هات ايديك فى ايديا يلا
نحمى مصر ومنخافوش
احنا مش نعملها ثوره
وهما يملو فى الكروش
احنا كان مطلبنا واضح
إننا نحس بكيانا
بعد ما اتكلمنا يجوا
يكسروا حاجز لسانا
لأه لأه والف لأ
دا احنا لينا الف حق
لينا حق فى إنا متنا
الف مره من النظام
لينا ان الشعب عمـــره
ما شعر يوم بالسلام
لينا ان الحكم ...ياما
كان حارمنا من الكلام
لينا ايه تانى..؟ هاقولك
لينا إنا ...... المصريين
اللى عاشو فى المذله
يعنى ماتو من سنين
ماتو مش روحهم سابتهم
لأه ماتو متداسين
ياه دا ربك كان ميسر
كل خطوه خطيناها
واللى مات فى الثوره عايش
واحنا برضه حسيناها
يبقى هات ايدك فى ايدى
هى ازمه وحليناها
قول يارب ويلا سمى
مصر روحى مصر دمى
مصر مش بلدى وكيانى
لأ مصر دى تبقى أمى
مصر امك انت برضه
مصر غاليه ومش رخيصه
يبقى منسبهاش ونسكت
بين إيد خاينه وخسيسه
مصر مش محتاجه إلا
إننا نحافظ عليها
فوق وحس بيها تلقى
مصر منك وانت ليها
