى مفطوم عالمحبه
عمرى شايفك وانتى شابه
وشك البدر المور
كل يوم انده وادور
شوفى مين
حبك و مين
قادر يزور
انتى طالق بالتلاته
كنت عصفور فوق غيطانك
كنت بغزلك خيطانك
الف توب فصلته ليكى
الف طرحه و الف شال
دق بابى صوت و نادى
قوم وشيل عنى العيال
انتى طالق بالتلاته
لما ربيتى الديابه
انتى طالق بالتلاته
لما دوستى غ الغلابه
